ନୂଆଦିଲ୍ଲୀ: ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହଠାତ୍ ବୃଦ୍ଧି ପାଇବା ପରେ ଆମେରିକୀୟ ଡଲାର ତୁଳନାରେ ଭାରତୀୟ ଟଙ୍କା ଐତିହାସିକ ଭାବେ ଦୁର୍ବଳ ହୋଇଛି। ଶୁକ୍ରବାର ମୁଦ୍ରା ବିନିମୟ ବଜାରରେ ଡଲାର ମୂଲ୍ୟ ୯୬ ଟଙ୍କା ୫ ପଇସାକୁ ପହଞ୍ଚିଥିବାବେଳେ ପ୍ରଥମଥର ପାଇଁ ଟଙ୍କା ୯୬ ସ୍ତର ଅତିକ୍ରମ କରିଛି।
ବିଶେଷଜ୍ଞମାନଙ୍କ କହିବା ଅନୁଯାୟୀ, ଅଶୋଧିତ ତୈଳ ଦର ବ୍ୟାରେଲ ପିଛା ୧୧୦ ଡଲାରରୁ ଅଧିକ ହେବାରୁ ଡଲାର ଚାହିଦା ବେପରୁଆ ଭାବେ ବଢ଼ିଛି। ଭାରତ ତେଲ, ସାର ଓ ଖାଦ୍ୟତେଲ ଭଳି ଅତ୍ୟାବଶ୍ୟକ ସାମଗ୍ରୀ ଆମଦାନି ପାଇଁ ବହୁ ପରିମାଣରେ ଡଲାର ବ୍ୟବହାର କରୁଥିବାରୁ ବଜାରରେ ଡଲାର ଉପରେ ଚାପ ବଢ଼ିଛି।
ଚଳିତ ବର୍ଷରେ ଡଲାର ତୁଳନାରେ ଟଙ୍କା ୬ ପ୍ରତିଶତରୁ ଅଧିକ ଦୁର୍ବଳ ହୋଇସାରିଛି। ଏସିଆର ଅନ୍ୟାନ୍ୟ ଦେଶ ତୁଳନାରେ ଭାରତୀୟ ମୁଦ୍ରାର ପ୍ରଦର୍ଶନ ସବୁଠାରୁ ଦୁର୍ବଳ ଥିବା ବଜାର ବିଶ୍ଳେଷକମାନେ କହିଛନ୍ତି।
ବ୍ୟବସାୟୀମାନଙ୍କ ଅନୁସାରେ, ତୈଳ ଦର ବୃଦ୍ଧି ପାଇଲେ ଆମଦାନିକାରୀମାନେ ବହୁ ପରିମାଣରେ ଡଲାର କ୍ରୟ କରନ୍ତି। ଏଥିରୁ ଡଲାର ମୂଲ୍ୟ ଆହୁରି ବଢ଼ିଥାଏ ଓ ଟଙ୍କା ଦୁର୍ବଳ ହୋଇପଡ଼େ।
ଏହି ପରିସ୍ଥିତିରେ ଭାରତୀୟ ରିଜର୍ଭ ବ୍ୟାଙ୍କର ବୈଦେଶିକ ମୁଦ୍ରା ଭଣ୍ଡାର ଉପରେ ମଧ୍ୟ ଚାପ ସୃଷ୍ଟି ହୋଇଛି। ଟଙ୍କାକୁ ସ୍ଥିର ରଖିବା ପାଇଁ ରିଜର୍ଭ ବ୍ୟାଙ୍କ ବଜାରରେ ଡଲାର ବିକ୍ରି କରୁଥିବାରୁ ବୈଦେଶିକ ମୁଦ୍ରା ଭଣ୍ଡାର କ୍ରମେ କମିବାରେ ଲାଗିଛି।
ଅନ୍ୟପଟେ, ବିଦେଶୀ ନିବେଶକମାନେ ଭାରତୀୟ ଇକ୍ବିଟି ବଜାରରୁ ଲଗାତାର ପୁଞ୍ଜି ପ୍ରତ୍ୟାହାର କରୁଛନ୍ତି। ନୂତନ ବିଦେଶୀ ମୁଦ୍ରା ପ୍ରବାହ କମିବା ସହିତ ବର୍ତ୍ତମାନ ଥିବା ଡଲାର ମଜୁତ ହ୍ରାସ ପାଉଥିବାରୁ ଦେଶର ଅର୍ଥନୀତି ଉପରେ ଚିନ୍ତା ବଢ଼ିଛି।
ଅର୍ଥନୀତିବିଦ୍ମାନଙ୍କ ମତରେ, ଡଲାର ମହଙ୍ଗା ହେବାର ପ୍ରଭାବରେ ଦେଶରେ ମହଙ୍ଗାଇ ବୃଦ୍ଧି ପାଇପାରେ। ବିଦେଶ ଭ୍ରମଣ, ବିଦେଶରେ ପାଠପଢ଼ା ଓ ଆମଦାନି ହେଉଥିବା ସାମଗ୍ରୀର ଦର ବଢ଼ିବାର ଆଶଙ୍କା ରହିଛି। ତେବେ ରପ୍ତାନିକାରୀ ଓ ବିଦେଶରୁ ଭାରତକୁ ଅର୍ଥ ପଠାଉଥିବା ଲୋକମାନେ ଏଥିରୁ କିଛି ଲାଭ ପାଇପାରନ୍ତି।