ଓଡ଼ିଶାରେ IAS ସ୍ତରରେ ବଡ଼ ଅଦଳବଦଳ: ମାଲକାନଗିରିକୁ ପ୍ରଥମେଶ ଅରବିନ୍ଦ, ବ୍ରହ୍ମପୁର କମିଶନର ହେଲେ ସସ୍ୟା ରେଡ୍ଡି

ଭୁବନେଶ୍ୱର: ଓଡ଼ିଶା ସରକାର IAS ଅଧିକାରୀ ସ୍ତରରେ ବ୍ୟାପକ ପ୍ରଶାସନିକ ଅଦଳବଦଳ କରିଛନ୍ତି। ଏନେଇ ସାଧାରଣ ପ୍ରଶାସନ ଓ ଜନଅଭିଯୋଗ ବିଭାଗ ପକ୍ଷରୁ ଗୁରୁବାର ଅଧିସୂଚନା ଜାରି ହୋଇଛି। ଏହି ଆଦେଶ ଅନୁସାରେ ଅନେକ IAS ଅଧିକାରୀଙ୍କୁ ନୂତନ ଦାୟିତ୍ୱ ଦିଆଯାଇଛି।

ନୂତନ ନିର୍ଦ୍ଦେଶ ଅନୁଯାୟୀ, ଏପର୍ଯ୍ୟନ୍ତ ମାଲକାନଗିରି ଜିଲ୍ଲାପାଳ ଭାବେ କାର୍ଯ୍ୟରତ ସୋମେଶ କୁମାର ଉପାଧ୍ୟାୟଙ୍କୁ ଓଡ଼ିଶାର ବସ୍ତ୍ର ଓ ହସ୍ତତନ୍ତୁ ବିଭାଗର ନିର୍ଦ୍ଦେଶକ ଭାବେ ବଦଳି କରାଯାଇଛି। ତାଙ୍କ ସ୍ଥାନରେ ପ୍ରଥମେଶ ଅରବିନ୍ଦ ରାଜେଶିର୍କେଙ୍କୁ ମାଲକାନଗିରି ଜିଲ୍ଲାପାଳ ଓ ଜିଲ୍ଲା ମ୍ୟାଜିଷ୍ଟ୍ରେଟ୍ ଭାବେ ନୂତନ ଦାୟିତ୍ୱ ଦିଆଯାଇଛି। ପ୍ରଥମେଶ ଅରବିନ୍ଦ ପୂର୍ବରୁ ବ୍ରହ୍ମପୁର ମହାନଗର ନିଗମର କମିଶନର ଭାବେ କାର୍ଯ୍ୟରତ ଥିଲେ ଏବଂ ସେଠାରେ ବ୍ରହ୍ମପୁର ବିକାଶ କର୍ତ୍ତୃପକ୍ଷର ଉପାଧ୍ୟକ୍ଷ ଭାବରେ ଅତିରିକ୍ତ ଭାର ମଧ୍ୟ ରଖିଥିଲେ।

ଏହି ବଦଳି ପରେ ୨୦୨୨ ବ୍ୟାଚର IAS ଅଧିକାରୀ ଅକାଭରମ ସସ୍ୟା ରେଡ୍ଡି, ଯିଏ ଏପର୍ଯ୍ୟନ୍ତ ଜୟପୁରର ସବ୍-କଲେକ୍ଟର ଭାବେ କାର୍ଯ୍ୟରତ ଥିଲେ, ତାଙ୍କୁ ବ୍ରହ୍ମପୁର ମ୍ୟୁନିସିପାଲ କର୍ପୋରେସନ୍‌ର କମିଶନର ଭାବେ ନିଯୁକ୍ତି ମିଳିଛି। ସେ ଏହା ସହ ବ୍ରହ୍ମପୁର ଡିଭେଲପମେଣ୍ଟ ଅଥରିଟିର ଉପାଧ୍ୟକ୍ଷ ଭାବରେ ଅତିରିକ୍ତ ଦାୟିତ୍ୱ ମଧ୍ୟ ପାଳନ କରିବେ।

