ଭୁବନେଶ୍ୱର: ରାଜ୍ୟ ସରକାରଙ୍କ ‘ସୁଭଦ୍ରା’ ଯୋଜନାରୁ ବିଭିନ୍ନ କାରଣରୁ ବାଦ୍ ପଡ଼ିଥିବା ୭୯ ହଜାରରୁ ଅଧିକ ହିତାଧିକାରୀଙ୍କୁ ବଡ଼ ରାହାତ ମିଳିଛି। ସୋମବାର ଡାଇରେକ୍ଟ ବେନିଫିଟ ଟ୍ରାନ୍ସଫର (ଡିବିଟି) ମାଧ୍ୟମରେ ସେମାନଙ୍କ ବ୍ୟାଙ୍କ ଖାତାକୁ ୬୧ କୋଟି ଟଙ୍କାରୁ ଅଧିକ ରାଶି ପଠାଯାଇଛି।
ରାଜ୍ୟ ମହିଳା ଓ ଶିଶୁ ବିକାଶ ବିଭାଗ ଦ୍ୱାରା ମିଳିଥିବା ସୂଚନା ଅନୁସାରେ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଭୁବନେଶ୍ୱରରୁ ଆଭାସୀ ମାଧ୍ୟମରେ ଏହି ରାଶି ବିତରଣ କରିଥିଲେ। ପ୍ରଥମ, ଦ୍ୱିତୀୟ ଓ ତୃତୀୟ କିସ୍ତିରୁ ବଞ୍ଚିତ ହୋଇଥିବା ହିତାଧିକାରୀମାନେ ଏଥିରୁ ଲାଭାନ୍ବିତ ହୋଇଛନ୍ତି।
ଏନ୍ପିସିଆଇ ଲିଙ୍କେଜ୍ ନିଷ୍କ୍ରିୟ ରହିବା, ଇ-କେୱାଇସି ବାୟୋମେଟ୍ରିକ ତ୍ରୁଟି ଏବଂ ଅଭିଯୋଗ ନିରାକରଣ ବିଳମ୍ବ ଭଳି କାରଣରୁ ଏହି ମହିଳାମାନେ ପୂର୍ବରୁ କିସ୍ତି ପାଇପାରି ନଥିଲେ। ଏବେ ଯାଞ୍ଚ ଓ ସମାଧାନ ପରେ ସେମାନଙ୍କୁ ରାଶି ପ୍ରଦାନ କରାଯାଇଛି।
ସରକାରୀ ତଥ୍ୟ ଅନୁଯାୟୀ, ୨୧,୯୦୧ ଜଣ ପ୍ରଥମ କିସ୍ତି, ୨୨,୩୪୭ ଜଣ ଦ୍ୱିତୀୟ କିସ୍ତି ଏବଂ ୭୯,୬୦୧ ଜଣ ତୃତୀୟ କିସ୍ତିର ଲାଭ ଉଠାଇଛନ୍ତି।
ଉପମୁଖ୍ୟମନ୍ତ୍ରୀ କହିଛନ୍ତି ଯେ, କୌଣସି ଯୋଗ୍ୟ ହିତାଧିକାରୀ ବଞ୍ଚିତ ହେବେ ନାହିଁ ବୋଲି ସରକାର ପ୍ରତିବଦ୍ଧ। ନିୟମିତ ଯାଞ୍ଚ ଓ ଅଭିଯୋଗ ନିରାକରଣ ମାଧ୍ୟମରେ ସମସ୍ତ ପ୍ରକୃତ ଲାଭାନ୍ବିତଙ୍କୁ ସହାୟତା ପହଞ୍ଚାଯାଉଛି। ସେ ଆହୁରି କହିଛନ୍ତି ଯେ, ‘ସୁଭଦ୍ରା’ ଯୋଜନା ରାଜ୍ୟରେ ମହିଳାଙ୍କ ଆର୍ଥିକ ସଶକ୍ତିକରଣରେ ଗୁରୁତ୍ୱପୂର୍ଣ୍ଣ ଭୂମିକା ନେଉଛି।
ଏହି କାର୍ଯ୍ୟକ୍ରମରେ ବିଭାଗର ବରିଷ୍ଠ ଅଧିକାରୀମାନେ ଏବଂ ସମସ୍ତ ଜିଲ୍ଲାର ପ୍ରଶାସନିକ କର୍ମକର୍ତ୍ତାମାନେ ଆଭାସୀ ଭାବେ ଯୋଗ ଦେଇଥିଲେ।