୨୬ ଜୁଆଡ଼ି ଗିରଫ, ୧୧ ଲକ୍ଷରୁ ଅଧିକ ଟଙ୍କା ସହ ଗାଡ଼ି ଓ ମୋବାଇଲ୍ ଜବତ
ସୁନ୍ଦରଗଡ଼: ଓଡ଼ିଶା-ଛତିଶଗଡ଼ ସୀମାନ୍ତ ହେମଗିରି ଥାନା ଅନ୍ତର୍ଗତ ଜାମଝରିଆ ଜଙ୍ଗଲରେ ଚାଲିଥିବା ଏକ ବଡ଼ ଧରଣର ବେଆଇନ ଜୁଆ ଆଡ୍ଡା ଉପରେ ଚଢ଼ାଉ କରିଛି ସୁନ୍ଦରଗଡ଼ ପୋଲିସ।ଏକ ଗୁପ୍ତ ସୂଚନାକୁ ଆଧାର କରି ସୁନ୍ଦରଗଡ଼ ଏସପି ଅମ୍ରିତପାଲ କୌରଙ୍କ ନିର୍ଦ୍ଦେଶକ୍ରମେ ପୋଲିସ ଏହି ଅଧରାତିଆ ଚଢ଼ାଉ କରିଥିଲା। ଏହି ସଫଳ ଅପରେସନ ବେଳେ ପୋଲିସ ୨୬ ଜଣ ଜୁଆଡ଼ିଙ୍କୁ ଗିରଫ କରିବା ସହ ସେମାନଙ୍କ ପାଖରୁ ବିପୁଳ ପରିମାଣର ନଗଦ ଟଙ୍କା ଏବଂ ସାମଗ୍ରୀ ଜବତ କରିଛି।
ଜବତ ସାମଗ୍ରୀର ବିବରଣୀ:
- ନଗଦ ଟଙ୍କା: ୧୧,୧୬,୯୦୦ ଟଙ୍କା
- ଗାଡ଼ି: ୯ଟି ମୋବାଇଲ୍ ବାଇକ୍ ଓ ୩ଟି କାର୍
- ମୋବାଇଲ୍: ୩୧ଟି ସ୍ମାର୍ଟଫୋନ୍
- ଅନ୍ୟାନ୍ୟ: ବହୁ ପରିମାଣର ତାସ ପତ୍ତା
ଘଟଣା ସମ୍ପର୍କରେ ସୂଚନା ଦେଇ ଏସପି ଅମ୍ରିତପାଲ କୌର କହିଛନ୍ତି ଯେ, ନିର୍ଭରଯୋଗ୍ୟ ସୂତ୍ରରୁ ଖବର ପାଇ ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରି ଜଙ୍ଗଲ ଭିତରେ ଥିବା ଏହି ଗୁପ୍ତ ଆଡ୍ଡା ଉପରେ ଚଢ଼ାଉ କରିଥିଲା। ଜିଲ୍ଲାରେ ଚାଲିଥିବା ଏଭଳି ବେଆଇନ କାର୍ଯ୍ୟକଳାପ ବିରୋଧରେ ଆଗକୁ ମଧ୍ୟ ଏଭଳି କଡ଼ା କାର୍ଯ୍ୟାନୁଷ୍ଠାନ ଜାରି ରହିବ ବୋଲି ସେ ସ୍ପଷ୍ଟ କରିଛନ୍ତି।
ସୁନ୍ଦରଗଡ଼ ଜିଲ୍ଲାରେ ସମ୍ପ୍ରତି ସମୟରେ ଜୁଆ ଆଡ୍ଡା ବିରୋଧରେ ଏହା ସବୁଠାରୁ ବଡ଼ ପୋଲିସ କାର୍ଯ୍ୟାନୁଷ୍ଠାନ। ଏହି ଜୁଆ ର୍ୟାକେଟ୍ ପଛରେ ଆଉ କାହାର ହାତ ଅଛି ଏବଂ ଏହାର ନେଟୱର୍କ କେତେ ଦୂର ଲମ୍ବିଛି, ସେ ନେଇ ପୋଲିସ ଅଧିକ ତଦନ୍ତ ଚଳାଇଛି। ଏହା ସହ ଦୁର୍ଗମ ଅଞ୍ଚଳରେ ଚାଲୁଥିବା ଜୁଆ ଆଡ୍ଡାଗୁଡ଼ିକ ଉପରେ ପୋଲିସର ତୀକ୍ଷ୍ଣ ନଜର ରହିଛି ଏବଂ ସେଠାରେ ମଧ୍ୟ ସମାନ ଧରଣର ଚଢ଼ାଉ କରାଯିବ ବୋଲି କର୍ତ୍ତୃପକ୍ଷ ଚେତାବନୀ ଦେଇଛନ୍ତି।