ଭୁବନେଶ୍ୱର: ଉପର ମୁଣ୍ଡରେ ପ୍ରବଳ ବର୍ଷା ଓ ଜଳପ୍ରବାହ ବୃଦ୍ଧି ପାଇବା ଫଳରେ ହୀରାକୁଦ ଜଳାଶୟରୁ ବନ୍ୟାଜଳ ନିଷ୍କାସନ ପରିମାଣ ବୃଦ୍ଧି କରିବାକୁ ନିଷ୍ପତ୍ତି ନେଇଛି ରାଜ୍ୟ ଜଳସମ୍ପଦ ବିଭାଗ। ଶୁକ୍ରବାର ସନ୍ଧ୍ୟା ସୁଦ୍ଧା ହୀରାକୁଦ ଡ୍ୟାମ୍ର ମୋଟ ଗେଟ୍ ସଂଖ୍ୟା ୧୪ରୁ ୨୨କୁ ବୃଦ୍ଧି କରାଯିବ ବୋଲି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ (ଇଆଇସି) ଦିଲ୍ଲୀପ କୁମାର ରାଉତ ଗଣମାଧ୍ୟମକୁ ସୂଚନା ଦେଇଛନ୍ତି।
ବର୍ତ୍ତମାନ ହୀରାକୁଦର ୧୪ଟି ଗେଟ୍ ଦେଇ ପ୍ରାୟ ୨ ଲକ୍ଷ କ୍ୟୁସେକ୍ ବନ୍ୟାଜଳ ନିଷ୍କାସିତ ହେଉଛି। ଆଉ ୮ଟି ଗେଟ୍ ଖୋଲିବା ପରେ ମୋଟ ୨୨ଟି ଗେଟ୍ ଦେଇ ଜଳ ନିଷ୍କାସନ ପରିମାଣ ବୃଦ୍ଧି ପାଇ ପ୍ରାୟ ୩.୫ ଲକ୍ଷ କ୍ୟୁସେକ୍ରେ ପହଞ୍ଚିବ। ଜଳାଶୟକୁ କ୍ରମାଗତ ଭାବେ ବୃଦ୍ଧି ପାଉଥିବା ଜଳପ୍ରବାହକୁ ନିୟନ୍ତ୍ରଣ କରିବା ପାଇଁ ଏହି ନିଷ୍ପତ୍ତି ନିଆଯାଇଛି।
ମହାନଦୀ ଶାଖାରେ ଜଳସ୍ତର ଓ ଆକଳନ
ବର୍ତ୍ତମାନ ଖୈରମାଳ ନିକଟରେ ମହାନଦୀରେ ୫.୨୭ ଲକ୍ଷ କ୍ୟୁସେକ୍ ଜଳ ପ୍ରବାହିତ ହେଉଛି। ହୀରାକୁଦରୁ ଅତିରିକ୍ତ ଜଳ ନିଷ୍କାସିତ ହୋଇ ତଳମୁଣ୍ଡରେ ପହଞ୍ଚିବା ପରେ ଏହି ପ୍ରବାହ ବୃଦ୍ଧି ପାଇ ପ୍ରାୟ ୭.୫ ଲକ୍ଷ କ୍ୟୁସେକ୍ରେ ପହଞ୍ଚିବା ନେଇ ଆକଳନ କରାଯାଇଛି।
ଗୁରୁବାର ମୁଣ୍ଡଳୀ ନିକଟରେ ବନ୍ୟାଜଳ ନିଷ୍କାସନ ସର୍ବାଧିକ ୮.୮୮ ଲକ୍ଷ କ୍ୟୁସେକ୍ ରହିଥିବା ବେଳେ ବର୍ତ୍ତମାନ ଏହା କମି ୮.୬୫ ଲକ୍ଷ କ୍ୟୁସେକ୍ରେ ପହଞ୍ଚିଛି। ଶନିବାର ସକାଳ ସୁଦ୍ଧା ଏହା ହ୍ରାସ ପାଇ ୭.୫ ଲକ୍ଷ କ୍ୟୁସେକ୍ରୁ କମ୍ ହେବାର ସମ୍ଭାବନା ରହିଛି।
ଜଳସମ୍ପଦ ବିଭାଗ ପକ୍ଷରୁ ସମସ୍ତ ନଦୀବନ୍ଧ ଓ ତଳିଆ ଅଞ୍ଚଳ ଉପରେ କଡ଼ା ନଜର ରଖାଯାଇଛି।