ନାଏପିଡ: ଉତ୍ତର-ପୂର୍ବ ମିଆଁମାରରେ ଖଣି କାର୍ଯ୍ୟ ପାଇଁ ଗଚ୍ଛିତ ବିସ୍ଫୋରକ ରଖାଯାଇଥିବା ଏକ କୋଠାରେ ରବିବାର ଘଟିଥିବା ଭୟଙ୍କର ବିସ୍ଫୋରଣରେ ୫୫ରୁ ଅଧିକ ଲୋକଙ୍କର ପ୍ରାଣହାନି ଘଟିଥିବା ବେଳେ ପ୍ରାୟ ୭୦ ଜଣ ଆହତ ହୋଇଛନ୍ତି। ବିସ୍ଫୋରଣ ପରେ ସମଗ୍ର ଅଞ୍ଚଳରେ ଆତଙ୍କ ସୃଷ୍ଟି ହୋଇଥିବା ସହ ବ୍ୟାପକ କ୍ଷୟକ୍ଷତି ଘଟିଛି।
ସମାଚାର ସଂସ୍ଥା ଏପିର ରିପୋର୍ଟ ଅନୁସାରେ, ଚୀନ୍ ସୀମାଠାରୁ ପ୍ରାୟ ୩ କିଲୋମିଟର ଦକ୍ଷିଣରେ ଅବସ୍ଥିତ ନାମ୍ହକାମ୍ ଟାଉନସିପ୍ର କୌଙ୍ଗଟୁପ୍ ଗାଁରେ ମଧ୍ୟାହ୍ନ ସମୟରେ ଏହି ଦୁର୍ଘଟଣା ଘଟିଥିଲା। ବିସ୍ଫୋରଣ ହୋଇଥିବା କୋଠାରେ ଖଣି କାମରେ ବ୍ୟବହୃତ ବହୁ ପରିମାଣର ବିସ୍ଫୋରକ ସଂରକ୍ଷିତ ଥିବା ସୂଚନା ମିଳିଛି।
ବିଦ୍ରୋହୀ ନିୟନ୍ତ୍ରିତ ଅଞ୍ଚଳରେ ଘଟିଲା ଦୁର୍ଘଟଣା
ଘଟଣାସ୍ଥଳ ଅଞ୍ଚଳଟି Ta’ang National Liberation Army (ଟିଏନ୍ଏଲ୍ଏ) ନିୟନ୍ତ୍ରଣରେ ରହିଛି। ଏହି ସଶସ୍ତ୍ର ଗୋଷ୍ଠୀ ମିଆଁମାର ସାମରିକ ଶାସନ ବିରୋଧରେ ଲଢ଼େଇ ଜାରି ରଖିଛି। ତେବେ ବିସ୍ଫୋରଣର ପ୍ରକୃତ କାରଣ ତୁରନ୍ତ ସ୍ପଷ୍ଟ ହୋଇନାହିଁ।
ଶିଶୁଙ୍କ ସମେତ ଅନେକଙ୍କ ମୃତ୍ୟୁ
ଉଦ୍ଧାରକାରୀ ଦଳ ସୂଚନା ଦେଇଛି ଯେ, ରବିବାର ସନ୍ଧ୍ୟା ସୁଦ୍ଧା ବିସ୍ଫୋରଣ ସ୍ଥଳରୁ ୪୬ଟି ମୃତଦେହ ଉଦ୍ଧାର କରାଯାଇଥିଲା। ସେଥିମଧ୍ୟରେ ୬ ଜଣ ଶିଶୁ ଥିବା ଜଣାପଡ଼ିଛି। ମୃତକଙ୍କ ସଂଖ୍ୟା ଆହୁରି ବଢ଼ିବା ଆଶଙ୍କା ରହିଛି, କାରଣ ଧ୍ୱଂସସ୍ତୂପ ତଳେ ଅନେକ ଲୋକ ଫସି ରହିଥିବା ସନ୍ଦେହ କରାଯାଉଛି।
୧୦୦ରୁ ଅଧିକ ଘର କ୍ଷତିଗ୍ରସ୍ତ
ବିସ୍ଫୋରଣର ତୀବ୍ରତା ଏତେ ଭୟଙ୍କର ଥିଲା ଯେ ଆଖପାଖରେ ଥିବା ୧୦୦ରୁ ଅଧିକ ଘର ଭାଙ୍ଗିଯାଇଛି କିମ୍ବା ଗୁରୁତର ଭାବେ କ୍ଷତିଗ୍ରସ୍ତ ହୋଇଛି। ବିସ୍ଫୋରଣ ପରେ ଆକାଶରେ ଘନ କଳା ଧୂଆଁ ଛାଇଯାଇଥିବା ବେଳେ ଆବାସିକ ଅଞ୍ଚଳରେ ବ୍ୟାପକ ଧ୍ୱଂସର ଚିତ୍ର ଦେଖିବାକୁ ମିଳିଛି।
ହସ୍ପିଟାଲରେ ଚାଲିଛି ଚିକିତ୍ସା
ଆହତ ୭୪ ଜଣଙ୍କୁ ନିକଟସ୍ଥ ଟାଉନସିପ୍ ହସ୍ପିଟାଲରେ ଭର୍ତ୍ତି କରାଯାଇଛି। ଅନେକଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁସଂଖ୍ୟା ଆହୁରି ବଢ଼ିପାରେ ବୋଲି ଆଶଙ୍କା କରାଯାଉଛି।
ସ୍ଥାନୀୟ ଓ ସ୍ୱାଧୀନ ଗଣମାଧ୍ୟମ ରିପୋର୍ଟ ଅନୁଯାୟୀ, ମୃତ୍ୟୁ ସଂଖ୍ୟା ୫୦ରୁ ୫୫ ମଧ୍ୟରେ ରହିଥିବା ବେଳେ ଉଦ୍ଧାର କାର୍ଯ୍ୟ ଏବେ ମଧ୍ୟ ଜାରି ରହିଛି।