ଅଗରତାଲା: ବିଶ୍ୱବ୍ୟାପୀ ଇନ୍ଧନ ସଙ୍କଟ ଓ ଇନ୍ଧନ ସଞ୍ଚୟ ନେଇ ପ୍ରଧାନମନ୍ତ୍ରୀ Narendra Modiଙ୍କ ଆହ୍ୱାନ ପରେ ତ୍ରିପୁରା ସରକାର ଏକ ବଡ଼ ପଦକ୍ଷେପ ନେଇଛନ୍ତି। ରାଜ୍ୟ ସରକାର ୫୦ ପ୍ରତିଶତ ଗ୍ରୁପ୍-ସି ଓ ଗ୍ରୁପ୍-ଡି କର୍ମଚାରୀଙ୍କ ପାଇଁ ‘ୱର୍କ ଫ୍ରମ୍ ହୋମ୍’ ବ୍ୟବସ୍ଥା ଲାଗୁ କରିଛନ୍ତି। ଇନ୍ଧନ ସଂରକ୍ଷଣ ଓ ସରକାରୀ ଖର୍ଚ୍ଚ କମାଇବା ଉଦ୍ଦେଶ୍ୟରେ ଏହି ନିଷ୍ପତ୍ତି ନିଆଯାଇଛି।
ରାଜ୍ୟ ସାଧାରଣ ପ୍ରଶାସନ ବିଭାଗ ପକ୍ଷରୁ ମେ’ ୧୩, ୨୦୨୬ରେ ଜାରି ହୋଇଥିବା ନୂତନ ନିର୍ଦ୍ଦେଶନାମା ଅନୁଯାୟୀ, ଦୈନିକ ମାତ୍ର ୫୦ ପ୍ରତିଶତ କର୍ମଚାରୀ ଅଫିସକୁ ଆସିବେ ଓ ଅନ୍ୟମାନେ ଘରୁ କାର୍ଯ୍ୟ କରିବେ। ଏହି ବ୍ୟବସ୍ଥା କାର୍ଯ୍ୟକାରୀ ପାଇଁ ସମସ୍ତ ବିଭାଗୀୟ ମୁଖ୍ୟଙ୍କୁ ସାପ୍ତାହିକ ଡ୍ୟୁଟି ରୋଷ୍ଟର ପ୍ରସ୍ତୁତ କରିବାକୁ କୁହାଯାଇଛି। ଅଫିସ ନିକଟରେ ରହୁଥିବା କର୍ମଚାରୀଙ୍କୁ ପ୍ରଥମ ସପ୍ତାହରେ ପ୍ରାଥମିକତା ଦିଆଯିବ।
ନୂତନ ନିୟମ ଅନୁଯାୟୀ, ଘରୁ କାମ କରୁଥିବା କର୍ମଚାରୀମାନେ ଟେଲିଫୋନ୍ କିମ୍ବା ଅନ୍ୟ ଇଲେକ୍ଟ୍ରୋନିକ୍ ମାଧ୍ୟମରେ ସବୁବେଳେ ଉପଲବ୍ଧ ରହିବେ। ଜରୁରୀ ପରିସ୍ଥିତିରେ ସେମାନଙ୍କୁ ତୁରନ୍ତ ଅଫିସରେ ଯୋଗଦେବାକୁ ହେବ। ସରକାରଙ୍କ ଏହି ନିଷ୍ପତ୍ତି ପିଏସୟୁ, ସ୍ଥାନୀୟ ନିକାୟ ଓ ସ୍ୱୟଂଶାସିତ ସଂସ୍ଥାଗୁଡ଼ିକ ପାଇଁ ମଧ୍ୟ ଲାଗୁ ହେବ।
ଏହା ସହ ଅନ୍ୟାନ୍ୟ ରାଜ୍ୟମାନେ ମଧ୍ୟ ଇନ୍ଧନ ସଞ୍ଚୟ ପାଇଁ ସମାନ ପଦକ୍ଷେପ ନେଉଛନ୍ତି। ଉତ୍ତର ପ୍ରଦେଶରେ ମୁଖ୍ୟମନ୍ତ୍ରୀ Yogi Adityanath ମନ୍ତ୍ରୀ ଓ ଅଧିକାରୀଙ୍କ କାଫିଲାରେ ଗାଡ଼ି ସଂଖ୍ୟା ୫୦ ପ୍ରତିଶତ କମାଇବାକୁ ନିର୍ଦ୍ଦେଶ ଦେଇଛନ୍ତି। ସେହିପରି, ଉତ୍ତରାଖଣ୍ଡର Pushkar Singh Dhami ସରକାର ଘରୋଇ କ୍ଷେତ୍ରରେ ‘ୱର୍କ ଫ୍ରମ୍ ହୋମ୍’ କାର୍ଯ୍ୟକାରୀ କରିବା ସହ ସରକାରୀ ବିଭାଗରେ ଭିଡିଓ କନଫରେନ୍ସିଂକୁ ପ୍ରୋତ୍ସାହନ ଦେବା ନେଇ ବିଚାର କରୁଛନ୍ତି।
ଏପରିକି ସପ୍ତାହରେ ଗୋଟିଏ ଦିନକୁ ‘ନୋ ଭେହିକିଲ୍ ଡେ’ ଭାବେ ପାଳନ କରିବା ନେଇ ମଧ୍ୟ ଚର୍ଚ୍ଚା ଚାଲିଛି।