Saudi Prince Death: ଲଣ୍ଡନର ବିଳାସପୂର୍ଣ୍ଣ ହୋଟେଲରେ ସାଉଦି ରାଜକୁମାରଙ୍କ ମୃତ୍ୟୁ; କୋରୋନର କୋର୍ଟରେ ସାମ୍ନାକୁ ଆସିଲା ତଦନ୍ତ ରିପୋର୍ଟ
ଲଣ୍ଡନ: ବ୍ରିଟେନର ଏକ କୋରୋନର କୋର୍ଟରେ ଶୁକ୍ରବାର ହୋଇଥିବା ଶୁଣାଣିରେ ସାଉଦି ରାଜକୁମାର ଅବଦୁଲ୍ଲା ବିନ୍ ଫହଦ୍ଙ୍କ ମୃତ୍ୟୁ ସମ୍ପର୍କରେ ତଦନ୍ତ ରିପୋର୍ଟ ସାମ୍ନାକୁ ଆସିଛି। କୋର୍ଟରେ ଉପସ୍ଥାପିତ ସୂଚନା ଅନୁଯାୟୀ, ୨୯ ବର୍ଷୀୟ ରାଜକୁମାରଙ୍କ ମୃତ୍ୟୁ ଲଣ୍ଡନର ଏକ ବିଳାସପୂର୍ଣ୍ଣ ହୋଟେଲରେ ମଦ୍ୟପାନ, ନିଷିଦ୍ଧ ମାଦକଦ୍ରବ୍ୟ ଓ ମାନସିକ ଚାପ ପାଇଁ ବ୍ୟବହୃତ ଔଷଧର ମିଶ୍ରିତ ପ୍ରଭାବ ଯୋଗୁଁ ଘଟିଥିବା କୁହାଯାଇଛି।
ସୂଚନା ଅନୁସାରେ, କେନ୍ସିଂଟନ୍ସ୍ଥିତ ଏକ ମ୍ୟାରିଅଟ୍ ହୋଟେଲର କୋଠରୀରେ ରାଜକୁମାର ଅଚେତ ଅବସ୍ଥାରେ ପଡ଼ିଥିବା ବେଳେ ହୋଟେଲ କର୍ମଚାରୀମାନେ ତାଙ୍କୁ ଦେଖି ଜରୁରୀକାଳୀନ ସେବାକୁ ଖବର ଦେଇଥିଲେ। ଘଟଣାସ୍ଥଳରେ ପହଞ୍ଚିଥିବା ପାରାମେଡିକ୍ ଦଳ ତାଙ୍କୁ ମୃତ ଘୋଷଣା କରିଥିଲେ।
କୋର୍ଟରେ ଉପସ୍ଥାପିତ ଟକ୍ସିକୋଲୋଜି ରିପୋର୍ଟରୁ ଜଣାପଡ଼ିଛି ଯେ, ତାଙ୍କ ରକ୍ତରେ ଆଲକୋହଲର ପରିମାଣ ବ୍ରିଟେନର ଆଇନଗତ ସୀମାଠାରୁ ପ୍ରାୟ ତିନିଗୁଣ ଅଧିକ ଥିଲା। ଏହା ସହିତ ତାଙ୍କ ଶରୀରରେ ମାଦକଦ୍ରବ୍ୟ, ଗଞ୍ଜେଇ ଏବଂ ଉଦ୍ବେଗ (ଆଞ୍ଜାଇଟି) ଚିକିତ୍ସାରେ ବ୍ୟବହୃତ ଜାନାକ୍ସ (Xanax) ଔଷଧର ଉପସ୍ଥିତି ମଧ୍ୟ ଚିହ୍ନଟ ହୋଇଥିଲା। ଡାକ୍ତରୀ ବିଶେଷଜ୍ଞଙ୍କ ମତାନୁସାରେ, ଏହି ସବୁ ପଦାର୍ଥର ସମ୍ମିଳିତ ପ୍ରଭାବରେ ହୃଦ୍ଯନ୍ତ୍ର କାର୍ଯ୍ୟ ବନ୍ଦ ହୋଇ ମୃତ୍ୟୁ ଘଟିଥିଲା।
ଇନର ୱେଷ୍ଟ ଲଣ୍ଡନ କୋରୋନର କୋର୍ଟର ଆସିଷ୍ଟାଣ୍ଟ କୋରୋନର ଜିନ୍ ହାର୍କିନ୍ ଏହି ମୃତ୍ୟୁକୁ ଦୁର୍ଘଟଣାଜନିତ (Accidental Death) ବୋଲି ବର୍ଣ୍ଣନା କରିଛନ୍ତି। ଶୁଣାଣିରେ କୁହାଯାଇଛି ଯେ, ଆତ୍ମହତ୍ୟାକୁ ସୂଚାଉଥିବା କୌଣସି ପ୍ରମାଣ କିମ୍ବା ନୋଟ୍ ମିଳିନଥିଲା ଏବଂ ଘଟଣାରେ ତୃତୀୟ ପକ୍ଷର ସମ୍ପୃକ୍ତିର ମଧ୍ୟ କୌଣସି ପ୍ରମାଣ ମିଳିନାହିଁ।
ଏହି ଘଟଣା ପରେ ସାଉଦି ରାଜପରିବାର ପକ୍ଷରୁ ମଧ୍ୟ ରାଜକୁମାର ଅବଦୁଲ୍ଲା ବିନ୍ ଫହଦ୍ଙ୍କ ମୃତ୍ୟୁ ସମ୍ପର୍କରେ ଆନୁଷ୍ଠାନିକ ଭାବେ ପୁଷ୍ଟି କରାଯାଇଥିବା ସୂଚନା ମିଳିଛି।