ପୁରୀ: ଶ୍ରୀକ୍ଷେତ୍ରରେ ଆଜି ପବିତ୍ର ଭଉଁରୀ ଯାତ୍ରା। ଏହି ଅବସରରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ନିମନ୍ତେ ନିର୍ମାଣ ହେଉଥିବା ତିନି ରଥର ଅତି ଗୁରୁତ୍ୱପୂର୍ଣ୍ଣ ‘ଚକ-ଅଖ’ ଡେରା ନୀତି ଅନୁଷ୍ଠିତ ହେବ। ଏଥିପାଇଁ ରଥଖଳାରେ ସମସ୍ତ ପ୍ରସ୍ତୁତି ଶେଷ ହୋଇଛି।
ପରମ୍ପରା ଅନୁଯାୟୀ, ଶ୍ରୀମନ୍ଦିରରେ ସକାଳ ଧୂପ ନୀତି ଶେଷ ହେବା ପରେ ପୂଜାପଣ୍ଡା ସେବକମାନେ ମହାପ୍ରଭୁଙ୍କ ଆଜ୍ଞାମାଳ ଧରି ରଥଖଳାକୁ ବିଜେ କରିବେ। ତିନି ରଥ ପାଇଁ ଉଦ୍ଦିଷ୍ଟ ତିନୋଟି ଆଜ୍ଞାମାଳ ପହଞ୍ଚିବା ପରେ ଭୋଇ ସେବକମାନଙ୍କ ଦ୍ୱାରା ‘ହରିବୋଲ’ ଧ୍ୱନି ମଧ୍ୟରେ ତିନି ରଥର ଦୁଇଟି ଲେଖାଏଁ ନାହାକ ଚକ ସହ ଗୋଟିଏ ଲେଖାଏଁ ଅଖ ସଂଯୋଗ କରାଯାଇ ଡେରା ଯିବ। ଏହି ନୀତି ପରେ ରଥ ନିର୍ମାଣ କାର୍ଯ୍ୟ ଆହୁରି ତ୍ୱରାନ୍ୱିତ ହେବ।
ଚନ୍ଦନ ଯାତ୍ରାର ବିଂଶ ଦିନରେ ଭଉଁରୀ ପଡୁଥିବାରୁ ନରେନ୍ଦ୍ର ପୁଷ୍କରିଣୀରେ ଚାପ ଖେଳ ବିଶେଷ ଆକର୍ଷଣୀୟ ହେବ। ମଦନମୋହନ, ରାମକୃଷ୍ଣ ଓ ପଞ୍ଚୁ ପାଣ୍ଡବ ଚାପରେ ବିଜେ କରି ୨୧ ଘେରା ଜଳକ୍ରୀଡ଼ା କରିବେ। ଭଉଁରୀ ଅବସରରେ ବାଣ ଫୁଟାଇବା ଉପରେ ପୋଲିସ ପ୍ରଶାସନ ପକ୍ଷରୁ ସମ୍ପୂର୍ଣ୍ଣ ରୋକ୍ ଲଗାଯାଇଛି।
ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ଶ୍ରୀମନ୍ଦିର, ରଥଖଳା ଏବଂ ନରେନ୍ଦ୍ର ପୁଷ୍କରିଣୀ ଚତୁଃପାର୍ଶ୍ୱରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି। ଜଳକ୍ରୀଡ଼ା ସମୟରେ ଯେପରି କୌଣସି ଅଘଟଣ ନଘଟେ, ସେଥିପାଇଁ ନରେନ୍ଦ୍ର ପୁଷ୍କରିଣୀ ନିକଟରେ ଅଗ୍ନିଶମ ବାହିନୀ ଓ ଲାଇଫଗାର୍ଡମାନଙ୍କୁ ପ୍ରସ୍ତୁତ ରଖାଯାଇଛି।
ଭୋରୁ ସିଂହଦ୍ୱାର ଫିଟାଯାଇ ମଙ୍ଗଳ ଆଳତୀ, ମଇଲମ, ଅବକାଶ ଆଦି ନୀତିକାନ୍ତି ସୁରୁଖୁରୁରେ ସମ୍ପନ୍ନ ହୋଇଛି ଏବଂ ଶ୍ରୀକ୍ଷେତ୍ର ଏବେ ସମ୍ପୂର୍ଣ୍ଣ ଉତ୍ସବମୁଖର।