ଅର୍ବାନ ଚାଲେଞ୍ଜ ଫଣ୍ଡ ପାଇଁ ଓଡ଼ିଶାର ୫ ହଜାର କୋଟିର ପ୍ରସ୍ତାବ; ପରବର୍ତ୍ତୀ ପିଢ଼ିର ସହରୀ ବିକାଶ ରୋଡମ୍ୟାପ୍ ଉପସ୍ଥାପନ
ଭୁବନେଶ୍ୱର/ନୂଆଦିଲ୍ଲୀ:
ସହରାଞ୍ଚଳ ବିକାଶକୁ ନୂତନ ଦିଗ ଦେବା ଲକ୍ଷ୍ୟରେ ଓଡ଼ିଶା ସରକାର ‘ଅର୍ବାନ ଚାଲେଞ୍ଜ ଫଣ୍ଡ’ ଅଧୀନରେ ୫,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ଏକ ମହତ୍ତ୍ୱାକାଂକ୍ଷୀ ପ୍ରସ୍ତାବ କେନ୍ଦ୍ର ସରକାରଙ୍କ ନିକଟରେ ଦାଖଲ କରିଛନ୍ତି। ମଙ୍ଗଳବାର ନୂଆଦିଲ୍ଲୀରେ ଅନୁଷ୍ଠିତ ‘ଅର୍ବାନ ଚାଲେଞ୍ଜ ଫଣ୍ଡ’ର ପ୍ରଥମ ଜାତୀୟ ଆପେକ୍ସ କମିଟି ବୈଠକରେ ରାଜ୍ୟ ସରକାର ପକ୍ଷରୁ “ପରବର୍ତ୍ତୀ ପିଢ଼ିର ସହରୀ ବିକାଶ ରୋଡମ୍ୟାପ୍” ଉପସ୍ଥାପନ କରାଯାଇଥିଲା।
କେନ୍ଦ୍ର ଗୃହ ନିର୍ମାଣ ଓ ସହରୀ ବ୍ୟାପାର ମନ୍ତ୍ରୀ Manohar Lal Khattarଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଥିଲା। ଓଡ଼ିଶା ପକ୍ଷରୁ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଉଷା ପାଢ଼ୀ ପାଞ୍ଚଟି ପ୍ରମୁଖ ସହରୀ ଭିତ୍ତିଭୂମି ପ୍ରକଳ୍ପର ବିସ୍ତୃତ ଖାକା ଉପସ୍ଥାପନ କରିଥିଲେ।
ଏହି ରୋଡମ୍ୟାପ୍ରେ ସ୍ଥାୟୀ ଭିତ୍ତିଭୂମି, ଜଳବାୟୁ ସହନଶୀଳତା, ଡିଜିଟାଲ୍ ଶାସନ ଏବଂ ନାଗରିକ-କେନ୍ଦ୍ରିକ ବିକାଶ ଉପରେ ବିଶେଷ ଗୁରୁତ୍ୱ ଦିଆଯାଇଛି। ରାଜ୍ୟ ସରକାରଙ୍କ ଦୃଷ୍ଟିକୋଣ ଅନୁସାରେ, ଆଗାମୀ ସହରଗୁଡ଼ିକ କେବଳ ଅର୍ଥନୈତିକ ଭାବେ ସଶକ୍ତ ନୁହେଁ, ପରିବେଶ ଅନୁକୂଳ ଓ ସାମାଜିକ ଭାବେ ସମାବେଶୀ ମଧ୍ୟ ହେବ।
ଓଡ଼ିଶା ପକ୍ଷରୁ ଉପସ୍ଥାପିତ ପ୍ରକଳ୍ପଗୁଡ଼ିକରେ ସମନ୍ୱିତ ଭିତ୍ତିଭୂମି ବିକାଶ, ଉନ୍ନତ ନାଗରିକ ସେବା, ଗମନାଗମନ ବ୍ୟବସ୍ଥାର ସୁଧାର ଓ ଗୁଣାତ୍ମକ ସହରୀ ଜୀବନଶୈଳୀକୁ ପ୍ରାଥମିକତା ଦିଆଯାଇଛି। ବନ୍ୟା ନିୟନ୍ତ୍ରଣ, ବୈଜ୍ଞାନିକ ଜଳ ନିଷ୍କାସନ ବ୍ୟବସ୍ଥା, ସହରୀ ସବୁଜ ବଳୟର ସମ୍ପ୍ରସାରଣ, ସ୍ଥାୟୀ ଜଳ ପରିଚାଳନା ଏବଂ ଜଳବାୟୁ-ଅନୁକୂଳ ଭିତ୍ତିଭୂମି ଉନ୍ନୟନକୁ ମଧ୍ୟ ଏହି ପ୍ରସ୍ତାବରେ ସ୍ଥାନ ଦିଆଯାଇଛି।
ଏହାସହ ମହିଳା, ଉଠାଦୋକାନୀ, ଆର୍ଥିକ ଅନଗ୍ରସର ଶ୍ରେଣୀ ଓ ଅନ୍ୟାନ୍ୟ ଅସୁରକ୍ଷିତ ଗୋଷ୍ଠୀଙ୍କୁ ସମାନ ସୁଯୋଗ ଓ ମୌଳିକ ସହରୀ ସେବା ଯୋଗାଇବା ଉପରେ ମଧ୍ୟ ଓଡ଼ିଶା ସରକାର ଗୁରୁତ୍ୱ ଦେଇଛନ୍ତି।