କଟକ: କଟକର ପ୍ରସିଦ୍ଧ ରେଭେନ୍ସା ଜୁନିଅର କଲେଜରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି, ଯାହାକୁ ଶୁଣିଲେ ଆପଣ ବି ତାଜୁବ୍ ହୋଇଯିବେ । ଗଣମାଧ୍ୟମର ରିପୋର୍ଟ ଅନୁଯାୟୀ, ଚଳିତ ପ୍ଲସ-୨ (+୨) ପରୀକ୍ଷାରେ ଏଠାକାର ଜଣେ ଛାତ୍ର ଇଂରାଜୀ ବିଷୟରେ ୧୦୦ ମାର୍କରୁ ୧୦୨ ମାର୍କ ପାଇ ସମସ୍ତଙ୍କୁ ଚକିତ କରିଦେଇଛନ୍ତି ।
ଉଚ୍ଚ ମାଧ୍ୟମିକ ଶିକ୍ଷା ପରିଷଦ (CHSE) ଦ୍ୱାରା ପ୍ରକାଶିତ ଯୁକ୍ତ ଦୁଇ ରେଜଲ୍ଟରେ ଏଭଳି ଏକ ବଡ଼ ତ୍ରୁଟି ଦେଖିବାକୁ ମିଳିଛି, ଯାହା ପରେ ସୋସିଆଲ ମିଡିଆରେ ମିମ୍ସ ଓ ଟ୍ରୋଲ୍ର ବନ୍ୟା ଛୁଟିଛି । କଲେଜର ବିଶ୍ୱଜିତ ଓରାମ ନାମକ ଏହି ଛାତ୍ର ଜଣକ ହଠାତ୍ ରାତାରାତି ଇଣ୍ଟରନେଟ୍ରେ ଷ୍ଟାର୍ ପାଲଟି ଯାଇଛନ୍ତି ।
ଏହି ଅଜବ ଘଟଣା ସାମ୍ନାକୁ ଆସିବା ପରେ କଲେଜ ଅଧ୍ୟକ୍ଷ ଚିରଞ୍ଜୀବ ମହାପାତ୍ର ସ୍ପଷ୍ଟୀକରଣ ଦେଇଛନ୍ତି ଯେ, ଏହା କୌଣସି ଅଲୌକିକ ପ୍ରତିଭା ନୁହେଁ, ବରଂ କମ୍ପ୍ୟୁଟର ଏବଂ ବୈଷୟିକ ତ୍ରୁଟି (Technical Glitch) ଯୋଗୁଁ ଏଭଳି ଅସ୍ୱାଭାବିକ ମାର୍କ ସୋ’ କରୁଛି ।
ଅନ୍ୟପଟେ, CHSE ମଧ୍ୟ ନିଜର ଏହି ଭୁଲ୍କୁ ସ୍ୱୀକାର କରିଛି । କମ୍ପ୍ୟୁଟର ସିଷ୍ଟମରେ ତ୍ରୁଟି ଯୋଗୁଁ ଏଭଳି ସମସ୍ୟା ଉପୁଜିଛି ଏବଂ ଖୁବ୍ଶୀଘ୍ର ରେଜଲ୍ଟର ସଠିକ୍ ଯାଞ୍ଚ କରାଯାଇ ମାର୍କସିଟ୍କୁ ସଂଶୋଧନ କରାଯିବ ବୋଲି ପରିଷଦ ପକ୍ଷରୁ ପ୍ରତିଶ୍ରୁତି ଦିଆଯାଇଛି ।
ବର୍ତ୍ତମାନ ପାଇଁ ବିଶ୍ୱଜିତଙ୍କ ଏହି ମାର୍କକୁ ନେଇ କ୍ୟାମ୍ପସଠାରୁ ଆରମ୍ଭ କରି ସୋସିଆଲ ମିଡିଆ ପର୍ଯ୍ୟନ୍ତ ସବୁଠି ହସର ସୁଅ ଛୁଟିଛି । ଅନେକ ଲୋକ ଥଟ୍ଟାରେ ବିଶ୍ୱଜିତଙ୍କୁ ଓଡ଼ିଶାର ପ୍ରଥମ “ବୋନସ ମାର୍କ ପ୍ରୋଡିଜି” ବୋଲି କହୁଛନ୍ତି । ବୋର୍ଡ ଏବେ ନିଜର ଗଣିତ ସଜାଡ଼ିବାରେ ବ୍ୟସ୍ତ ଥିବା ବେଳେ ଛାତ୍ରଛାତ୍ରୀମାନେ ମଜା ନେଇ କହୁଛନ୍ତି, “ଯଦି ୧୦୦ରୁ ଅଧିକ ମାର୍କ ମିଳିପାରୁଛି, ତେବେ ପରୀକ୍ଷା ଖାତା ଦେଖା ଯେତିକି କଡ଼ା ବୋଲି କୁହାଯାଏ, ବୋଧହୁଏ ସେତିକି ନୁହେଁ !”