ଯାଜପୁର: ଚଳଚ୍ଚିତ୍ରର କାହାଣୀ ଭଳି ଲାଗୁଥିଲେ ମଧ୍ୟ ଏହା ସମ୍ପୂର୍ଣ୍ଣ ସତ । ଦୀର୍ଘ ୩୨ ବର୍ଷ ଧରି ପୋଲିସ ଆଖିରେ ଧୂଳି ଦେଇ ଫେରାର ଥିବା ଜଣେ କୁଖ୍ୟାତ ହତ୍ୟା ଅଭିଯୁକ୍ତକୁ ଶେଷରେ ଗିରଫ କରିବାରେ ସଫଳ ହୋଇଛି ଯାଜପୁର ଜିଲ୍ଲା ପୋଲିସ । ଗତ ଶୁକ୍ରବାର ରାତିରେ କୁଆଖିଆ ଥାନା ଅନ୍ତର୍ଗତ ନୂଆହାଟ ଗ୍ରାମର ୫୮ ବର୍ଷୀୟ ରବୀନ୍ଦ୍ର ମଲ୍ଲିକଙ୍କୁ ପୋଲିସ ଗିରଫ କରିଛି । ଏହା ସହିତ ଜିଲ୍ଲାର ସବୁଠାରୁ ଦୀର୍ଘତମ ମାନହଣ୍ଟ (ଅଭିଯୁକ୍ତକୁ ଖୋଜିବା ପ୍ରକ୍ରିୟା)ର ଅନ୍ତ ଘଟିଛି ।
ଦୀର୍ଘ ୩୨ ବର୍ଷ ଧରି ଫେରାର ଥିବା ଜଣେ କୁଖ୍ୟାତ ହତ୍ୟା ଅଭିଯୁକ୍ତକୁ ଗିରଫ କଲା ଯାଜପୁର ଜିଲ୍ଲା ପୋଲିସ। ୧୯୯୪ ମସିହା ଅକ୍ଟୋବର ୨୧ରେ ମାତ୍ର ଗୋଟିଏ ‘ଲଙ୍ଗଳ’କୁ କେନ୍ଦ୍ର କରି ରବୀନ୍ଦ୍ର ନିଜ ସମ୍ପର୍କୀୟ ଭାଇ ପରମାନନ୍ଦଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା। ଗିରଫଦାରୀରୁ ବଞ୍ଚିବା ପାଇଁ ସେ ପରିଚୟ ବଦଳାଇ ବାହାର ରାଜ୍ୟରେ ରାଜମିସ୍ତ୍ରୀ ଭାବେ କାମ କରୁଥିଲେ ଏବଂ ନୂଆ ଆଧାର କାର୍ଡ ମଧ୍ୟ ବନାଇଥିଲେ। ନିଜ ଘର ଭିତରେ ପୋଲିସକୁ ଚକମା ଦେବା ପାଇଁ ଏକ ଗୁପ୍ତ ସୁଡ଼ଙ୍ଗ ତିଆରି କରିଥିଲେ।
ବିଶ୍ୱସ୍ତ ସୂତ୍ରରୁ ଖବର ପାଇ ପୋଲିସ ଗ୍ରାମରେ ଚଢ଼ାଉ କରିଥିଲା। ଘରର ଏକ ବଡ଼ ଆଲମାରୀ ପଛପଟେ ଥିବା ଗୁପ୍ତ ସୁଡ଼ଙ୍ଗ ଦେଇ ଖସିଯିବାକୁ ଚେଷ୍ଟା କରୁଥିବା ବେଳେ ପୋଲିସ ତାଙ୍କୁ କାବୁ କରିଥିଲା। ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ।