ପଞ୍ଚାୟତ ନିର୍ବାଚନ ପୂର୍ବରୁ ବିଜେପିର ଶକ୍ତି ବୃଦ୍ଧି: ନବରଙ୍ଗପୁରରେ ୫୦୦ରୁ ଅଧିକ କଂଗ୍ରେସ ଓ ବିଜେଡି କର୍ମୀ ପଦ୍ମ ଶିବିରରେ ସାମିଲ

ନବରଙ୍ଗପୁର: ଆଗାମୀ ପଞ୍ଚାୟତ ନିର୍ବାଚନ ପୂର୍ବରୁ ଓଡ଼ିଶା ରାଜନୀତିରେ ହେରଫେର ଆରମ୍ଭ ହୋଇଯାଇଛି। ନବରଙ୍ଗପୁର ଜିଲ୍ଲାରେ ଭାରତୀୟ ଜନତା ପାର୍ଟି (ବିଜେପି) ନିଜର ସାଂଗଠନିକ ସ୍ଥିତିକୁ ଆହୁରି ମଜବୁତ କରିଛି। ଶନିବାର ଦିନ ଜିଲ୍ଲାର ପାପଡ଼ାହାଣ୍ଡି ବ୍ଲକ ଅନ୍ତର୍ଗତ ଜାମବାଗୁଡ଼ାଠାରେ ଆୟୋଜିତ ଏକ ମିଶ୍ରଣ ପର୍ବରେ କଂଗ୍ରେସ ଏବଂ ବିଜୁ ଜନତା ଦଳ (ବିଜେଡି)ର ୫୦୦ରୁ ଅଧିକ ସକ୍ରିୟ କର୍ମୀ ଆନୁଷ୍ଠାନିକ ଭାବେ ବିଜେପିରେ ସାମିଲ ହୋଇଛନ୍ତି।

ଡାବୁଗାଁ ବିଧାନସଭା ନିର୍ବାଚନ ମଣ୍ଡଳୀର ଏହି ବହୁସଂଖ୍ୟକ କର୍ମୀମାନଙ୍କୁ ଓଡ଼ିଶାର ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଦଳକୁ ସ୍ୱାଗତ କରିଥିଲେ। ନବରଙ୍ଗପୁର ବିଜେପି ଜିଲ୍ଲା ସଭାପତି କୁଞ୍ଜବିହାରୀ ଦାସଙ୍କ ସଭାପତିତ୍ୱରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।ଗଣମାଧ୍ୟମ ପ୍ରତିନିଧିମାନଙ୍କ ସହ ଆଲୋଚନା ବେଳେ ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି ଯେ, “ଓଡ଼ିଶାରେ ବିଜେପି ସରକାର ଗଠନ ହେବା ପରଠାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ବିକାଶମୂଳକ କାର୍ଯ୍ୟଧାରା ସମସ୍ତଙ୍କୁ ଅନୁପ୍ରାଣିତ କରିଛି।

ଡାବୁଗାଁ ନିର୍ବାଚନ ମଣ୍ଡଳୀର ୫୦୦ରୁ ଅଧିକ କଂଗ୍ରେସ ଓ ବିଜେଡି ସଦସ୍ୟ ବିଜେପିର ଜନକଲ୍ୟାଣକାରୀ ଯୋଜନା ଉପରେ ଆସ୍ଥା ପ୍ରକଟ କରି ଆଜି ଆମ ସହିତ ଯୋଡ଼ି ହୋଇଛନ୍ତି।”କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ବିକାଶମୂଳକ କାର୍ଯ୍ୟ ଏବଂ ଲୋକାଭିମୁଖୀ ଯୋଜନା ଯୋଗୁଁ ଦଳ ପ୍ରତି ଜନସାଧାରଣଙ୍କ ସମର୍ଥନ କ୍ରମାଗତ ଭାବେ ବୃଦ୍ଧି ପାଉଛି ବୋଲି ମନ୍ତ୍ରୀ ପ୍ରକାଶ କରିଛନ୍ତି।

ଅପରପକ୍ଷରେ, ବିଜେପିର ବରିଷ୍ଠ ନେତାମାନେ ଦାବି କରିଛନ୍ତି ଯେ ଏହି ବୃହତ ମିଶ୍ରଣ ପର୍ବ ନବରଙ୍ଗପୁର ଜିଲ୍ଲାରେ ଦଳର ତୃଣମୂଳ ସ୍ତରର ସଂଗଠନକୁ ଅଧିକ ଶକ୍ତିଶାଳୀ କରିବ ଏବଂ ଆଗାମୀ ପଞ୍ଚାୟତ ନିର୍ବାଚନରେ ବିଜେପିକୁ ଏକ ବଡ଼ ସଫଳତା ଦେବାରେ ସହାୟକ ହେବ। ଏହି କାର୍ଯ୍ୟକ୍ରମରେ ଜିଲ୍ଲାର ଅନେକ ପ୍ରମୁଖ ବିଜେପି ନେତା ଓ କର୍ମୀ ଉପସ୍ଥିତ ଥିଲେ।