ଡେରାଡୁନ: ଉତ୍ତରାଖଣ୍ଡରେ ଲଗାତାର ପ୍ରବଳ ବର୍ଷା, ଭୂସ୍ଖଳନ ଏବଂ ରାସ୍ତା ଅବରୋଧକୁ ଦୃଷ୍ଟିରେ ରଖି ପ୍ରଶାସନ ମଙ୍ଗଳବାର ଓ ବୁଧବାର ପାଇଁ ଚାରିଧାମ ଯାତ୍ରାକୁ ଅସ୍ଥାୟୀ ଭାବେ ସ୍ଥଗିତ କରିଛି। ତୀର୍ଥଯାତ୍ରୀଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଏବଂ ଯମୁନୋତ୍ରୀ ଯାତ୍ରା ଦୁଇ ଦିନ ପାଇଁ ବନ୍ଦ ରଖାଯାଇଛି।
ରାଜ୍ୟର ବିଭିନ୍ନ ପାହାଡ଼ିଆ ଅଞ୍ଚଳରେ ଅବିରତ ବର୍ଷା ଯୋଗୁଁ ଭୂସ୍ଖଳନ, ପଥର ଖସିବା ଏବଂ ଅନେକ ପ୍ରମୁଖ ସଡ଼କ ଅବରୋଧ ହୋଇଛି। ଏହି ପରିସ୍ଥିତିରେ ଗଡ଼ୱାଲ ଡିଭିଜନର କମିସନର କହିଛନ୍ତି ଯେ, ପାଗ ସ୍ୱାଭାବିକ ହେବା ସହ ସମସ୍ତ ଯାତ୍ରାପଥକୁ ସୁରକ୍ଷିତ ଘୋଷଣା କରାଯିବା ପରେ ହିଁ ଚାରିଧାମ ଯାତ୍ରା ପୁଣି ଆରମ୍ଭ କରାଯିବ।
ବନ୍ୟା ଓ ଭୂସ୍ଖଳନ ନେଇ ସତର୍କତା
କେନ୍ଦ୍ରୀୟ ଜଳ ଆୟୋଗ (CWC) ଉତ୍ତରାଖଣ୍ଡ, ହିମାଚଳ ପ୍ରଦେଶ, ଜମ୍ମୁ-କାଶ୍ମୀର ଏବଂ ଲଦାଖର କିଛି ଅଞ୍ଚଳରେ ମଧ୍ୟମ ଧରଣର ବନ୍ୟା ବିପଦ ସମ୍ଭାବନା ନେଇ ସତର୍କବାଣୀ ଜାରି କରିଛି। ସେହିପରି ପାଣିପାଗ ବିଭାଗ ଆସନ୍ତା କିଛି ଘଣ୍ଟାରେ ପ୍ରବଳ ବର୍ଷା ଜାରି ରହିବ ବୋଲି ପୂର୍ବାନୁମାନ କରିଛି। ୨୯ ଜୁଲାଇ ୨୦୨୬ ସକାଳ ୫ଟା ୩୦ ମିନିଟ୍ ପର୍ଯ୍ୟନ୍ତ ୨୪ ଘଣ୍ଟିଆ ବନ୍ୟା ପୂର୍ବାନୁମାନ ମଧ୍ୟ ଜାରି କରାଯାଇଛି।
ଅନେକ ଜିଲ୍ଲାରେ ଅରେଞ୍ଜ ଆଲର୍ଟ
