ମରଣାନ୍ତକ ରୋଗରେ ପୀଡ଼ିତ କଏଦୀଙ୍କ ଶୀଘ୍ର ମୁକ୍ତି ପାଇଁ ନୀତି ପ୍ରସ୍ତୁତ କରିବାକୁ ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ
ନୂଆଦିଲ୍ଲୀ: ମରଣାନ୍ତକ ଓ ଅସାଧ୍ୟ ରୋଗରେ ପୀଡ଼ିତ ବନ୍ଦୀମାନଙ୍କୁ ମାନବିକ ଆଧାରରେ ସମୟ ପୂର୍ବରୁ ମୁକ୍ତି ଦେବା ପାଇଁ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ସ୍ୱତନ୍ତ୍ର ନୀତି ପ୍ରସ୍ତୁତ କରନ୍ତୁ ବୋଲି ସୁପ୍ରିମ୍କୋର୍ଟ ନିର୍ଦ୍ଦେଶ ଦେଇଛନ୍ତି। ବନ୍ଦୀଙ୍କ ଜୀବନ, ମର୍ଯ୍ୟାଦା ଓ ମାନବିକ ଅଧିକାରର ସୁରକ୍ଷାକୁ ଗୁରୁତ୍ୱ ଦେଇ ଶୀର୍ଷ ଅଦାଲତ ଏହି ନିର୍ଦ୍ଦେଶ ଜାରି କରିଛନ୍ତି।
ସୁପ୍ରିମ୍କୋର୍ଟ କହିଛନ୍ତି, ଦେଶର ବିଭିନ୍ନ କାରାଗାରରେ ଏପରି ଅନେକ ବନ୍ଦୀ ଅଛନ୍ତି, ଯେଉଁମାନେ ଜୀବନଘାତୀ କିମ୍ବା ଅସାଧ୍ୟ ରୋଗରେ ପୀଡ଼ିତ। ସେମାନଙ୍କ ଶାରୀରିକ ଅବସ୍ଥା, ଚିକିତ୍ସା ଆବଶ୍ୟକତା ଓ ଜୀବନର ଶେଷ ପର୍ଯ୍ୟାୟକୁ ବିଚାର କରି ମାନବିକ ଦୃଷ୍ଟିକୋଣରୁ ଶୀଘ୍ର ମୁକ୍ତି ଦେବା ସମ୍ଭାବନା ଉପରେ ବିଚାର କରାଯିବା ଦରକାର।
ଅଦାଲତ ଆହୁରି କହିଛନ୍ତି ଯେ, ବର୍ତ୍ତମାନ ସମସ୍ତ ରାଜ୍ୟରେ ଏ ସମ୍ପର୍କିତ ସମାନ ନୀତି ନଥିବାରୁ ସମାନ ପରିସ୍ଥିତିରେ ଥିବା ବନ୍ଦୀମାନେ ଭିନ୍ନ ଭିନ୍ନ ବ୍ୟବସ୍ଥାର ସମ୍ମୁଖୀନ ହେଉଛନ୍ତି। ଏହି ଅସମାନତା ଦୂର କରିବା ପାଇଁ ପ୍ରତ୍ୟେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସ୍ପଷ୍ଟ ନିୟମାବଳୀ ପ୍ରସ୍ତୁତ କରିବା ଆବଶ୍ୟକ।
ଶୀର୍ଷ ଅଦାଲତ କହିଛନ୍ତି, ଏଭଳି ନୀତି ପ୍ରସ୍ତୁତ ସମୟରେ ବନ୍ଦୀଙ୍କ ରୋଗର ଗମ୍ଭୀରତା, ଚିକିତ୍ସକଙ୍କ ରିପୋର୍ଟ, ସ୍ୱାସ୍ଥ୍ୟାବସ୍ଥା, ଅପରାଧର ପ୍ରକୃତି ଏବଂ ସମାଜ ଉପରେ ଏହାର ସମ୍ଭାବ୍ୟ ପ୍ରଭାବ ପରି ସମସ୍ତ ଦିଗକୁ ବିଚାର କରିବା ଦରକାର। ମାନବିକତା ଓ ଆଇନର ସନ୍ତୁଳନ ବଜାୟ ରଖି ଏଭଳି ମାମଲାରେ ନିଷ୍ପତ୍ତି ନେବାକୁ ସୁପ୍ରିମ୍କୋର୍ଟ ଜୋର ଦେଇଛନ୍ତି।