ମାଟ୍ରିମୋନିଆଲ୍ ଆପ୍ରେ ପ୍ରେମ ଜାଲ, ତା’ପରେ କୋଟି କୋଟିର ଠକେଇ; ପଶ୍ଚିମବଙ୍ଗରୁ ଧରାପଡ଼ିଲା ମାଷ୍ଟର୍ ମାଇଣ୍ଡ
ନୂଆଦିଲ୍ଲୀ: ଦିଲ୍ଲୀ ପୁଲିସର ସାଉଥ-ୱେଷ୍ଟ ସାଇବର ଥାନା ଏକ ବଡ଼ ଧରଣର ‘ରୋମାନ୍ସ ସ୍କାମ୍’ର ପର୍ଦ୍ଦାଫାଶ କରିଛି। ପଶ୍ଚିମବଙ୍ଗର ବାସିନ୍ଦା ଆନନ୍ଦ କୁମାର (୩୫) ନାମକ ଜଣେ ବ୍ୟକ୍ତିଙ୍କୁ ପୁଲିସ ଗିରଫ କରିଛି, ଯିଏ ଦେଶର ବିଭିନ୍ନ ପ୍ରାନ୍ତର ପ୍ରାୟ ୫୦୦ରୁ ଅଧିକ ମହିଳାଙ୍କୁ ଠକି ପ୍ରାୟ ୨ କୋଟି ଟଙ୍କା ହଡ଼ପ କରିଥିବା ଅଭିଯୋଗ ହୋଇଛି।
ଅଭିଯୁକ୍ତ ଜଣକ ବିଭିନ୍ନ ଡେଟିଂ ଏବଂ ମାଟ୍ରିମୋନିଆଲ୍ ଆପ୍ରେ ନିଜକୁ ଜଣେ ସଫଳ ଡାକ୍ତର, ବ୍ୟବସାୟୀ କିମ୍ବା ଫିଲ୍ମ ପ୍ରୋଡ୍ୟୁସର ଭାବେ ପରିଚୟ ଦେଉଥିଲା। ପ୍ରଥମେ ମହିଳାଙ୍କ ସହ ବନ୍ଧୁତା ଓ ପରେ ବିବାହର ପ୍ରତିଶ୍ରୁତି ଦେଇ ସେ ସେମାନଙ୍କ ବିଶ୍ୱାସ ଜିତୁଥିଲା। ଏହାପରେ ମିଥ୍ୟା ମେଡିକାଲ୍ ଇମରଜେନ୍ସି କିମ୍ବା ବ୍ୟବସାୟିକ କ୍ଷତିର ବାହାନା ଦେଖାଇ ସେ ମହିଳାଙ୍କଠାରୁ ଲକ୍ଷ ଲକ୍ଷ ଟଙ୍କା ନେଉଥିଲା।ଅନେକ କ୍ଷେତ୍ରରେ ଅଭିଯୁକ୍ତ ମହିଳାଙ୍କ ବ୍ୟକ୍ତିଗତ ଫଟୋ ଓ ଭିଡିଓ ବ୍ୟବହାର କରି ସେମାନଙ୍କୁ ବ୍ଲାକମେଲ୍ ମଧ୍ୟ କରୁଥିଲା।
ଜଣେ ପୀଡ଼ିତା ୭ ଲକ୍ଷ ଟଙ୍କାର ଠକେଇ ନେଇ ଅଭିଯୋଗ କରିବା ପରେ ପୁଲିସ ତଦନ୍ତ ଆରମ୍ଭ କରିଥିଲା। ପୁଲିସ ଆନନ୍ଦ କୁମାରଙ୍କୁ ପଶ୍ଚିମବଙ୍ଗର ୨୪ ପ୍ରଗଣା ଅଞ୍ଚଳରୁ ଗିରଫ କରିଛି। ତାଙ୍କ ପାଖରୁ ୪ଟି ସ୍ମାର୍ଟଫୋନ୍, ୮ଟି ସିମ୍ କାର୍ଡ ଏବଂ କିଛି ସୁନା ଅଳଙ୍କାର ଜବତ କରାଯାଇଛି। ଠକେଇ ଟଙ୍କାର ଏକ ବଡ଼ ଭାଗ ସେ ଅନଲାଇନ୍ ଗେମିଂରେ ଖର୍ଚ୍ଚ କରିଥିବା ଜେରା ବେଳେ ସ୍ୱୀକାର କରିଛି।