ତ୍ବିଷା ଶର୍ମା ମୃତ୍ୟୁ ମାମଲାରେ ବଡ଼ ମୋଡ଼; ଜୁନ୍ ୨ ପର୍ଯ୍ୟନ୍ତ ସିବିଆଇ ରିମାଣ୍ଡରେ ଗିରିବାଳା ଓ ସମର୍ଥ ସିଂହ

ନୂଆଦିଲ୍ଲୀ: ଭୋପାଳର ବହୁଚର୍ଚ୍ଚିତ ତ୍ବିଷା ଶର୍ମା ମୃତ୍ୟୁ ମାମଲାରେ ତଦନ୍ତ ଏବେ ନୂଆ ମୋଡ଼ ନେଇଛି। ଏହି ମାମଲାରେ ଗିରଫ ହୋଇଥିବା ପୂର୍ବତନ ଜିଲ୍ଲା ଜଜ୍ ‌Giribala Singh ଏବଂ ତାଙ୍କ ପୁଅ Samarth Singhଙ୍କୁ ଜୁନ୍ ୨ ପର୍ଯ୍ୟନ୍ତ ସିବିଆଇ ରିମାଣ୍ଡରେ ପଠାଇଛନ୍ତି କୋର୍ଟ।

ଗୁରୁବାର ଗିରଫ ପରେ କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ଉଭୟଙ୍କୁ କୋର୍ଟରେ ହାଜର କରିଥିଲା। ଶୁଣାଣି ପରେ କୋର୍ଟ ସେମାନଙ୍କୁ ୫ ଦିନିଆ ରିମାଣ୍ଡରେ ପଠାଇବାକୁ ନିର୍ଦ୍ଦେଶ ଦେଇଥିଲେ। ବିଶେଷ ଉଲ୍ଲେଖନୀୟ କଥା ହେଲା, ଗିରିବାଳା ସିଂହ ଯେଉଁ ନ୍ୟାୟିକ ବ୍ୟବସ୍ଥାର ଅଂଶ ଥିଲେ, ସେହି ବ୍ୟବସ୍ଥାରେ ଏବେ ତାଙ୍କୁ ଅଭିଯୁକ୍ତ ଭାବେ କାଠଗଡ଼ାରେ ଠିଆ ହେବାକୁ ପଡ଼ିଛି।

ଶୁଣାଣି ସମୟରେ କୋର୍ଟ ପରିସରରେ ବହୁ ସଂଖ୍ୟକ ଲୋକଙ୍କ ଭିଡ଼ ଦେଖିବାକୁ ମିଳିଥିଲା। ଗିରିବାଳା ସିଂହ ଓ ସମର୍ଥ ସିଂହ ଶାନ୍ତ ଭାବେ କୋର୍ଟରେ ଉପସ୍ଥିତ ଥିଲେ। ତେବେ ଶୁଣାଣି ବେଳେ ଗିରିବାଳା ସିଂହ କିଛି ପ୍ରସଙ୍ଗରେ ସିବିଆଇ ଅଧିକାରୀଙ୍କ ସହ ଯୁକ୍ତିତର୍କ କରିଥିବା ଜଣାପଡ଼ିଛି। ଏହାକୁ ନେଇ କିଛି ସମୟ ପାଇଁ କୋର୍ଟ ପରିବେଶ ଉତ୍ତପ୍ତ ହୋଇଯାଇଥିଲା।

ଅନ୍ୟପକ୍ଷରେ, ଗିରିବାଳା ସିଂହଙ୍କ ପକ୍ଷର ଓକିଲ ସିବିଆଇ ରିମାଣ୍ଡକୁ ବିରୋଧ କରିନଥିଲେ। ତେବେ ସେ ଦାବି କରିଥିଲେ ଯେ, ଏସ୍‌ଆଇଟି ପାଖରେ ଥିବା ସମସ୍ତ ପ୍ରମାଣ ଓ ଦଲିଲ ସୁରକ୍ଷିତ ଭାବେ ସିବିଆଇକୁ ହସ୍ତାନ୍ତର କରାଯିବା ଉଚିତ। ଏହାର ଜବାବରେ ସିବିଆଇ କହିଥିଲା ଯେ, ତଦନ୍ତ ପାଇଁ ଆବଶ୍ୟକ ସମସ୍ତ କାଗଜପତ୍ର ଏବଂ ଦଲିଲ ସେମାନେ ପାଇସାରିଛନ୍ତି।

ତଦନ୍ତରେ ଖୋଲିପାରେ ଅନେକ ଗୁପ୍ତ ତଥ୍ୟ

ସିବିଆଇ ରିମାଣ୍ଡ ଅବଧିରେ ଗିରିବାଳା ସିଂହ ଓ ସମର୍ଥ ସିଂହଙ୍କୁ ପଚରାଉଚରା କରି ମାମଲାର ବିଭିନ୍ନ ଦିଗ ଉପରେ ତଥ୍ୟ ସଂଗ୍ରହ କରିବ। ତଦନ୍ତକାରୀ ସଂସ୍ଥା ଯୌତୁକ ନିର୍ଯାତନା, ମାନସିକ ଉତ୍ପୀଡ଼ନ ଏବଂ ତ୍ବିଷା ଶର୍ମାଙ୍କ ମୃତ୍ୟୁ ସହ ଜଡିତ ଅନ୍ୟାନ୍ୟ ପରିସ୍ଥିତିକୁ ଖତିଆନ କରୁଛି।

ଉଲ୍ଲେଖଯୋଗ୍ୟ ଯେ, Twisha Sharmaଙ୍କ ମୃତ୍ୟୁ ପରେ ତାଙ୍କ ପରିବାର ପକ୍ଷରୁ ଶାଶୁଘର ଲୋକଙ୍କ ବିରୋଧରେ ଯୌତୁକ ନିର୍ଯାତନା ଏବଂ ମାନସିକ ଉତ୍ପୀଡ଼ନର ଗୁରୁତର ଅଭିଯୋଗ ଆଣାଯାଇଥିଲା। ଏହି ମାମଲା ସାରା ଦେଶରେ ଚର୍ଚ୍ଚାର ବିଷୟ ପାଲଟିଥିବା ବେଳେ ସିବିଆଇ ତଦନ୍ତ ଏବେ ନିର୍ଣ୍ଣାୟକ ପର୍ଯ୍ୟାୟରେ ପହଞ୍ଚିଛି।