Britain: ବ୍ରିଟେନର ନୂଆ ପ୍ରଧାନମନ୍ତ୍ରୀଙ୍କ ସହ ମୋଦୀଙ୍କ ପ୍ରଥମ ଟେଲିଫୋନ୍ ଆଲୋଚନା, ସହଯୋଗ ବୃଦ୍ଧି ଉପରେ ଜୋର
ନୂଆଦିଲ୍ଲୀ: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବ୍ରିଟେନର ନବନିର୍ବାଚିତ ପ୍ରଧାନମନ୍ତ୍ରୀ ଏଣ୍ଡି ବର୍ନହାମଙ୍କ ସହ ପ୍ରଥମ ଥର ପାଇଁ ଟେଲିଫୋନ୍ ଯୋଗେ କଥାବାର୍ତ୍ତା କରିଛନ୍ତି। ଏହି ଅବସରରେ ମୋଦୀ ବର୍ନହାମଙ୍କୁ ନୂତନ ଦାୟିତ୍ୱ ପାଇଁ ଅଭିନନ୍ଦନ ଜଣାଇବା ସହ ଭାରତ-ବ୍ରିଟେନ ସମ୍ପର୍କକୁ ଆହୁରି ସୁଦୃଢ଼ କରିବା ପ୍ରତି ଭାରତର ପ୍ରତିବଦ୍ଧତା ଦୋହରାଇଛନ୍ତି।
ପ୍ରଧାନମନ୍ତ୍ରୀ ମୋଦୀ ସାମାଜିକ ଗଣମାଧ୍ୟମ ‘ଏକ୍ସ’ରେ କରିଥିବା ପୋଷ୍ଟରେ କହିଛନ୍ତି ଯେ, ବ୍ରିଟେନର ନୂଆ ପ୍ରଧାନମନ୍ତ୍ରୀଙ୍କ ସହ ଫୋନ୍ରେ ଆଲୋଚନା କରି ସେ ଖୁସି ଅନୁଭବ କରିଛନ୍ତି ଏବଂ ତାଙ୍କ ନୂଆ କାର୍ଯ୍ୟକାଳ ପାଇଁ ଶୁଭେଚ୍ଛା ଜଣାଇଛନ୍ତି।
ଆଲୋଚନା ସମୟରେ ଉଭୟ ନେତା ଭାରତ ଓ ବ୍ରିଟେନ ମଧ୍ୟରେ ରଣନୀତିକ ସହଯୋଗକୁ ଆହୁରି ବିସ୍ତାର କରିବା ନେଇ ମତ ବିନିମୟ କରିଥିଲେ। ବିଶେଷକରି ବୈଷୟିକ ଜ୍ଞାନକୌଶଳ, ନବସୃଜନ, ପ୍ରତିରକ୍ଷା, ସୁରକ୍ଷା, ସ୍ୱଚ୍ଛ ଶକ୍ତି, କୃତ୍ରିମ ବୁଦ୍ଧିମତ୍ତା (AI) ଏବଂ ବାଣିଜ୍ୟ ଭଳି କ୍ଷେତ୍ରରେ ସହଭାଗିତାକୁ ଅଧିକ ମଜବୁତ କରିବାକୁ ଉଭୟ ଦେଶ ସହମତି ପ୍ରକାଶ କରିଛନ୍ତି।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଦୁଇ ଦେଶ ମଧ୍ୟରେ ବହୁମୁଖୀ ସହଯୋଗକୁ ନୂଆ ଉଚ୍ଚତାକୁ ନେବା ଲକ୍ଷ୍ୟରେ ଆଗାମୀ ଦିନରେ ଉଭୟ ସରକାର ଘନିଷ୍ଠ ଭାବେ କାର୍ଯ୍ୟ କରିବେ।