ନୂଆଦିଲ୍ଲୀ: ଭାରତୀୟ ନାଗରିକଙ୍କ ପାଇଁ ଏକ ବଡ଼ ଏବଂ ଆଶ୍ୱସ୍ତିକର ଖବର ସାମ୍ନାକୁ ଆସିଛି। ଏଣିକି ଜର୍ମାନୀ ବିମାନବନ୍ଦର ଦେଇ ଅନ୍ୟ ଦେଶକୁ ଯାତ୍ରା କରୁଥିବା ଭାରତୀୟ ନାଗରିକମାନଙ୍କୁ ଆଉ ‘ଏୟାରପୋର୍ଟ ଟ୍ରାଞ୍ଜିଟ୍ ଭିସା’ (Airport Transit Visa) ର ଆବଶ୍ୟକତା ପଡ଼ିବ ନାହିଁ। ଜର୍ମାନୀ ସରକାରଙ୍କ ଏହି ନିଷ୍ପତ୍ତିକୁ ଭାରତ ସରକାର ସ୍ୱାଗତ କରିଛନ୍ତି।
ବୈଦେଶିକ ବ୍ୟାପାର ମନ୍ତ୍ରାଳୟ (MEA) ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଏହି ସୂଚନା ଦେଇ କହିଛି ଯେ, ଜୁନ୍ ୩, ୨୦୨୬ ରୁ କେବଳ ବିମାନ ଯାତ୍ରା ମାଧ୍ୟମରେ ଜର୍ମାନୀ ଦେଇ ଯାଉଥିବା ଭାରତୀୟଙ୍କ ପାଇଁ ଟ୍ରାଞ୍ଜିଟ୍ ଭିସା ବ୍ୟବସ୍ଥାକୁ ଉଚ୍ଛେଦ କରାଯାଇଛି। ଏହି ନୂତନ ବ୍ୟବସ୍ଥା ଦ୍ୱାରା ଦୁଇ ଦେଶ ମଧ୍ୟରେ ଜନସମ୍ପର୍କ ଏବଂ ବ୍ୟବସାୟିକ ସମ୍ପର୍କ ଆହୁରି ମଜବୁତ ହେବ।
ମନ୍ତ୍ରାଳୟ ଅନୁଯାୟୀ, ଚଳିତ ବର୍ଷ ଜାନୁଆରୀରେ ଜର୍ମାନୀ ଚାନ୍ସେଲର ଫ୍ରେଡରିକ୍ ମର୍ଜ ଭାରତ ଗସ୍ତରେ ଆସିଥିବା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଏହି ବିଷୟରେ ଆଲୋଚନା କରିଥିଲେ। ସେହି ଆଲୋଚନାର ସଫଳ ପରିଣାମ ସ୍ୱରୂପ ଜର୍ମାନୀ ସରକାର ଏହି ନିଷ୍ପତ୍ତି ନେଇଛନ୍ତି। ନୂଆଦିଲ୍ଲୀସ୍ଥିତ ଜର୍ମାନୀ ଦୂତାବାସ ପକ୍ଷରୁ କୁହାଯାଇଛି ଯେ, ଜୁନ୍ ୨ ରେ ଏହି ସମ୍ପର୍କିତ ବିଜ୍ଞପ୍ତି ଫେଡେରାଲ୍ ଲ’ ଗେଜେଟ୍ରେ ପ୍ରକାଶ ପାଇଛି ଏବଂ ଜୁନ୍ ୩ ରୁ ଏହା କାର୍ଯ୍ୟକାରୀ ହୋଇଛି। ଏହା ଭାରତ-ଜର୍ମାନୀ ମଧ୍ୟରେ ଅର୍ଥନୈତିକ ଏବଂ ରଣନୀତିକ ସମ୍ପର୍କକୁ ଅଧିକ ଦୃଢ଼ କରିବ।
ସୂଚନାଯୋଗ୍ୟ ଯେ, ଗତ କିଛି ବର୍ଷ ମଧ୍ୟରେ ଭାରତ ଏବଂ ଜର୍ମାନୀ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ରେକର୍ଡ ସ୍ତରରେ ପହଞ୍ଚିଛି। ଚାନ୍ସେଲର ମର୍ଜଙ୍କ ଭାରତ ଗସ୍ତ ସମୟରେ ଉଭୟ ଦେଶ ମଧ୍ୟରେ ବାଣିଜ୍ୟ, ପ୍ରଯୁକ୍ତିବିଦ୍ୟା, ସ୍ୱାସ୍ଥ୍ୟ ଏବଂ ଅକ୍ଷୟ ଶକ୍ତି ସମେତ ବିଭିନ୍ନ କ୍ଷେତ୍ରରେ ୧୯ଟି ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହୋଇଥିଲା।