ରାଷ୍ଟ୍ରପତି ଭବନରେ ଶୋଭା ପାଇବ ରଥଯାତ୍ରାର ତିନି ରଥ ଚକ: ମହାପ୍ରଭୁଙ୍କ ସ୍ମାରକୀ ସ୍ଥାପନକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ମଞ୍ଜୁରୀ
ଭୁବନେଶ୍ୱର: ଓଡ଼ିଶାର ସମୃଦ୍ଧ ସଂସ୍କୃତି ଏବଂ ଜଗନ୍ନାଥ ସଂସ୍କୃତିର ଆଧ୍ୟାତ୍ମିକ ପରମ୍ପରା ପାଇଁ ଏକ ଐତିହାସିକ ଓ ଗୌରବମୟ ମୁହୂର୍ତ୍ତ । ପୁରୀର ବିଶ୍ୱପ୍ରସିଦ୍ଧ ଘୋଷଯାତ୍ରାରେ ବ୍ୟବହୃତ ତିନି ରଥର ପବିତ୍ର ଚକ ଏବେ ନୂଆଦିଲ୍ଲୀ ସ୍ଥିତ ରାଷ୍ଟ୍ରପତି ଭବନରେ ସ୍ଥାପିତ ହେବାକୁ ଯାଉଛି । ଶ୍ରୀମନ୍ଦିର ପ୍ରଶାସନ (SJTA) ପକ୍ଷରୁ ଦିଆଯାଇଥିବା ଏହି ସ୍ୱତନ୍ତ୍ର ପ୍ରସ୍ତାବକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆନୁଷ୍ଠାନିକ ଭାବେ ଅନୁମୋଦନ କରିଛନ୍ତି ।
ସୂଚନା ଅନୁସାରେ, ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର ଅରବିନ୍ଦ କୁମାର ପାଢ଼ୀ ସୋମବାର ଭୁବନେଶ୍ୱର ସ୍ଥିତ ଲୋକ ଭବନଠାରେ ମାନ୍ୟବର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଥିଲେ । ଏହି ଆଲୋଚନା ସମୟରେ ସେ ଶ୍ରୀଜୀଉଙ୍କ ରଥ ଚକକୁ ରାଷ୍ଟ୍ରପତି ଭବନରେ ସ୍ଥାପନ କରିବା ପାଇଁ ଏକ ପ୍ରସ୍ତାବ ଆଗତ କରିଥିଲେ । ରାଷ୍ଟ୍ରପତି ଏହି ପ୍ରସ୍ତାବକୁ ହାର୍ଦ୍ଦିକ ସ୍ୱାଗତ କରିବା ସହ ନିଜର ସମ୍ମତି ପ୍ରଦାନ କରିଛନ୍ତି ।
ତିନି ରଥର ଚକ ହେବ ସ୍ଥାପିତ
ଏହି ନିଷ୍ପତ୍ତି କ୍ରମେ:
- ନନ୍ଦିଘୋଷ: ମହାପ୍ରଭୁ ଶ୍ରୀଜଗନ୍ନାଥଙ୍କ ରଥର ଚକ
- ତାଳଧ୍ୱଜ: ପ୍ରଭୁ ଶ୍ରୀବଳଭଦ୍ରଙ୍କ ରଥର ଚକ
- ଦର୍ପଦଳନ: ଦେବୀ ସୁଭଦ୍ରାଙ୍କ ରଥର ଚକ
ଏହି ତିନି ପବିତ୍ର ଚକକୁ ଖୁବ୍ଶୀଘ୍ର ସମ୍ମାନର ସହ ନୂଆଦିଲ୍ଲୀ ନିଆଯାଇ ରାଷ୍ଟ୍ରପତି ଭବନ ପରିସରରେ ପ୍ରଦର୍ଶିତ ଓ ସଂରକ୍ଷିତ କରାଯିବ ।
ଓଡ଼ିଶାର ଏହି ଯୁଗଯୁଗର ଚିରନ୍ତନ ଜଗନ୍ନାଥ ସଂସ୍କୃତି ଓ ଆଧ୍ୟାତ୍ମିକ ଐତିହ୍ୟର ପ୍ରତୀକ ଭାବେ ଏହି ଚକଗୁଡ଼ିକ ରାଷ୍ଟ୍ରପତି ଭବନର ଶୋଭା ବୃଦ୍ଧି କରିବ । ଏହି ଐତିହାସିକ ପଦକ୍ଷେପ ପାଇଁ ସାରା ରାଜ୍ୟର ଜଗନ୍ନାଥ ପ୍ରେମୀ ଓ ଓଡ଼ିଶାବାସୀଙ୍କ ମଧ୍ୟରେ ଆନନ୍ଦର ଲହରୀ ଖେଳିଯାଇଛି ।