ମୁମ୍ବାଇ: ମହାରାଷ୍ଟ୍ର ବିଧାନ ପରିଷଦ ନିର୍ବାଚନରେ ବିଜେପି ନେତୃତ୍ୱାଧୀନ ମହାୟୁତି ମେଣ୍ଟ ଜୋରଦାର ପ୍ରଦର୍ଶନ କରିଛି। ସୋମବାର ଘୋଷିତ ଫଳାଫଳ ଅନୁଯାୟୀ, ୧୭ଟି ଆସନ ମଧ୍ୟରୁ ୧୬ଟିରେ ମହାୟୁତି ବିଜୟ ହାସଲ କରିଛି। ଏହି ଫଳାଫଳକୁ ରାଜ୍ୟରେ ଶାସକ ମେଣ୍ଟ ପାଇଁ ବଡ଼ ସଫଳତା ଭାବେ ଦେଖାଯାଉଛି।
ଜୁନ୍ ୧୮ ତାରିଖରେ ଅନୁଷ୍ଠିତ ନିର୍ବାଚନରେ ବିଜେପି ସର୍ବାଧିକ ୧୧ଟି ଆସନ ଜିତିଥିବା ବେଳେ ଶିବସେନା (ସିନ୍ଦେ ଗୋଷ୍ଠୀ) ୩ଟି ଏବଂ ଏନ୍ସିପି (ଅଜିତ ପାୱାର ଗୋଷ୍ଠୀ) ୨ଟି ଆସନ ଦଖଲ କରିଛି। ଅନ୍ୟପଟେ ବିରୋଧୀ ମହା ବିକାଶ ଅଘାଡ଼ି (ଏମ୍ଭିଏ) ମେଣ୍ଟ ଖାତା ମଧ୍ୟ ଖୋଲିପାରିନାହିଁ।
ତେବେ ନାସିକ ଆସନରେ ମହାୟୁତି ଅପ୍ରତ୍ୟାଶିତ ପରାଜୟ ସମ୍ମୁଖୀନ ହୋଇଛି। ଏଠାରେ ସ୍ୱାଧୀନ ପ୍ରାର୍ଥୀ ଏବଂ ବିଜେପି ବିଦ୍ରୋହୀ ଗୋକୁଳ ଗିତେ, ଶିବସେନା (ସିନ୍ଦେ ଗୋଷ୍ଠୀ) ପ୍ରାର୍ଥୀ ନରେନ୍ଦ୍ର ଦରାଡେଙ୍କୁ ପରାସ୍ତ କରିଛନ୍ତି।
ମହାୟୁତି ମେଣ୍ଟ ଜିତିଥିବା ୧୬ଟି ଆସନ ମଧ୍ୟରୁ ୬ଟି ଆସନରେ ପ୍ରାର୍ଥୀମାନେ ନିର୍ବିରୋଧରେ ନିର୍ବାଚିତ ହୋଇଥିଲେ। ଏଥିରେ ଶିବସେନାର ରବୀନ୍ଦ୍ର ଫାଟକ ଓ ଦୁଷ୍ୟନ୍ତ ଚତୁର୍ବେଦୀ, ଏନ୍ସିପିର ଅନିକେତ ତଟକରେ ଓ ବିକ୍ରମ କାକଡେ, ବିଜେପିର ଅରୁଣ ଲଖାନୀ ଓ ପ୍ରାଜକ୍ତ ତନପୁରେ ଅନ୍ତର୍ଭୁକ୍ତ ଅଛନ୍ତି।
ବିଜେପି ପକ୍ଷରୁ ଜିତିଥିବା ଅନ୍ୟ ପ୍ରାର୍ଥୀମାନଙ୍କ ମଧ୍ୟରେ ସୁହାସ ଶିରସାଟ, ଅବିନାଶ ବ୍ରାହ୍ମଣକର, ଦର୍ଶିଲ କଦମ, ରାଜେନ୍ଦ୍ର ରାଉତ, ବସଭରାଜ ପାଟିଲ, ରାଜୀବ ପୋତଦାର, ନନ୍ଦକିଶୋର ମହାଜନ, ପ୍ରବୀଣ ପୋଟେ ଓ ଅମର ରାଜୁରକର ରହିଛନ୍ତି। ପରଭଣୀ-ହିଙ୍ଗୋଲି ଆସନରୁ ଶିବସେନାର ସୟଦ ଖାନ ବିଜୟୀ ହୋଇଛନ୍ତି।
ଏହି ଫଳାଫଳକୁ ଆଗାମୀ ରାଜନୈତିକ ସମୀକରଣ ଓ ରାଜ୍ୟରେ ବିରୋଧୀ ଶିବିର ପାଇଁ ଏକ ବଡ଼ ସତର୍କ ସଙ୍କେତ ଭାବେ ଦେଖାଯାଉଛି।