ଜୟପୁର/କୋଟା: ରାଜସ୍ଥାନର ସରକାରୀ ହସ୍ପିଟାଲଗୁଡ଼ିକରେ ବ୍ୟବହୃତ ଅକ୍ସିଟୋସିନ୍ ଇଞ୍ଜେକ୍ସନ ନକଲି ବୋଲି ପ୍ରମାଣିତ ହେବା ପରେ ସ୍ୱାସ୍ଥ୍ୟ ବ୍ୟବସ୍ଥାକୁ ନେଇ ଗଭୀର ପ୍ରଶ୍ନ ଉଠିଛି। କୋଟାର ନ୍ୟୁ ମେଡିକାଲ କଲେଜ ହସ୍ପିଟାଲରେ ଏହି ଇଞ୍ଜେକ୍ସନ ନେବା ପରେ ୫ ଜଣ ପ୍ରସୂତି ମହିଳାଙ୍କ ମୃତ୍ୟୁ ହୋଇଥିବା ଅଭିଯୋଗ ଆସିଛି।
ପ୍ରସବ ପରେ ଅତ୍ୟଧିକ ରକ୍ତସ୍ରାବ ନିୟନ୍ତ୍ରଣ ପାଇଁ ସାଧାରଣତଃ ଅକ୍ସିଟୋସିନ୍ ଇଞ୍ଜେକ୍ସନ ବ୍ୟବହାର କରାଯାଏ। କିନ୍ତୁ ଲ୍ୟାବ୍ ପରୀକ୍ଷାରେ ଜଣାପଡ଼ିଛି ଯେ, ସମ୍ପୃକ୍ତ ଇଞ୍ଜେକ୍ସନରେ ରକ୍ତ ଜମାଟ ବାନ୍ଧିବା ପାଇଁ ଆବଶ୍ୟକ ମୁଖ୍ୟ ଉପାଦାନ ଥିଲା ନାହିଁ। ଏହି ଘଟଣା ସାମ୍ନାକୁ ଆସିବା ପରେ ରାଜ୍ୟ ଔଷଧ ନିୟନ୍ତ୍ରଣ ବିଭାଗ ତୁରନ୍ତ ଏହି ଔଷଧର ବିକ୍ରି ଓ ବ୍ୟବହାର ଉପରେ ପ୍ରତିବନ୍ଧକ ଲଗାଇବା ସହ ସମସ୍ତ ଷ୍ଟକ୍ ଜବତ କରିବାକୁ ନିର୍ଦ୍ଦେଶ ଦେଇଛି।
ଇଞ୍ଜେକ୍ସନ ପରେ ଦେଖାଦେଲା ଗୁରୁତର ସମସ୍ୟା
ସୂଚନା ଅନୁଯାୟୀ, ଅମୃତସରସ୍ଥିତ Jackson Laboratories ଦ୍ୱାରା ପ୍ରସ୍ତୁତ ଏହି ଅକ୍ସିଟୋସିନ୍ ଇଞ୍ଜେକ୍ସନ ନେବାର ୮ରୁ ୧୨ ଘଣ୍ଟା ମଧ୍ୟରେ ପ୍ରସୂତି ମହିଳାମାନଙ୍କର ରକ୍ତଚାପ ଓ ପ୍ଲେଟଲେଟ୍ ସଂଖ୍ୟା ହଠାତ୍ କମିଯାଇଥିଲା। ସେଥିସହ କିଡନୀ ବିଫଳ ହେବା ଭଳି ଗୁରୁତର ସମସ୍ୟା ମଧ୍ୟ ଦେଖାଦେଇଥିଲା, ଯାହା ଶେଷରେ ପ୍ରାଣହାନିର କାରଣ ହୋଇଥିବା ଅଭିଯୋଗ ହେଉଛି।
ଉଚ୍ଚସ୍ତରୀୟ ତଦନ୍ତ ଆରମ୍ଭ
ଘଟଣାର ତଦନ୍ତ ପାଇଁ ଜୟପୁରସ୍ଥିତ SMS Medical Collegeର ଏକ ବିଶେଷଜ୍ଞ ଟିମ୍ କୋଟାରେ ପହଞ୍ଚିଛି। ଏପଟେ ରାଜ୍ୟ ସ୍ୱାସ୍ଥ୍ୟ ବିଭାଗ ମାମଲା ସହ ସଂପୃକ୍ତ କିଛି ଚିକିତ୍ସା କର୍ମଚାରୀଙ୍କୁ ନିଲମ୍ବିତ କରିଛି।
ଏହି ଘଟଣା ମଧ୍ୟରେ ରାଜ୍ୟରେ ନକଲି ଓ ନିମ୍ନମାନର ଔଷଧ ବିରୋଧରେ ଚାଲୁଥିବା ଅଭିଯାନ ସମୟରେ ଗତ ୧୦ ଦିନରେ ଜ୍ୱର, ଆଲର୍ଜି, ଗ୍ୟାସ୍ ଓ ଆଣ୍ଟିବାୟୋଟିକ୍ ସମେତ ୧୧ଟି ଔଷଧ ଗୁଣବତ୍ତା ପରୀକ୍ଷାରେ ଫେଲ୍ ହୋଇଥିବା ସୂଚନା ମିଳିଛି। ଏହି ଔଷଧଗୁଡ଼ିକ ବିଭିନ୍ନ ରାଜ୍ୟର ଔଷଧ କମ୍ପାନୀ ଦ୍ୱାରା ଯୋଗାଣ କରାଯାଇଥିବା କୁହାଯାଉଛି।