Delhi Protest: ସ୍ୱାଭାବିକ ହେଲା ଦିଲ୍ଲୀ; ଖୋଲିଲା ସମସ୍ତ ମେଟ୍ରୋ ଷ୍ଟେସନ, ଜନ୍ତରମନ୍ତରରେ ପୁନଃ ଚାଲୁ ହେଲା ଇଣ୍ଟରନେଟ୍ ସେବା
ନୂଆଦିଲ୍ଲୀ: କକ୍ରୋଚ୍ ଜନତା ପାର୍ଟି (CJP) ନେତୃତ୍ୱରେ ଜନ୍ତରମନ୍ତରରେ ଚାଲିଥିବା ଛାତ୍ର ଆନ୍ଦୋଳନ ଶେଷ ହେବା ପରେ ଜାତୀୟ ରାଜଧାନୀ ଦିଲ୍ଲୀର ପରିସ୍ଥିତି ଧୀରେ ଧୀରେ ସ୍ୱାଭାବିକ ହୋଇଛି। ଆନ୍ଦୋଳନ ପ୍ରତ୍ୟାହାର ଘୋଷଣା ପରେ ବନ୍ଦ ଥିବା ସମସ୍ତ ଦିଲ୍ଲୀ ମେଟ୍ରୋ ଷ୍ଟେସନ ପୁଣିଥରେ ସାଧାରଣ ଯାତ୍ରୀଙ୍କ ପାଇଁ ଖୋଲି ଦିଆଯାଇଛି। ଏହା ସହିତ ଜନ୍ତରମନ୍ତର ଅଞ୍ଚଳରେ ବନ୍ଦ ଥିବା ମୋବାଇଲ୍ ଇଣ୍ଟରନେଟ୍ ସେବା ମଧ୍ୟ ପୁନଃସ୍ଥାପିତ କରାଯାଇଛି।
ଜୁଲାଇ ୨୦ର ‘ସଂସଦ ଚଲୋ’ ଅଭିଯାନ ପରେ ଦିଲ୍ଲୀରେ ଛାତ୍ର ପ୍ରତିବାଦ ତୀବ୍ର ରୂପ ନେଇଥିଲା। ପ୍ରତିବାଦ ସ୍ଥଳକୁ ବିଭିନ୍ନ ରାଜ୍ୟରୁ ଛାତ୍ରଛାତ୍ରୀଙ୍କ ବ୍ୟାପକ ସମାଗମ ହେବା ସହ ପୁଲିସ କାର୍ଯ୍ୟାନୁଷ୍ଠାନକୁ ନେଇ ଅସନ୍ତୋଷ ବଢ଼ିବା ପରେ ସୁରକ୍ଷା ଦୃଷ୍ଟିରୁ ଅନେକ ମେଟ୍ରୋ ଷ୍ଟେସନ ବନ୍ଦ କରାଯାଇଥିଲା।
ଆନ୍ଦୋଳନ ସମୟରେ ଜନପଥ ମେଟ୍ରୋ ଷ୍ଟେସନ ଏବଂ ଟଲଷ୍ଟୟ ମାର୍ଗ ଅଞ୍ଚଳରେ ପ୍ରତିବାଦ ସ୍ଥଳକୁ ଯିବା ପାଇଁ ଲୋକଙ୍କ ଲମ୍ବା ଧାଡ଼ି ଦେଖିବାକୁ ମିଳିଥିଲା। ଅନେକ ଲୋକଙ୍କୁ ୫୦ରୁ ୧୦୦ ମିନିଟ୍ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିଥିଲା।
ଛାତ୍ର ଆନ୍ଦୋଳନକୁ ସମର୍ଥନ କରି ବିଭିନ୍ନ ରାଜ୍ୟରୁ ଓକିଲ, କୃଷକ ସଂଗଠନ, ସ୍ୱେଚ୍ଛାସେବୀ ସଂସ୍ଥା (NGO) ଏବଂ ଅନ୍ୟାନ୍ୟ ସାମାଜିକ ଗୋଷ୍ଠୀର ପ୍ରତିନିଧିମାନେ ବ୍ୟାନର ଓ ପ୍ଲାକାର୍ଡ ଧରି ଜନ୍ତରମନ୍ତରରେ ପହଞ୍ଚୁଥିବାରୁ ପ୍ରଶାସନ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଥିଲା। ଶୁକ୍ରବାର ୧୭ଟି ଏବଂ ଶନିବାର ଅପରାହ୍ଣ ପର୍ଯ୍ୟନ୍ତ ୧୮ଟି ମେଟ୍ରୋ ଷ୍ଟେସନରେ ସେବା ବନ୍ଦ ରହିଥିଲା।
ତେବେ CJP ପକ୍ଷରୁ ଆନ୍ଦୋଳନ ସ୍ଥଗିତ ଘୋଷଣା ପରେ ପରିସ୍ଥିତି ସ୍ୱାଭାବିକ ହେବା ଆରମ୍ଭ କରିଛି। ଦିଲ୍ଲୀ ମେଟ୍ରୋ ସେବା ପୂର୍ବଭଳି ଚାଲୁ ହୋଇଥିବା ବେଳେ ଜନ୍ତରମନ୍ତର ଅଞ୍ଚଳରେ ଇଣ୍ଟରନେଟ୍ ସେବା ମଧ୍ୟ ପୁନର୍ବାର ଉପଲବ୍ଧ ହୋଇଛି। ଏହା ଫଳରେ ରାଜଧାନୀର ଜନଜୀବନ ଓ ଯାତାୟାତ ବ୍ୟବସ୍ଥା ଧୀରେ ଧୀରେ ସାଧାରଣ ଅବସ୍ଥାକୁ ଫେରୁଥିବା ଦେଖାଯାଉଛି।