ଭୁବନେଶ୍ୱର: ରାଜ୍ୟରେ ପୁଲିସ ନିଯୁକ୍ତିକୁ ନେଇ ରାଜ୍ୟ ସରକାର ବଡ଼ ନିଷ୍ପତ୍ତି ନେଇଛନ୍ତି। ଗୃହ ବିଭାଗ ପକ୍ଷରୁ ଜାରି ଅଧିକୃତ ଆଦେଶ ଅନୁଯାୟୀ, କନଷ୍ଟେବଳରୁ ଆରମ୍ଭ କରି ସବ୍-ଇନ୍ସପେକ୍ଟର (SI) ପର୍ଯ୍ୟନ୍ତ ମୋଟ ୭,୬୬୪ଟି ଖାଲି ପଦବୀରେ ନିଯୁକ୍ତି କରାଯିବ। ଏହି ନିଯୁକ୍ତି ପ୍ରକ୍ରିୟା Odisha Sub-ordinate Staff Selection Commission (OUSSSC) ମାଧ୍ୟମରେ ସମ୍ପନ୍ନ ହେବ।
ରାଜ୍ୟର ହଜାର ହଜାର ଚାକିରି ଆଶାୟୀଙ୍କ ପାଇଁ ଏହା ବଡ଼ ଖୁସି ଖବର ହୋଇଥିବା ବେଳେ, ଗତ କିଛି ବର୍ଷରେ ଏହାକୁ ସବୁଠାରୁ ବଡ଼ ପୁଲିସ ନିଯୁକ୍ତି ପ୍ରକ୍ରିୟା ମଧ୍ୟରୁ ଗୋଟିଏ ବୋଲି ମନେ କରାଯାଉଛି।
କେଉଁ ପଦବୀରେ କେତେ ନିଯୁକ୍ତି?
ସରକାରୀ ସୂଚନା ଅନୁଯାୟୀ, ମୋଟ ଚାରି ପ୍ରକାର ପଦବୀରେ ନିଯୁକ୍ତି ହେବ। ସେଗୁଡ଼ିକ ହେଲା—
- ୩୦୦ଟି କନଷ୍ଟେବଳ (କମ୍ୟୁନିକେସନ୍) ପଦ
- ୨,୨୧୨ଟି OISF କନଷ୍ଟେବଳ ପଦ
- ୪,୨୧୯ଟି ସିଭିଲ କନଷ୍ଟେବଳ ପଦ
- ୯୩୩ଟି SI ଓ ସମମର୍ଯ୍ୟାଦା ପଦ
SI ନିଯୁକ୍ତି ଏବେ OUSSSC ଅଧୀନରେ
ଏପର୍ଯ୍ୟନ୍ତ SI ନିଯୁକ୍ତି ପ୍ରକ୍ରିୟା Odisha Police Recruitment Board (OPRB) ମାଧ୍ୟମରେ ହୋଇଆସୁଥିଲା। କିନ୍ତୁ ପୂର୍ବ SI ନିଯୁକ୍ତି ପରୀକ୍ଷାରେ ଅନିୟମିତତା ଓ ଦୁର୍ନୀତି ଅଭିଯୋଗ ଆସିବା ପରେ ପ୍ରକ୍ରିୟା ଅଟକି ରହିଥିଲା। ଏବେ ସରକାର ସେହି ନିଯୁକ୍ତିକୁ ମଧ୍ୟ OUSSSC ଅଧୀନକୁ ଆଣିଛନ୍ତି।
ଗୃହ ବିଭାଗ ସ୍ପଷ୍ଟ କରିଛି ଯେ, ପୂର୍ବରୁ SI ନିଯୁକ୍ତି ପାଇଁ ଆବେଦନ କରି ଯୋଗ୍ୟ ବିବେଚିତ ହୋଇଥିବା ପ୍ରାର୍ଥୀମାନେ ନୂତନ ପ୍ରକ୍ରିୟାରେ ସୁଯୋଗ ପାଇବେ। ତେବେ ପୁନଃ ଆବେଦନ ଆବଶ୍ୟକ ହେବ କି ନାହିଁ, ସେନେଇ ପରବର୍ତ୍ତୀ ନିର୍ଦ୍ଦେଶିକାରେ ସ୍ପଷ୍ଟତା ଆସିବ।
OPRBକୁ ରେକର୍ଡ ହସ୍ତାନ୍ତର ନିର୍ଦ୍ଦେଶ
ଗୃହ ବିଭାଗ ପକ୍ଷରୁ OPRBକୁ ନିର୍ଦ୍ଦେଶ ଦିଆଯାଇଛି ଯେ, SI ନିଯୁକ୍ତି ସମ୍ବନ୍ଧୀୟ ସମସ୍ତ ଆବେଦନପତ୍ର, ଡାଟା ଓ ରେକର୍ଡ ତୁରନ୍ତ OUSSSCକୁ ହସ୍ତାନ୍ତର କରାଯାଉ। ଏହା ଫଳରେ ନିଯୁକ୍ତି ପ୍ରକ୍ରିୟା ଶୀଘ୍ର ଆଗକୁ ବଢ଼ିପାରିବ ବୋଲି ସରକାର ଆଶା କରିଛନ୍ତି।
ଯୁବବର୍ଗ ମଧ୍ୟରେ ଉତ୍ସାହ
ଦୀର୍ଘଦିନ ଧରି ପୁଲିସ ନିଯୁକ୍ତିକୁ ଅପେକ୍ଷା କରିଥିବା ଚାକିରି ପ୍ରାର୍ଥୀମାନେ ଏହି ଘୋଷଣାକୁ ସ୍ୱାଗତ କରିଛନ୍ତି। ବିଶେଷକରି SI ନିଯୁକ୍ତି ପ୍ରକ୍ରିୟା ଅଟକି ରହିଥିବାରୁ ଅନେକ ଆଶାୟୀ ଅନିଶ୍ଚିତତାରେ ଥିଲେ। ନୂତନ ନିଷ୍ପତ୍ତି ସେମାନଙ୍କ ମନରେ ଆଶା ଜଗାଇଛି।
ପ୍ରଶାସନିକ ମହଲରେ ମଧ୍ୟ ଏହାକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି। ଗୋଟିଏ ସଂସ୍ଥା ମାଧ୍ୟମରେ ବିଭିନ୍ନ ପୁଲିସ ପଦବୀର ନିଯୁକ୍ତି କରାଯିବା ଫଳରେ ପ୍ରକ୍ରିୟାରେ ସ୍ୱଚ୍ଛତା ଓ ସମନ୍ୱୟ ବଢ଼ିବ ବୋଲି ମତ ପ୍ରକାଶ ପାଇଛି।