ସୁନ୍ଦରଗଡ଼ରେ ପୋଲିସର ବଡ଼ ସଫଳତା: ନକଲି ନମ୍ବର ପ୍ଲେଟ୍ ଲାଗିଥିବା କାର୍ରୁ ୯୦ କେଜି ଗଞ୍ଜେଇ ଜବତ, ୟୁପିର ୨ ସ୍ମଗଲର ଗିରଫ
ସୁନ୍ଦରଗଡ଼: ସୁନ୍ଦରଗଡ଼ ସଦର ଥାନା ପୋଲିସକୁ ମିଳିଛି ଏକ ବଡ଼ ସଫଳତା। କରମଡିହି ବାଗବନ୍ଧ ସମୀପରେ ପୋଲିସ ଚଢ଼ାଉ କରି ଏକ ନକଲି ନମ୍ବର ପ୍ଲେଟ୍ ଲଗା କାର୍ରୁ ପ୍ରାୟ ୯୦ କିଲୋଗ୍ରାମ ଗଞ୍ଜେଇ ଜବତ କରିବା ସହ ଉତ୍ତରପ୍ରଦେଶର ଦୁଇ ଜଣ ଆନ୍ତଃରାଜ୍ୟ ଗଞ୍ଜେଇ ଚୋରା ଚାଲାଣକାରୀଙ୍କୁ ଗିରଫ କରିଛି।
ମିଳିଥିବା ସୂଚନା ଅନୁଯାୟୀ, ଗଞ୍ଜେଇ ଚୋରା ଚାଲାଣ ସମ୍ପର୍କରେ ଏକ ବିଶେଷ ସୂତ୍ରରୁ ଖବର ପାଇ ସୁନ୍ଦରଗଡ଼ ଏସପିଙ୍କ ନିର୍ଦ୍ଦେଶକ୍ରମେ ସଦର ଥାନା ପୋଲିସ ଏକ ସ୍ୱତନ୍ତ୍ର ଅପରେସନ ଆରମ୍ଭ କରିଥିଲା। ଏସଡିପିଓ (SDPO) ଙ୍କ ନେତୃତ୍ୱରେ ଗଠିତ ପୋଲିସ ଟିମ୍ ବୁଧବାର ବିଳମ୍ବିତ ରାତିରେ କରମଡିହି ବାଗବନ୍ଧ ଅଞ୍ଚଳରେ ନାକାବନ୍ଦୀ କରି ଗାଡ଼ି ଯାଞ୍ଚ କରୁଥିଲା।
ଯାଞ୍ଚ ସମୟରେ ପୋଲିସ ସନ୍ଦେହଜନକ କାର୍ଟିକୁ ଅଟକାଇବାକୁ ଚେଷ୍ଟା କରିଥିଲା, ମାତ୍ର କାର୍ ଚାଳକ ଜଣକ ସେଠାରୁ ଗାଡ଼ି ନେଇ ଫେରାର ହେବାକୁ ଚେଷ୍ଟା କରିଥିଲେ। ଏହାପରେ ପୋଲିସ ପିଛା କରି କରମଡିହି ନିକଟରେ କାର୍ଟିକୁ କାବୁ କରିଥିଲା। କାର୍ ଭିତରେ ଖୋଜାଖୋଜି କରିବା ପରେ ସେଥିରୁ ୯୦ କିଲୋଗ୍ରାମ ଗଞ୍ଜେଇ ଜବତ କରାଯାଇଥିଲା। ଅଧିକ ଯାଞ୍ଚରୁ ଜଣାପଡ଼ିଛି ଯେ, ଗଞ୍ଜେଇ ଚାଲାଣ ପାଇଁ ଗାଡ଼ିରେ ଭୁବନେଶ୍ୱରର ଏକ ନକଲି ନମ୍ବର ପ୍ଲେଟ୍ (Fake Registration Plate) ବ୍ୟବହାର କରାଯାଉଥିଲା।
ଗିରଫ ହୋଇଥିବା ଦୁଇ ଜଣ ଅଭିଯୁକ୍ତ ଉତ୍ତରପ୍ରଦେଶର ବୋଲି ପୋଲିସ ଚିହ୍ନଟ କରିଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏହି ଗଞ୍ଜେଇ ଓଡ଼ିଶାରୁ ଉତ୍ତରପ୍ରଦେଶକୁ ଚୋରା ଚାଲାଣ କରାଯାଉଥିଲା। ପୋଲିସ ଏହି ମାମଲାରେ ଅଧିକ ତଦନ୍ତ ଜାରି ରଖିବା ସହ ଗଞ୍ଜେଇ କେଉଁଠାରୁ ଅଣାଯାଇଥିଲା ଏବଂ ଏହି ର଼୍ୟାକେଟ୍ରେ ଆଉ କେଉଁମାନେ ସାମିଲ ଅଛନ୍ତି, ସେ ନେଇ ଖୋଳତାଳ ଚଳାଇଛି।