ମମତାଙ୍କ ସପକ୍ଷରେ ବାଂଲାଦେଶୀ ନେତାଙ୍କ ଉତ୍ତେଜନାପୂର୍ଣ୍ଣ ବୟାନ; ଦିଲ୍ଲୀ ବିରୋଧରେ ଯୁଦ୍ଧ ପାଇଁ ଉସୁକାଇଲେ ନୁରୁଲ ହୁଦା।
ପଶ୍ଚିମବଙ୍ଗ: ରାଜନୀତିରେ ଏବେ ଏକ ବଡ଼ ଧରଣର ପରିବର୍ତ୍ତନ ଦେଖିବାକୁ ମିଳିଛି। ୨୦୨୬ ବିଧାନସଭା ନିର୍ବାଚନର ଫଳାଫଳ ଅନୁଯାୟୀ, ଭାରତୀୟ ଜନତା ପାର୍ଟି (BJP) ରାଜ୍ୟରେ ଏକ ବିପୁଳ ବିଜୟ ହାସଲ କରିଛି, ଯାହାକୁ ଅନେକ “ସୁନାମି” ବୋଲି ଅଭିହିତ କରୁଛନ୍ତି।
୨୯୪ଟି ଆସନ ବିଶିଷ୍ଟ ପଶ୍ଚିମବଙ୍ଗ ବିଧାନସଭାରେ ବିଜେପି ୨୦୬ରୁ ଅଧିକ ଆସନ ଜିତି ସଂଖ୍ୟାଗରିଷ୍ଠତା ହାସଲ କରିଛି।ଏହି ପରାଜୟ ପରେ ମଧ୍ୟ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିଜ ପଦରୁ ଇସ୍ତଫା ଦେବାକୁ ମନା କରିଛନ୍ତି। ସେ ଅଭିଯୋଗ କରିଛନ୍ତି ଯେ ଏହି ଜନାଦେଶ ପ୍ରକୃତ ନୁହେଁ ଏବଂ ନିର୍ବାଚନରେ ବ୍ୟାପକ ହେରଫେର୍ କରାଯାଇଛି। ସେ ବିଜେପି ଉପରେ ପ୍ରାୟ ୧୦୦ଟି ଆସନ “ଚୋରି” କରିଥିବାର ଅଭିଯୋଗ ଆଣିବା ସହ ନିର୍ବାଚନ କମିଶନଙ୍କ ଭୂମିକାକୁ ମଧ୍ୟ ସମାଲୋଚନା କରିଛନ୍ତି।
ବାଂଲାଦେଶୀ ନେତା ମହମ୍ମଦ ନୁରୁଲ ହୁଦାଙ୍କ କଥିତ ବିବୃତି ଉତ୍ତେଜନା ସୃଷ୍ଟି କରିଛି। ସେ ମମତା ବାନାର୍ଜୀଙ୍କୁ ପଶ୍ଚିମବଙ୍ଗକୁ “ସ୍ୱାଧୀନ” ଘୋଷଣା କରିବାକୁ ଏବଂ ଦିଲ୍ଲୀ ବିରୋଧରେ ଯୁଦ୍ଧ କରିବାକୁ ଉସୁକାଇଛନ୍ତି, ଯାହା ଭାରତର ସାର୍ବଭୌମତ୍ୱ ପ୍ରତି ଏକ ଗମ୍ଭୀର ଚେତାବନୀ। ଜମାତ୍-ଏ-ଇସଲାମି ହିନ୍ଦ୍ର ଉପାଧ୍ୟକ୍ଷ ମହମ୍ମଦ ସଲିମ ଇଞ୍ଜିନିୟର ମଧ୍ୟ ନିର୍ବାଚନ ପ୍ରକ୍ରିୟା ଉପରେ ପ୍ରଶ୍ନ ଉଠାଇଛନ୍ତି। ତାଙ୍କ ମତରେ, ଏହି ଫଳାଫଳ ଜନସାଧାରଣଙ୍କ ପ୍ରକୃତ ମତାମତକୁ ପ୍ରତିଫଳିତ କରୁନାହିଁ।
ଗଣତାନ୍ତ୍ରିକ ପ୍ରକ୍ରିୟାରେ ନିର୍ବାଚନ ଫଳାଫଳ ପରେ ସରକାର ଗଠନ ପାଇଁ ସାମ୍ବିଧାନିକ ବ୍ୟବସ୍ଥା ରହିଛି। ମମତା ବାନାର୍ଜୀଙ୍କ ଇସ୍ତଫା ନ ଦେବା ଜିଦ୍ ଏବଂ ବାହ୍ୟ ଶକ୍ତିଙ୍କ ଉତ୍ତେଜନାପୂର୍ଣ୍ଣ ବୟାନ ରାଜ୍ୟରେ ଏକ ଆଇନଗତ ଏବଂ ସାମ୍ବିଧାନିକ ସଙ୍କଟ ସୃଷ୍ଟି କରିବାର ଆଶଙ୍କା ରହିଛି।ଏହି ସମ୍ବେଦନଶୀଳ ପରିସ୍ଥିତିରେ ପ୍ରଶାସନ ଏବଂ କେନ୍ଦ୍ର ସରକାରଙ୍କ ପରବର୍ତ୍ତୀ ପଦକ୍ଷେପ ବେଶ୍ ଗୁରୁତ୍ୱପୂର୍ଣ୍ଣ ହେବ।