ନୂଆଦିଲ୍ଲୀ: ଦେଶର ଦୁଇ ପ୍ରମୁଖ ରାଷ୍ଟ୍ରାୟତ୍ତ କମ୍ପାନି—Bharat Heavy Electricals Limited (ଭେଲ୍) ଏବଂ Steel Authority of India Limited (ସେଲ୍)—ଙ୍କ ମହାରତ୍ନ ମାନ୍ୟତା ଏବେ ସମୀକ୍ଷା ଅଧୀନରେ ଥିବା ଚର୍ଚ୍ଚା ଜୋର ଧରିଛି। ଖରାପ ଆର୍ଥିକ ପ୍ରଦର୍ଶନରେ ସୁଧାର ଆଣିବା ପାଇଁ ଉଭୟ କମ୍ପାନିକୁ ଏକ ବର୍ଷ ସମୟ ଦିଆଯାଇଥିବା ସୂଚନା ମିଳିଛି।
ସୂଚନା ଅନୁଯାୟୀ, ମହାରତ୍ନ ମାନ୍ୟତା ଜାରି ରଖିବା ପାଇଁ ରହିଥିବା ମୁଖ୍ୟ ସର୍ତ୍ତମାନଙ୍କ ମଧ୍ୟରୁ ବାର୍ଷିକ ଟିକସ ପରବର୍ତ୍ତୀ ଲାଭ (PAT) କମ୍ରେ କମ୍ ୫ ହଜାର କୋଟି ଟଙ୍କା ହେବା ଆବଶ୍ୟକ। କୁହାଯାଉଛି ଯେ, ଗତ ତିନି ବର୍ଷ ଧରି ଏହି ଲକ୍ଷ୍ୟ ହାସଲ କରିବାରେ ଉଭୟ କମ୍ପାନି ବିଫଳ ହୋଇଛନ୍ତି।
ମହାରତ୍ନ ମାନ୍ୟତା ପାଇଁ କେବଳ ଲାଭ ନୁହେଁ, ବରଂ ବାର୍ଷିକ କାରବାର ୨୫ ହଜାର କୋଟି ଟଙ୍କାରୁ ଅଧିକ, ନିଟ୍ ସମ୍ପତ୍ତି ୧୫ ହଜାର କୋଟି ଟଙ୍କାରୁ ଅଧିକ ଏବଂ ବିଶ୍ୱସ୍ତରୀୟ ପ୍ରତିଷ୍ଠା ଭଳି ଅନ୍ୟ ସର୍ତ୍ତ ମଧ୍ୟ ରହିଛି। ଅନ୍ୟ ସୂଚକରେ ଭଲ ସ୍ଥିତିରେ ଥିଲେ ମଧ୍ୟ ଲାଭ କ୍ଷେତ୍ରରେ ପଛରେ ପଡ଼ିବା ଉଦ୍ବେଗର କାରଣ ହୋଇଛି।
ଯଦି ଭବିଷ୍ୟତରେ ମହାରତ୍ନ ମାନ୍ୟତା ପ୍ରତ୍ୟାହାର ହୁଏ, ତେବେ ଏହି କମ୍ପାନିଗୁଡ଼ିକ ନବରତ୍ନ ବର୍ଗକୁ ଯାଇପାରନ୍ତି। ଏହା ହେଲେ ସେମାନଙ୍କ ନିବେଶ କ୍ଷମତା ଉପରେ ପ୍ରଭାବ ପଡ଼ିବ। ବର୍ତ୍ତମାନ ମହାରତ୍ନ କମ୍ପାନିମାନେ ସରକାରୀ ଅନୁମତି ବିନା ୫ ହଜାର କୋଟି ଟଙ୍କା ପର୍ଯ୍ୟନ୍ତ ନିବେଶ କରିପାରନ୍ତି, ଯେଉଁଠାରେ ନବରତ୍ନ କମ୍ପାନିଙ୍କ ପାଇଁ ଏହି ସୀମା ୧ ହଜାର କୋଟି ଟଙ୍କା।
ଦେଶରେ ବର୍ତ୍ତମାନ ମୋଟ ୧୪ଟି ମହାରତ୍ନ କମ୍ପାନି କାର୍ଯ୍ୟରତ ଅଛି।