ତେହେରାନ୍: ହୋରମୁଜ ପ୍ରଣାଳୀ (Strait of Hormuz)ରେ ଆମେରିକା ଓ ଇରାନ୍ ମଧ୍ୟରେ ଉତ୍ତେଜନା ଚରମସୀମାରେ ପହଞ୍ଚିଛି। ଗୁରୁବାର ଇରାନ୍ର ‘ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କୋର୍ପସ’ (IRGC) ଦାବି କରିଛି ଯେ ସେମାନେ ହୋରମୁଜ ପ୍ରଣାଳୀ ଦେଇ ଯାଉଥିବା ୩ଟି ତୈଳବାହୀ ଜାହାଜକୁ ଅଟକାଇଛନ୍ତି। ଏଥିମଧ୍ୟରୁ ଗୋଟିଏ ଜାହାଜରେ ବିସ୍ଫୋରଣ ଘଟି ନିଆଁ ଲାଗିଯିବା ପରେ ଅନ୍ୟ ଦୁଇଟି ଜାହାଜ ପଛକୁ ଫେରିଯାଇଥିଲେ।
ଇରାନ୍ ବୈଦେଶିକ ମନ୍ତ୍ରୀ ସେୟଦ ଅବ୍ବାସ ଆରାଗଚି କହିଛନ୍ତି ଯେ, ସେମାନେ “ଆଖି ବଦଳରେ ଆଖି” ନୀତି ଆପଣାଇବେ ଏବଂ କୌଣସି ବି ପ୍ରକାର ଆକ୍ରମଣର ଦୃଢ଼ ଜବାବ ଦିଆଯିବ।
୧୨ଶ ଦିନରେ ଆମେରିକାର ଏୟାରଷ୍ଟ୍ରାଇକ୍
ଅନ୍ୟପଟେ, ଆମେରିକୀୟ ସେନା ବୁଧବାର ରାତିରେ ଲଗାତାର ୧୨ଶ ଦିନ ପାଇଁ ଇରାନ୍ର ବିଭିନ୍ନ ସାମରିକ ଘାଟି ଉପରେ କ୍ଷେପଣାସ୍ତ୍ର ମାଡ଼ କରିଛି। ଇରାନ୍ର ଅହଭାଜ, ରାମଶିର ଓ ଅନ୍ଦିମେଶକ ସହର ଏବଂ ବୁଶେହର ପରମାଣୁ ପ୍ଲାଣ୍ଟ ନିକଟସ୍ଥ ଏକ ପାୱାର ଷ୍ଟେସନ୍କୁ ଆମେରିକା ଟାର୍ଗେଟ୍ କରିଥିବା ସୂଚନା ମିଳିଛି।
ଡୋନାଲ୍ଡ ଟ୍ରମ୍ପଙ୍କ ବଡ଼ ଚେତାବନୀ
ଟ୍ରମ୍ପଙ୍କ କଡ଼ା ଚେତାବନୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ‘ଟ୍ରୁଥ୍ ସୋସିଆଲ୍’ରେ ପୋଷ୍ଟ କରି ଲେଖିଛନ୍ତି ଯେ, ହୋରମୁଜ ପ୍ରଣାଳୀରେ କୌଣସି ଜାହାଜ ଉପରେ ଇରାନ୍ ଆକ୍ରମଣ କଲେ, ଆମେରିକା ପାଲଟା ଜବାବରେ ଇରାନ୍ର ଗୋଟିଏ ଲେଖାଏଁ ପୋଲ କିମ୍ବା ପାୱାର ପ୍ଲାଣ୍ଟକୁ ଧ୍ୱଂସ କରିଦେବ।
ସୁରକ୍ଷା ନିଶ୍ଚିତ କରିବା ଲକ୍ଷ୍ୟ: ଆମେରିକା ସେଣ୍ଟ୍ରାଲ କମାଣ୍ଡ ଅନୁଯାୟୀ, ବାଣିଜ୍ୟିକ ଜାହାଜଗୁଡ଼ିକର ସୁରକ୍ଷା ପାଇଁ ଇରାନ୍ର ସାମରିକ କ୍ଷମତାକୁ ଦୁର୍ବଳ କରିବା ଏହି ସାମରିକ ଆକ୍ରମଣର ମୁଖ୍ୟ ଲକ୍ଷ୍ୟ।