ଫୁକେଟ-ଦିଲ୍ଲୀ ଏୟାର ଇଣ୍ଡିଆ ବିମାନରେ ଝଡ଼-ତୋଫାନ: ମଝି ଆକାଶରେ ୩୦୦ ଫୁଟ୍ ଖସିଲା ବିମାନ, କେତେକ ଯାତ୍ରୀ ଆହାତ

ନୂଆଦିଲ୍ଲୀ: ଫୁକେଟରୁ ନୂଆଦିଲ୍ଲୀ ଆସୁଥିବା ଏୟାର ଇଣ୍ଡିଆର ଏକ ବିମାନ ମଝି ଆକାଶରେ ପ୍ରବଳ ଝଡ଼-ତୋଫାନ (ଟର୍ବୁଲେନ୍ସ)ର ସାମ୍ନା କରିଛି । ଏହି କାରଣରୁ ବିମାନଟି ହଠାତ୍ ପ୍ରାୟ ୩୦୦ ଫୁଟ୍ ତଳକୁ ଖସି ଆସିଥିଲା । ତେବେ ଚାଳକ ଦଳର ସତର୍କତା ଯୋଗୁଁ ବିମାନଟି ଦିଲ୍ଲୀ ବିମାନବନ୍ଦରରେ ସୁରକ୍ଷିତ ଭାବେ ଅବତରଣ କରିଛି ।

ମଝି ଆକାଶରେ ହଲଚଲ୍ ଏବଂ ସୁରକ୍ଷିତ ଅବତରଣ

ଏୟାର ଇଣ୍ଡିଆ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ଅଗଷ୍ଟ ୪ ତାରିଖରେ ଫୁକେଟରୁ ଦିଲ୍ଲୀ ଅଭିମୁଖେ ଆସୁଥିବା AI2379 ବିମାନଟି ଉଡ଼ାଣ ସମୟରେ ହଠାତ୍ ପ୍ରବଳ ଟର୍ବୁଲେନ୍ସର ସମ୍ମୁଖୀନ ହୋଇଥିଲା । ଏହି କାରଣରୁ ଅଳ୍ପ ସମୟ ପାଇଁ ବିମାନର ଉଚ୍ଚତାରେ ପରିବର୍ତ୍ତନ ଘଟିଥିଲା ଏବଂ ବିମାନଟି ୩୦୦ ଫୁଟ୍ ତଳକୁ ଖସିଯାଇଥିଲା ।

ତେବେ ପାଇଲଟଙ୍କ ସୁଝବୁଝ ଯୋଗୁଁ ସ୍ଥିତି ନିୟନ୍ତ୍ରଣକୁ ଆସିଥିଲା ଏବଂ ବିମାନଟି ନିରାପଦରେ ଦିଲ୍ଲୀରେ ଓହ୍ଲାଇଥିଲା । ଅବତରଣ ପରେ ସମସ୍ତ ଯାତ୍ରୀ ଓ ବିମାନ କର୍ମଚାରୀଙ୍କୁ ସୁରକ୍ଷିତ ଭାବେ ଓହ୍ଲାଯାଇଥିଲା ।

କିଛି ଯାତ୍ରୀ ଓ କର୍ମଚାରୀ ସାମାନ୍ୟ ଆହାତ

ଏହି ଘଟଣାରେ କାହାରିକୁ ଗୁରୁତର ଆଘାତ ଲାଗିନଥିବା ଏୟାର ଇଣ୍ଡିଆ ସ୍ପଷ୍ଟ କରିଛି । ତେବେ ଝଟକା ଯୋଗୁଁ କିଛି ଯାତ୍ରୀ ଏବଂ ବିମାନ କର୍ମଚାରୀ ସାମାନ୍ୟ ଆହାତ ହୋଇଛନ୍ତି । ପ୍ରାଥମିକ ଚିକିତ୍ସା ଏବଂ ସ୍ୱାସ୍ଥ୍ୟ ପରୀକ୍ଷା ପାଇଁ ସେମାନଙ୍କୁ ବିମାନବନ୍ଦରରେ ଥିବା ମେଡିକାଲ ସେଣ୍ଟରକୁ ନିଆଯାଇଥିଲା ।

ଏୟାର ଇଣ୍ଡିଆର ଗ୍ରାଉଣ୍ଡ ଟିମ୍ ଏବଂ ଡାକ୍ତରୀ ଦଳ ପ୍ରଭାବିତ ଯାତ୍ରୀମାନଙ୍କୁ ସମସ୍ତ ପ୍ରକାର ସହାୟତା ଯୋଗାଇ ଦେଉଛନ୍ତି ।

ତଦନ୍ତରେ ସହଯୋଗ କରୁଛି ଏୟାର ଇଣ୍ଡିଆ

ଏୟାର ଇଣ୍ଡିଆର ପ୍ରବକ୍ତା କହିଛନ୍ତି ଯେ, ଯାତ୍ରୀ ଓ କର୍ମଚାରୀଙ୍କ ସୁରକ୍ଷା ସେମାନଙ୍କ ପାଇଁ ସର୍ବୋଚ୍ଚ ପ୍ରାଥମିକତା । ଏହି ଘଟଣାର ତଦନ୍ତ ପାଇଁ ସମ୍ପୃକ୍ତ ବିମାନ ଚଳାଚଳ କର୍ତ୍ତୃପକ୍ଷଙ୍କୁ କମ୍ପାନୀ ସମ୍ପୂର୍ଣ୍ଣ ସହଯୋଗ କରୁଛି । ତେବେ ବିମାନରେ କେତେ ଜଣ ଯାତ୍ରୀ ଆହାତ ହୋଇଛନ୍ତି, ସେ ନେଇ ଏୟାର ଇଣ୍ଡିଆ ପକ୍ଷରୁ କୌଣସି ସ୍ପଷ୍ଟ ସଂଖ୍ୟା ପ୍ରକାଶ କରାଯାଇ ନାହିଁ ।