SIR: ଭୋଟର ତାଲିକାରୁ ବାଦ୍ ପଡ଼ିଲେ ମିଳିବନି ସରକାରୀ ଯୋଜନାର ଲାଭ; ବିହାର-ପଶ୍ଚିମବଙ୍ଗ ସରକାରଙ୍କ ବଡ଼ ନିଷ୍ପତ୍ତି
ନୂଆଦିଲ୍ଲୀ: ସ୍ବତନ୍ତ୍ର ଭୋଟର ତାଲିକା ସଂଶୋଧନ (ଏସ୍ଆଇଆର୍)ର ପ୍ରଭାବ କେବଳ ନିର୍ବାଚନ ପର୍ଯ୍ୟନ୍ତ ସୀମିତ ରହିନାହିଁ। ଏହାକୁ ଆଧାର କରି Bihar ଏବଂ West Bengal ସରକାର ବଡ଼ ପଦକ୍ଷେପ ନେଇଛନ୍ତି। ଏସ୍ଆଇଆର୍ ପରେ ଭୋଟର ତାଲିକାରୁ ବାଦ୍ ପଡ଼ିଥିବା ଲୋକମାନଙ୍କୁ ଆଉ ସରକାରୀ ଓ ଜନକଲ୍ୟାଣକାରୀ ଯୋଜନାର ଲାଭ ମିଳିବ ନାହିଁ ବୋଲି ଦୁଇ ରାଜ୍ୟ ସରକାର ସ୍ପଷ୍ଟ କରିଛନ୍ତି।
ସରକାରଙ୍କ କହିବା ଅନୁସାରେ, ଯୋଜନା ବଣ୍ଟନରେ ହେଉଥିବା ଜାଲିଆତିକୁ ରୋକିବା ଏବଂ ଅଯୋଗ୍ୟ ହିତାଧିକାରୀଙ୍କୁ ଯୋଜନାରୁ ଦୂରେଇ ରଖିବା ଏହାର ମୁଖ୍ୟ ଉଦ୍ଦେଶ୍ୟ।
ନିର୍ବାଚନ ଆୟୋଗ ୨୦୨୫ରେ ବିହାର ଏବଂ ୨୦୨୬ରେ ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ଭୋଟର ତାଲିକା ସଂଶୋଧନ ପାଇଁ ଏସ୍ଆଇଆର୍ ପ୍ରକ୍ରିୟା କରିଥିଲା। ଏଥିରେ ମୃତ ଓ ଜାଲ୍ ଭୋଟରଙ୍କ ନାମ ତାଲିକାରୁ ହଟାଯାଇଥିଲା। ରିପୋର୍ଟ ଅନୁସାରେ, ଏହି ପ୍ରକ୍ରିୟାରେ ବିହାରରୁ ପ୍ରାୟ ୬୫ ଲକ୍ଷ ଓ ପଶ୍ଚିମବଙ୍ଗରୁ ୯୧ ଲକ୍ଷ ନାମ ବାଦ୍ ପଡ଼ିଥିଲା।
ପଶ୍ଚିମବଙ୍ଗରେ ବାଦ୍ ପଡ଼ିଥିବା ୯୧ ଲକ୍ଷ ଲୋକଙ୍କ ମଧ୍ୟରୁ ୨୭ ଲକ୍ଷରୁ ଅଧିକଙ୍କ ନାମ ‘ବିସଙ୍ଗତି’ ତାଲିକାରେ ରହିଥିବା ବେଳେ ସେମାନେ ଗତ ଏପ୍ରିଲ ୨୩ ଓ ୨୯ରେ ହୋଇଥିବା ବିଧାନସଭା ନିର୍ବାଚନରେ ଭୋଟ ଦେଇପାରିନଥିଲେ।
ସରକାର ଡିବିଟି ମାଧ୍ୟମରେ ହିତାଧିକାରୀଙ୍କୁ ପ୍ରତ୍ୟକ୍ଷ ଲାଭ ଦେବା ସମୟରେ ଏସ୍ଆଇଆର୍ ଡାଟାବେସ୍ ବ୍ୟବହାର କରିବେ। ଅଯୋଗ୍ୟ ଲୋକମାନଙ୍କୁ ଯୋଜନାରୁ ବାଦ୍ ଦେବା ପାଇଁ ଏହି ଡାଟାକୁ ଆଧାର କରାଯିବ ବୋଲି କୁହାଯାଇଛି।
ଏହି ପଦକ୍ଷେପକୁ ନେଇ P. Chidambaram କଟୁ ସମାଲୋଚନା କରିଛନ୍ତି। ସେ କହିଛନ୍ତି ଯେ, ଭୋଟର ତାଲିକାକୁ ନାଗରିକତାର ଆଧାର କରି ସରକାରୀ ଯୋଜନା ବନ୍ଦ କରିବା ଅପରାଧଜନକ ଓ ଏହା ଗମ୍ଭୀର ସାମ୍ବିଧାନିକ ପ୍ରଶ୍ନ ଉଠାଉଛି। ଏହି ପ୍ରସଙ୍ଗରେ ସୁପ୍ରିମକୋର୍ଟ ହସ୍ତକ୍ଷେପ କରିବା ଉଚିତ ବୋଲି ସେ ମତ ଦେଇଛନ୍ତି।
ମେ ୧୦ରେ ପଶ୍ଚିମବଙ୍ଗରେ ସରକାର ଗଠନ ପରେ Bharatiya Janata Party ଘୋଷଣା କରିଥିଲା ଯେ, ଭୋଟର ତାଲିକାରୁ ବାଦ୍ ପଡ଼ିଥିବା ଏବଂ ଟ୍ରିବ୍ୟୁନାଲରେ ମାମଲା ବିଚାରାଧୀନ ଥିବା ଲୋକମାନେ ଅନ୍ନପୂର୍ଣ୍ଣା ଭଣ୍ଡାର ପରି ଯୋଜନାର ଲାଭ ପାଇବେ ନାହିଁ। ସେହିପରି ବିହାରର National Democratic Alliance ସରକାର ମଧ୍ୟ ସାମାଜିକ କଲ୍ୟାଣ ଓ ରାସନ କାର୍ଡ ଯୋଜନାରେ ସମାନ ନିୟମ ଲାଗୁ କରିଛି।