ବରମୁଣ୍ଡା ବସ୍ ଟର୍ମିନାଲରେ ହାଇଡ୍ରାମା: NGO କବଳରୁ ଖସି ବସ୍ ତଳେ ଲୁଚିଲେ ୩ ମହିଳା, ସୁରକ୍ଷାକର୍ମୀଙ୍କ ଦ୍ୱାରା ଉଦ୍ଧାର
ଭୁବନେଶ୍ୱର: ବରମୁଣ୍ଡାସ୍ଥିତ ବାବାସାହେବ ଭୀମରାଓ ଆମ୍ବେଦକର ବସ୍ ଟର୍ମିନାଲ (BSABT) ପରିସରରେ ଗତ ସୋମବାର ବିଳମ୍ବିତ ରାତିରେ ଏକ ହୃଦୟବିଦାରକ ଘଟଣା ଘଟିଛି। ଜଣେ ନାବାଳିକାଙ୍କ ସମେତ ୩ ଜଣ ମହିଳାଙ୍କୁ ସେମାନଙ୍କ ଇଚ୍ଛା ବିରୁଦ୍ଧରେ ଜିଲ୍ଲା ବାହାରକୁ ଚାଲାଣ କରାଯାଉଥିବା ବେଳେ, ସେମାନେ ସେଠାରୁ ଖସିଯାଇ ସୁରକ୍ଷାକର୍ମୀଙ୍କ ସହାୟତାରେ ଉଦ୍ଧାର ହୋଇଛନ୍ତି। ଏହି ଘଟଣାକୁ ନେଇ ବସ୍ ଟର୍ମିନାଲ ପରିସରରେ କିଛି ସମୟ ପାଇଁ ଉତ୍ତେଜନା ପ୍ରକାଶ ପାଇଥିଲା।
ପ୍ରାଥମିକ ସୂଚନା ଅନୁଯାୟୀ, ଏକ ଆଶ୍ରମ ସହ ଜଡ଼ିତ ସ୍ୱେଚ୍ଛାସେବୀ ସଂଗଠନ (NGO) ର କିଛି ସଦସ୍ୟ ଏହି ମହିଳାମାନଙ୍କୁ ଜବରଦସ୍ତ କେଉଁ ଆଡ଼େ ନେଇଯାଉଥିଲେ। ବିପଦର ଆଶଙ୍କା କରି ମହିଳାମାନେ ସେମାନଙ୍କ କବଳରୁ କୌଶଳକ୍ରମେ ଖସି ଆସି ବସ୍ ଟର୍ମିନାଲ ଭିତରକୁ ଦୌଡ଼ି ପଳାଇଥିଲେ। ନିଜକୁ ବଞ୍ଚାଇବା ପାଇଁ ସେମାନେ ଟର୍ମିନାଲର ବିଭିନ୍ନ ସ୍ଥାନରେ ଏବଂ ସେଠାରେ ଠିଆ ହୋଇଥିବା ବସ୍ ତଳେ ଲୁଚିବାକୁ ଚେଷ୍ଟା କରିଥିଲେ। ଏହି ସମୟରେ NGO ର କିଛି ମହିଳା କର୍ମଚାରୀ ସେମାନଙ୍କୁ ଗୋଡ଼ାଉଥିବା ଦେଖି ଯାତ୍ରୀ ଏବଂ ସେଠାରେ ଥିବା ସୁରକ୍ଷାକର୍ମୀମାନେ ସତର୍କ ହୋଇଯାଇଥିଲେ।
ଟର୍ମିନାଲର ସୁରକ୍ଷାକର୍ମୀମାନେ ତୁରନ୍ତ ତତ୍ପରତା ଦେଖାଇ ମହିଳାମାନଙ୍କୁ ଉଦ୍ଧାର କରିବା ସହ ବରମୁଣ୍ଡା ବସ୍ ଟର୍ମିନାଲ ପୋଲିସ ଆଉଟପୋଷ୍ଟକୁ ହସ୍ତାନ୍ତର କରିଥିଲେ। ପଚରାଉଚରା ସମୟରେ ମହିଳାମାନେ ସେମାନଙ୍କୁ ଜବରଦସ୍ତ ନିଆଯାଉଥିବା ସ୍ୱୀକାର କରିଛନ୍ତି। ସୁରକ୍ଷା ଦୃଷ୍ଟିରୁ ପୋଲିସ ସେମାନଙ୍କୁ ଏକ ସର୍ଟ-ଷ୍ଟେ ହୋମ୍ କୁ ପଠାଇ ଦେଇଛି।
ଏହି ସମ୍ବେଦନଶୀଳ ମାମଲାରେ ପୋଲିସ ବର୍ତ୍ତମାନ ତଦନ୍ତ ଜାରି ରଖିଛି। ଘଟଣାର ସତ୍ୟାସତ୍ୟ ପରଖିବା ଏବଂ ଅଭିଯୁକ୍ତମାନଙ୍କୁ ଚିହ୍ନଟ କରିବା ପାଇଁ ବସ୍ ଟର୍ମିନାଲ ଏବଂ ଆଖପାଖ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ୍କୁ ଯାଞ୍ଚ କରାଯାଉଛି। ଏହି ଜବରଦସ୍ତ ଅଟକ ବା ଅପହରଣ ଚେଷ୍ଟା ପଛରେ କେଉଁମାନଙ୍କର ହାତ ରହିଛି, ସେ ନେଇ ପୋଲିସ ସ୍ଥାନୀୟ ପ୍ରତ୍ୟକ୍ଷଦର୍ଶୀ ଓ ସଂପୃକ୍ତ ସଂଗଠନ ବିଷୟରେ ଅଧିକ ଖୋଜତଲାସ ଚଳାଇଛି। ବ୍ୟସ୍ତବହୁଳ ଜନଗହଳି ସ୍ଥାନରେ ସୁରକ୍ଷାକର୍ମୀଙ୍କ ତତ୍କାଳ କାର୍ଯ୍ୟାନୁଷ୍ଠାନ ଯୋଗୁଁ ଆଜି ଏକ ବଡ଼ ଅଘଟଣ ଟଳିଯାଇଛି।