ଏହା ସହିତ ଅନ୍ୟ କିଛି IAS ଅଧିକାରୀଙ୍କ ମଧ୍ୟରେ ମଧ୍ୟ ବଦଳି କରାଯାଇଛି। ମନୀଷ ଅଗରୱାଲଙ୍କୁ ସହକାରୀ ସମିତି ରଜିଷ୍ଟ୍ରାର ଭାବେ ଓ ସ୍ମୃତି ରଞ୍ଜନ ପ୍ରଧାନଙ୍କୁ ଓଡ଼ିଶା ସ୍ମଲ୍ ଇଣ୍ଡଷ୍ଟ୍ରିଜ କର୍ପୋରେସନ୍‌ର ମ୍ୟାନେଜିଂ ଡାଇରେକ୍ଟର ଭାବେ ନିଯୁକ୍ତ କରାଯାଇଛି। ସେ ଷ୍ଟାର୍ଟଅପ୍ ଓଡ଼ିଶାର ସିଇଓ ଭାବେ ଅତିରିକ୍ତ ଭାର ମଧ୍ୟ ରଖିବେ।

ସେହିପରି ସିଦ୍ଧାର୍ଥ ଦାସଙ୍କୁ ମତ୍ସ୍ୟ ବିଭାଗର ନିର୍ଦ୍ଦେଶକ ଓ ମଧୁସ୍ମିତା ସାହୁଙ୍କୁ ଟିଚର୍ସ ଏଡ୍ୟୁକେସନ୍ ଏବଂ SCERT ନିର୍ଦ୍ଦେଶକ ଭାବେ ନିଯୁକ୍ତି ଦିଆଯାଇଛି।

ଏହା ଛଡ଼ା ବୋଣାଇର ସବ୍-କଲେକ୍ଟର ଅକ୍ଷୟ ପିଲ୍ଲେଙ୍କୁ ଜଗତସିଂହପୁର ଜିଲ୍ଲାର ପାରାଦୀପରେ ଅତିରିକ୍ତ ଜିଲ୍ଲାପାଳ (ADM) ଭାବେ ନିଯୁକ୍ତି ମିଳିଛି। ଭାରତୀୟ ନାଗରିକ ସୁରକ୍ଷା ସଂହିତା–୨୦୨୩ ର ଧାରା ୧୪(୨) ଅନୁଯାୟୀ ଏହି ନିଯୁକ୍ତି କରାଯାଇଛି।

ଏହା ସହ ପଦମପୁର ସବ୍-କଲେକ୍ଟର ଅରୁଗୁଲା ସ୍ନେହାଙ୍କୁ ମୟୁରଭଞ୍ଜ ଜିଲ୍ଲା ପରିଷଦର CDO-cum-EO ଭାବେ, ତାଲଚେର ସବ୍-କଲେକ୍ଟର ସମୀର କୁମାର ଜେନାଙ୍କୁ ଗଞ୍ଜାମ ଜିଲ୍ଲା ପରିଷଦର CDO-cum-EO ଭାବେ ଓ ରାଇରଙ୍ଗପୁର ସବ୍-କଲେକ୍ଟର ସୌମ୍ୟରଞ୍ଜନ ପ୍ରଧାନଙ୍କୁ କଳାହାଣ୍ଡି ଜିଲ୍ଲା ପରିଷଦର CDO-cum-EO ଭାବେ ନୂତନ ଦାୟିତ୍ୱ ଦିଆଯାଇଛି।

ରାଜ୍ୟପାଳଙ୍କ ଆଦେଶକ୍ରମେ ଏହି ପ୍ରଶାସନିକ ଅଦଳବଦଳ ତତ୍କ୍ଷଣାତ୍ ପ୍ରଭାବୀ ହେବ ବୋଲି ଅଧିସୂଚନାରେ ଉଲ୍ଲେଖ ରହିଛି।