ସମ୍ବଲପୁରର ପ୍ରସିଦ୍ଧ ଶୀତଳଷଷ୍ଠୀ ଯାତ୍ରା: ବିବାହ ବନ୍ଧନରେ ବାନ୍ଧିହେବେ ଦେବଦେବ ମହାଦେବ, ହନୁମାନ ଦେଲେ ଗୁଆ ନିମନ୍ତ୍ରଣ
ସମ୍ବଲପୁର: ସାରା ସହର ଏବେ ଦେବ ଦମ୍ପତିଙ୍କ ବିବାହ ଉତ୍ସବ ପାଇଁ ଚଳଚଞ୍ଚଳ। ସମ୍ବଲପୁରର ପ୍ରସିଦ୍ଧ ଗଣପର୍ବ ଶୀତଳଷଷ୍ଠୀ ଅବସରରେ ଆଜି ରାତିରେ ଦେବଦେବ ମହାଦେବ ଜଗତଜନନୀ ମାତା ପାର୍ବତୀଙ୍କ ସହ ବିବାହ ବନ୍ଧନରେ ବାନ୍ଧି ହେବାକୁ ବରଯାତ୍ରୀ ନେଇ ବାହାରିବେ। ଏହି ଭବ୍ୟ ଶୋଭାଯାତ୍ରାରେ ସାମିଲ ହେବାକୁ ଯାଉଛନ୍ତି ହଜାର ହଜାର ଶ୍ରଦ୍ଧାଳୁ ଓ କଳାକାର, ଯାହା ସାରା ଅଞ୍ଚଳରେ ଏକ ଦେବୀୟ ମାହୋଲ ସୃଷ୍ଟି କରିଛି।ଏହି ମହାନ୍ ଉତ୍ସବର ପୂର୍ବପ୍ରସ୍ତୁତି ସ୍ବରୂପ, ବୁଧବାର ସନ୍ଧ୍ୟାରେ ପ୍ରଭୁ ହନୁମାନ ବିଭିନ୍ନ ପଡ଼ାର କମିଟି ଯଥା; ଝାଡ଼ୁଆପଡ଼ା, ମୁଦିପଡ଼ା, ବଡ଼ବଜାର ଓ ଠାକୁରପଡ଼ା ଆଦି ଅଞ୍ଚଳ ପାଇଁ ନିମନ୍ତ୍ରଣ ବାର୍ତ୍ତା ନେଇ ବାହାରିଥିଲେ।
ଝାଡ଼ୁଆପଡ଼ାର ପ୍ରସିଦ୍ଧ ଲୋକନାଥ ବାବାଙ୍କ ମନ୍ଦିରରେ ପୂଜା ପାଉଥିବା ବୀର ହନୁମାନ ଏହି ବିବାହର ସମସ୍ତ ନିମନ୍ତ୍ରଣ ଦାୟିତ୍ବ ତୁଲାଇଛନ୍ତି। ସେ ପାରମ୍ପରିକ ରୀତିନୀତି ଅନୁଯାୟୀ ବିଭିନ୍ନ ଦେବାଳୟକୁ ଯାଇ ‘ଗୁଆଗୁଣ୍ଡା’ (ଗୁଆନିଉତା) ଦେଇ ଦେବଦମ୍ପତିଙ୍କ ବିବାହ ଉତ୍ସବରେ ସାମିଲ ହେବାକୁ ସମସ୍ତଙ୍କୁ ଭକ୍ତିପୂତ ଆମନ୍ତ୍ରଣ ଜଣାଇଛନ୍ତି।ମହାପ୍ରଭୁ ହନୁମାନ ଏହି ନିମନ୍ତ୍ରଣ ପାଇଁ ଗୁଆ, ମିଷ୍ଟାନ୍ନ ଓ ଅନ୍ୟାନ୍ୟ ମାଙ୍ଗଳିକ ସାମଗ୍ରୀ ସାଙ୍ଗରେ ନେଇଥିଲେ।
ପାରମ୍ପରିକ ଦୁଲଦୁଲି ବଜା, ଘଣ୍ଟ, କାହାଳୀ ଓ ଶଙ୍ଖ ଧ୍ୱନିର ମହାମିଳନ ମଧ୍ୟରେ ଏକ ବିରାଟ ଶୋଭାଯାତ୍ରା ବାହାରିଥିଲା। ପ୍ରଭୁ ହନୁମାନ ବ୍ରହ୍ମପୁରା ମନ୍ଦିର, ଯଜ୍ଞବରାହ ମନ୍ଦିର, ବଂବରାଡ଼ ବାଲୁଙ୍କେଶ୍ୱର ବାବା ମନ୍ଦିର, ଗୌର ମଠ, ଦଧิବାମନ ମନ୍ଦିର, ଟିମିନି ଗୁଡ଼ି, ଭାଗବତ ମନ୍ଦିର ଓ ହୁତାପଡ଼ା ମନ୍ଦିର ପର୍ଯ୍ୟନ୍ତ ଯାଇ ସମସ୍ତ ଦେବାଦେବୀଙ୍କୁ ବିବାହରେ ଯୋଗଦେବାକୁ ନିମନ୍ତ୍ରଣ କରିଥିଲେ।ଏହାସହିତ, ଏହି ଦେବ ବିବାହର ମୁଖ୍ୟ ସାକ୍ଷୀ ହେବା ପାଇଁ ଝାଡୁଆପଡ଼ା ଓ ବ୍ରହ୍ମପୁରା ମନ୍ଦିରର ପ୍ରଭୁ ଗୋପୀନାଥଜୀଉଙ୍କୁ ମଧ୍ୟ ହନୁମାନ ବିଶେଷ ଭାବେ ଆମନ୍ତ୍ରିତ କରିଛନ୍ତି।
ଏହି ପାରମ୍ପରିକ ଗୁଆନିଉତା ପର୍ବ ଶେଷ ହେବା ପରେ, ସମସ୍ତ ଭକ୍ତ ଏବେ ଆଜି ରାତିର ମହାଦେବଙ୍କ ମନୋଲୋଭା ବରଯାତ୍ରୀ ଏବଂ ଶିବ-ପାର୍ବତୀଙ୍କ ଶୁଭ ବିବାହ ଉତ୍ସବକୁ ଚାହିଁ ରହିଛନ୍ତି।