ପାଣିପାଗ ବିଭାଗ ଉତ୍ତରାଖଣ୍ଡର ଆଲମୋରା, ବାଗେଶ୍ୱର, ଚାମୋଲି, ଡେରାଡୁନ, ପୌଡ଼ି ଗଡ଼ୱାଲ, ତେହରୀ ଗଡ଼ୱାଲ, ନୈନିତାଲ, ପିଥୋରାଗଡ଼, ରୁଦ୍ରପ୍ରୟାଗ ଓ ଉତ୍ତରକାଶୀ ଜିଲ୍ଲା ପାଇଁ ଅରେଞ୍ଜ ଆଲର୍ଟ ଜାରି କରିଛି। ଏହାଛଡ଼ା ଜମ୍ମୁ-କାଶ୍ମୀରର ଡୋଡା, କିସ୍ତୱାଡ଼, ଉଧମପୁର, ସାମ୍ବା ଏବଂ ହିମାଚଳ ପ୍ରଦେଶର ଚମ୍ବା, କାଙ୍ଗଡା, କୁଲୁ, ମଣ୍ଡି, ଶିମଲା, ସିରମୌର ଓ ସୋଲାନ୍ ଜିଲ୍ଲାରେ ମଧ୍ୟ ସତର୍କତା ଜାରି ହୋଇଛି। ପ୍ରବଳ ବର୍ଷା ସହ ବଜ୍ରପାତ ଏବଂ ଭୂସ୍ଖଳନର ଆଶଙ୍କା ଥିବାରୁ ଲୋକଙ୍କୁ ସତର୍କ ରହିବାକୁ କୁହାଯାଇଛି।
ଯାତ୍ରୀଙ୍କ ପାଇଁ ପ୍ରଶାସନର ପରାମର୍ଶ
ପ୍ରଶାସନ ସ୍ଥାନୀୟ ବାସିନ୍ଦା, ପର୍ଯ୍ୟଟକ ଓ ତୀର୍ଥଯାତ୍ରୀଙ୍କୁ ନଦୀ, ଝରଣା ଏବଂ ଭୂସ୍ଖଳନ ପ୍ରବଣ ଅଞ୍ଚଳଠାରୁ ଦୂରେ ରହିବାକୁ ଅନୁରୋଧ କରିଛି। ଜରୁରୀ ଆବଶ୍ୟକତା ନଥିଲେ ପାହାଡ଼ିଆ ଅଞ୍ଚଳକୁ ଯାତ୍ରା ନ କରିବା, ଜିଲ୍ଲା ପ୍ରଶାସନ ଓ ପାଣିପାଗ ବିଭାଗର ସରକାରୀ ପରାମର୍ଶ ପାଳନ କରିବା ସହ ଗୁଜବ ଉପରେ ବିଶ୍ୱାସ ନ କରିବାକୁ ମଧ୍ୟ ଅପିଲ କରାଯାଇଛି।
ସେତୁ କ୍ଷତିଗ୍ରସ୍ତ, ସ୍କୁଲ ବନ୍ଦ
ଲଗାତାର ବର୍ଷାରେ ଡେରାଡୁନର ପ୍ରେମନଗର ଅଞ୍ଚଳର ନନ୍ଦା କି ଚୌକି ନିକଟରେ ଟାନ୍ସ ନଦୀ ଉପରେ ନିର୍ମିତ ନୂତନ ସେତୁ କ୍ଷତିଗ୍ରସ୍ତ ହୋଇଥିବାରୁ ଡେରାଡୁନ, ବିକାଶନଗର ଓ ପଡ଼ୋଶୀ ହିମାଚଳ ପ୍ରଦେଶ ମଧ୍ୟରେ ଯାତାୟାତ ବାଧାପ୍ରାପ୍ତ ହୋଇଛି। ପ୍ରବଳ ବର୍ଷାକୁ ଦୃଷ୍ଟିରେ ରଖି ପ୍ରଭାବିତ ଜିଲ୍ଲାଗୁଡ଼ିକରେ ମଙ୍ଗଳବାର ସମସ୍ତ ସ୍କୁଲ ଏବଂ ଅଙ୍ଗନୱାଡ଼ି କେନ୍ଦ୍ର ବନ୍ଦ ରଖିବାକୁ ମଧ୍ୟ ପ୍ରଶାସନ ନିର୍ଦ୍ଦେଶ ଦେଇଛି।