ଭୁବନେଶ୍ବର: ଓଡ଼ିଶା ମହିଳା କ୍ରିକେଟ୍ରେ ଆଉ ଏକ ନୂଆ ନାମ ଯୋଡ଼ି ହେବାକୁ ଯାଉଛି। ବଲାଙ୍ଗୀର ଜିଲ୍ଲାର ପ୍ରତିଭାଶାଳୀ କ୍ରିକେଟର୍ ଅନନ୍ୟା ମିଶ୍ର ଜାତୀୟ ସ୍ତରରେ ନିଜ ଦକ୍ଷତାର ଛାପ ଛାଡ଼ି ଭାରତୀୟ ମହିଳା କ୍ରିକେଟ୍ ଦଳ ପାଇଁ ନୂଆ ସମ୍ଭାବନା ସୃଷ୍ଟି କରିଛନ୍ତି।
ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (ବିସିସିଆଇ) ପକ୍ଷରୁ ବେଙ୍ଗାଲୁରୁରେ ଆୟୋଜିତ ହେବାକୁ ଥିବା ଜାତୀୟ ସ୍ତରର ମହିଳା କ୍ରିକେଟ୍ ଶିବିର ପାଇଁ ଅନନ୍ୟାଙ୍କୁ ଚୟନ କରାଯାଇଛି। ଏହି କ୍ୟାମ୍ପରେ ଯୋଗଦେବାକୁ ସୁଯୋଗ ପାଇଥିବା ଓଡ଼ିଶାର ସେ ଏକମାତ୍ର ଖେଳାଳି।
ଏହି ସଫଳତା ପରେ ଅନନ୍ୟାଙ୍କ ପରିବାର ଓ କ୍ରୀଡ଼ା ମହଳରେ ଖୁସିର ଲହରୀ ଦେଖିବାକୁ ମିଳିଛି। ତାଙ୍କ ପିତା ରାଜେନ୍ଦ୍ର ମିଶ୍ର, ମା’ ମଞ୍ଜୁଳା ମିଶ୍ର ଏବଂ କୋଚ୍ ଅରୁଣ ନାୟକ ଏହି ସଫଳତା ପାଇଁ ଶୁଭେଚ୍ଛା ଜଣାଇଛନ୍ତି।
ପରିବାର ସୂଚନା ଅନୁସାରେ, ମାତ୍ର ୧୨ ବର୍ଷ ବୟସରୁ ଅନନ୍ୟା କ୍ରିକେଟ୍ ପ୍ରତି ଆଗ୍ରହୀ ଥିଲେ। ପରେ ବଲାଙ୍ଗୀରର ସ୍ଥାନୀୟ ଗାନ୍ଧୀ ଷ୍ଟାଡିୟମ୍ରେ କୋଚ୍ ଅରୁଣ ନାୟକଙ୍କ ତତ୍ତ୍ୱାବଧାନରେ ନିୟମିତ ଅଭ୍ୟାସ ଆରମ୍ଭ କରିଥିଲେ।
ଅନନ୍ୟା ପୂର୍ବରୁ ଓଡ଼ିଶା ମହିଳା ଦଳର ଅଣ୍ଡର-୧୯ ଏବଂ ଅଣ୍ଡର-୨୩ ବର୍ଗରେ ପ୍ରତିନିଧିତ୍ୱ କରିସାରିଛନ୍ତି। ସେ ବଲାଙ୍ଗୀର ଜିଲ୍ଲା ବରିଷ୍ଠ ଦଳର ଜଣେ ନିୟମିତ ସଦସ୍ୟା ମଧ୍ୟ।
ଡାହାଣହାତୀ ଏହି ଅଲ୍ରାଉଣ୍ଡର୍ ବିସିସିଆଇ ଆୟୋଜିତ ଅଣ୍ଡର-୨୩ ଟି-୨୦ ଏବଂ ଅଣ୍ଡର-୧୯ ଏକଦିବସୀୟ ପ୍ରତିଯୋଗିତାରେ ଚମତ୍କାର ପ୍ରଦର୍ଶନ କରି ନିଜ ପ୍ରତିଭା ପ୍ରମାଣ କରିଛନ୍ତି। ରାଜ୍ୟ ଓ ଜାତୀୟ ସ୍ତରରେ କ୍ରମାଗତ ସଫଳତା ପରେ ସେ ଏବେ ଭାରତୀୟ ମହିଳା କ୍ରିକେଟ୍ ଦଳର ନିୟମିତ ସଦସ୍ୟା ହେବା ଦିଗରେ ଦୃଢ଼ ଦାବିଦାର ଭାବେ ଉଭା ହୋଇଛନ୍ତି।
ଜାତୀୟ ଶିବିରରେ ଯୋଗଦେବା ପୂର୍ବରୁ ଅନନ୍ୟାଙ୍କୁ କ୍ରୀଡ଼ାପ୍ରେମୀ ଓ ବିଭିନ୍ନ ମହଳରୁ ଶୁଭେଚ୍ଛା ଓ ଅଭିନନ୍ଦନ ଜଣାଯାଉଛି।