ଭୁବନେଶ୍ୱର: ଓଡ଼ିଶାର ମହାନଦୀ ଅବବାହିକାରେ ଜଳର ଉପଲବ୍ଧତାକୁ ନେଇ ମହାନଦୀ ଜଳ ବିବାଦ ଟ୍ରିବ୍ୟୁନାଲ (MWDT) ନିକଟରେ ରାଜ୍ୟ ସରକାର ଦାଖଲ କରିଥିବା ତଥ୍ୟକୁ ସାର୍ବଜନୀନ କରିବା ପାଇଁ ବିଜୁ ଜନତା ଦଳ (ବିଜେଡି) ଭାରତୀୟ ଜନତା ପାର୍ଟି (ବିଜେପି) ସରକାରଙ୍କ ନିକଟରେ ଦାବି କରିଛି। ଏହା ସହିତ ସରକାର କିଛି ତଥ୍ୟ ଲୁଚାଇବାକୁ ଚେଷ୍ଟା କରୁଥିବା ବିଜେଡି ଅଭିଯୋଗ ଆଣିଛି।
ମହାନଦୀ ସୁରକ୍ଷା ପାଇଁ କାମ କରୁଥିବା ପ୍ରମୁଖ ନାଗରିକ ସଂଗଠନ ‘ମହାନଦୀ ବଞ୍ଚାଓ ଆନ୍ଦୋଳନ’ ପକ୍ଷରୁ ଟ୍ରିବ୍ୟୁନାଲରେ ଦାଖଲ ହୋଇଥିବା ତଥ୍ୟ ଉପରେ ପ୍ରଶ୍ନ ଉଠାଯିବା ପରେ ବିଜେଡି ଶୁକ୍ରବାର ଦିନ ଏହି ଦାବି କରିଛି।
ବିଜେଡି ମୁଖପାତ୍ର ତଥା ଗଣମାଧ୍ୟମ ସଂଯୋଜକ ଲେନିନ ମହାନ୍ତି ଏକ ପ୍ରେସ ବିବୃତ୍ତିରେ କହିଛନ୍ତି ଯେ, ମହାନଦୀ ଟ୍ରିବ୍ୟୁନାଲଙ୍କ ନିର୍ଦ୍ଦେଶକ୍ରମେ ନିକଟରେ ଓଡ଼ିଶା ଏବଂ ଛତିଶଗଡ଼ ମହାନଦୀର ଜଳ ସମ୍ପଦ ଉପଲବ୍ଧତା ସମ୍ପର୍କିତ ତଥ୍ୟ ଦାଖଲ କରିଛନ୍ତି। ଏହି ତଥ୍ୟ ଉପରେ ପ୍ରଶ୍ନ ଉଠାଇ ‘ମହାନଦୀ ବଞ୍ଚାଓ ଆନ୍ଦୋଳନ’ ପକ୍ଷରୁ ଆଲୋଚନା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ପତ୍ର ଲେଖି ସମୟ ମଗାଯାଇଥିଲା। ମାତ୍ର ମୁଖ୍ୟମନ୍ତ୍ରୀ ଏହାର କୌଣସି ଜବାବ ଦେଇନଥିଲେ କି ସମୟ ଦେଇନଥିଲେ ବୋଲି ମହାନ୍ତି ଅଭିଯୋଗ କରିଛନ୍ତି। ମେ ୨୦ ସୁଦ୍ଧା ଆଲୋଚନା ପାଇଁ ସୁଯୋଗ ନମିଳିବାରୁ ଶୁକ୍ରବାର ଦିନ ‘ମହାନଦୀ ବଞ୍ଚାଓ ଆନ୍ଦୋଳନ’ର କର୍ମକର୍ତ୍ତାମାନେ ମୁଖ୍ୟମନ୍ତ୍ରୀଙ୍କ ବାସଭବନରେ ପହଞ୍ଚି ଆଲୋଚନା କରିବାକୁ ଚେଷ୍ଟା କରିଥିଲେ। କିନ୍ତୁ କମିଶନରେଟ୍ ପୋଲିସ ମହାନଦୀ ପାଇଁ ଆନ୍ଦୋଳନ କରୁଥିବା ଏହି କର୍ମୀମାନଙ୍କୁ ଗଣତାନ୍ତ୍ରିକ ବିରୋଧୀ ଭାବେ ସେଠାରୁ ଜବରଦସ୍ତ ହଟାଇ ଦେଇଥିଲା।
ବିଜେଡିର ଆରୋପ:
“ଓଡ଼ିଶା ଓ ଛତିଶଗଡ଼ ଦ୍ୱାରା ଦାଖଲ ହୋଇଥିବା ମହାନଦୀ ଜଳ ସମ୍ପଦ ସମ୍ପର୍କିତ ତଥ୍ୟ ସାର୍ବଜନୀନ ହେବା ଆବଶ୍ୟକ। ସ୍ୱଚ୍ଛତାର ସହ ତଥ୍ୟ ପ୍ରକାଶ କରିବା ବଦଳରେ, ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିବାକୁ ଚାହୁଁଥିବା ଲୋକଙ୍କୁ ପୋଲିସ ଦ୍ୱାରା ଅଟକ ରଖାଯାଉଛି। ଏଥିରୁ ସ୍ପଷ୍ଟ ଜଣାପଡୁଛି ଯେ ରାଜ୍ୟ ସରକାର କିଛି ତଥ୍ୟ ଲୁଚାଇବାକୁ ଚେଷ୍ଟା କରୁଛନ୍ତି।”
ଲେନିନ ମହାନ୍ତି, ବିଜେଡି ମୁଖପାତ୍ର
ମହାନଦୀ ଜଳ ବିବାଦ ଭଳି ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ରାଜ୍ୟ ସରକାର ଟାଳଟୁଳ ନୀତି ଅବଲମ୍ବନ କରୁଥିବା ସେ ଅଭିଯୋଗ କରିଛନ୍ତି। ଓଡ଼ିଶାର ବିଜେପି ସରକାରଙ୍କର ମହାନଦୀ ବିବାଦ ସମାଧାନ ପାଇଁ କୌଣସି ସ୍ପଷ୍ଟ ଆଭିମୁଖ୍ୟ ନାହିଁ ଏବଂ ସରକାର ସମ୍ପୂର୍ଣ୍ଣ ଦ୍ୱନ୍ଦ୍ୱରେ ଅଛନ୍ତି ବୋଲି ମହାନ୍ତି ପ୍ରକାଶ କରିଛନ୍ତି।