ଭୁବନେଶ୍ୱର: ଓଡ଼ିଶାରେ ଦୁର୍ନୀତି ନିବାରଣ ବିଭାଗ (ଭିଜିଲାନ୍ସ) ପକ୍ଷରୁ ପୁଣି ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସୋମବାର କଳାହାଣ୍ଡି ଜିଲ୍ଲାରେ ଜଣେ ମନରେଗା (MGNREGA) ସହକାରୀଙ୍କୁ ଜଣେ ହିତାଧିକାରୀଙ୍କ ଠାରୁ ୩୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ଗୋଡ଼ାଇ ଗୋଡ଼ାଇ ରଙ୍ଗେହାତ ଗିରଫ କରିଛି।
ମନରେଗା ଯୋଜନା ଅଧୀନରେ ବାକି ଥିବା ବିଲ୍ ଟଙ୍କା ମଞ୍ଜୁର କରାଇଦେବା ପାଇଁ ସେ ଏହି ଲାଞ୍ଚ ଦାବି କରିଥିଲେ।ଗିରଫ ହୋଇଥିବା ମହିଳା ଅଧିକାରୀ ଜଣକ ହେଲେ ପ୍ରିୟଙ୍କା ଜେନା। ସେ ଭବାନୀପାଟଣା ସ୍ଥିତ ପ୍ରୋଜେକ୍ଟ ଡିରେକ୍ଟର (ୱାଟରସେଡ୍) କାର୍ଯ୍ୟାଳୟରେ ମନରେଗା ସହକାରୀ ଭାବେ କାର୍ଯ୍ୟରତ ଅଛନ୍ତି। ଏହି ଯୋଜନାରେ ନିଜ ଜମିରେ ଫାର୍ମ ପଣ୍ଡ (ଖେତ ପୋଖରୀ) ଖୋଳିଥିବା ଜଣେ ହିତାଧିକାରୀଙ୍କ ଠାରୁ ସେ ଲାଞ୍ଚ ନେଉଥିବା ବେଳେ ଧରାପଡ଼ିଛନ୍ତି।
ଭିଜିଲାନ୍ସ ବିଭାଗ ଅନୁଯାୟୀ, ହିତାଧିକାରୀଙ୍କୁ ପୂର୍ବରୁ ୨.୬୮ ଲକ୍ଷ ଟଙ୍କାର ଆଂଶିକ ବିଲ୍ ମିଳିସାରିଥିଲା। ମାତ୍ର ବାକି ଥିବା ପାଉଣା ଏବଂ ପୂର୍ବରୁ ଆସିଥିବା ଟଙ୍କାର ପ୍ରୋସେସିଂ ଫାଇଲ୍ ଆଗକୁ ବଢ଼ାଇବା ପାଇଁ ପ୍ରିୟଙ୍କା ୩୫,୦୦୦ ଟଙ୍କା ଲାଞ୍ଚ ମାଗିଥିଲେ। ଲାଞ୍ଚ ନଦେଲେ ବାକି ବିଲ୍ ଟଙ୍କା ମଞ୍ଜୁର କରାଇ ନଦେବାକୁ ସେ ଧମକ ମଧ୍ୟ ଦେଇଥିଲେ।
ହିତାଧିକାରୀ ଜଣକ ବାରମ୍ବାର ଅନୁରୋଧ କରିବା ସତ୍ତ୍ୱେ ପ୍ରିୟଙ୍କା ନଛୋଡ଼ବନ୍ଧା ହେବାରୁ, ସେ ବାଧ୍ୟ ହୋଇ ଓଡ଼ିଶା ଭିଜିଲାନ୍ସ କାର୍ଯ୍ୟାଳୟରେ ଏକ ଲିଖିତ ଅଭିଯୋଗ ଦାୟର କରିଥିଲେ। ଅଭିଯୋଗ ଆଧାରରେ ଭିଜିଲାନ୍ସ ବିଭାଗ ଏକ ସ୍ୱତନ୍ତ୍ର ଫାନ୍ଦ ପ୍ରସ୍ତୁତ କରିଥିଲା। ଯୋଜନା ମୁତାବକ ହିତାଧିକାରୀଙ୍କ ଠାରୁ ପ୍ରିୟଙ୍କା ୩୫,୦୦୦ ଟଙ୍କାର କେମିକାଲ୍ ଯୁକ୍ତ ଲାଞ୍ଚ ଟଙ୍କା ଗ୍ରହଣ କରୁଥିବା ବେଳେ ଅଧିକାରୀମାନେ ତାଙ୍କୁ ମାଡ଼ି ବସିଥିଲେ ଏବଂ ତାଙ୍କ ନିକଟରୁ ସମସ୍ତ ଟଙ୍କା ଜବତ କରିଛନ୍ତି।
ଟ୍ରାପ୍ କରାଯିବା ପରେ ପ୍ରିୟଙ୍କା ଜେନାଙ୍କ ଆୟ ବହିର୍ଭୂତ ସମ୍ପତ୍ତିର ଆକଳନ କରିବା ପାଇଁ ତାଙ୍କ ସହ ଜଡ଼ିତ ଦୁଇଟି ଭିନ୍ନ ଭିନ୍ନ ସ୍ଥାନରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢ଼ାଉ କରାଯାଉଛି।ଏହି ମାମଲାରେ ଦୁର୍ନୀତି ନିବାରଣ (ସଂଶୋଧନ) ଅଧିନିୟମ, ୨୦୧୮ ର ଧାରା ୭ ଅନୁଯାୟୀ କୋରାପୁଟ ଭିଜିଲାନ୍ସ ଥାନାରେ ଏକ ମାମଲା (କେସ୍ ନଂ ୦୯/୨୦୨୬) ରୁଜୁ କରାଯାଇ ଅଧିକ ତଦନ୍ତ ଚଳାଇଛି।