ଚଣ୍ଡିଗଡ଼/ନୂଆଦିଲ୍ଲୀ: ରାଜନୈତିକ ପରିଦୃଶ୍ୟରେ ବଡ଼ ପରିବର୍ତ୍ତନ ଦେଖାଯାଇଛି। ଆମ ଆଦମୀ ପାର୍ଟି (ଆପ୍)ର ରାଜ୍ୟସଭା ସାଂସଦ ରାଘବ ଚଢ଼ା ଦଳ ଛାଡ଼ିବା ସହ ବିଜେପିରେ ଯୋଗଦେବାକୁ ସ୍ପଷ୍ଟ କରିଛନ୍ତି। ସନ୍ଦୀପ ପାଠକ ଏବଂ ଅଶୋକ ମିତ୍ତଲଙ୍କ ସହ ସେମାନେ ମଧ୍ୟ ବିଜେପି ଶିବିରରେ ସାମିଲ ହେବେ ବୋଲି ସୂଚନା ମିଳିଛି।
ରାଘବ ଚଢ଼ା ଦଳ ଛାଡ଼ିବା ସମୟରେ ‘ଆପ୍’ ଉପରେ କଟୁ ଆକ୍ରମଣ କରି କହିଛନ୍ତି ଯେ, ଏହି ଦଳ ଦେଶର ମଙ୍ଗଳ ପାଇଁ ନୁହେଁ, ବରଂ କେବଳ ବ୍ୟକ୍ତିଗତ ସ୍ୱାର୍ଥ ପୂରଣରେ ବ୍ୟସ୍ତ ଅଛି। ଦୁର୍ନୀତି ବିରୋଧରେ ଲଢ଼ିବା ଲକ୍ଷ୍ୟରେ ଗଠିତ ହୋଇଥିବା ଏହି ଦଳ ବର୍ତ୍ତମାନ ମୂଳ ଆଦର୍ଶରୁ ଦୂରେ ସରିଯାଇଛି ବୋଲି ସେ ଅଭିଯୋଗ କରିଛନ୍ତି।
ସେ ଆହୁରି ଦାବି କରିଛନ୍ତି ଯେ, ଆଗାମୀ ଦିନରେ ‘ଆପ୍’ର ଦୁଇ-ତୃତୀୟାଂଶ ସାଂସଦ ବିଜେପିରେ ଯୋଗଦେବାର ସମ୍ଭାବନା ରହିଛି। ନିଜକୁ ଦଳର ପ୍ରତିଷ୍ଠାତା ସଦସ୍ୟ ବୋଲି ଉଲ୍ଲେଖ କରି ସେ କହିଛନ୍ତି, ଦଳ ପାଇଁ ଅନେକ ପରିଶ୍ରମ କରିଥିଲେ ମଧ୍ୟ ବର୍ତ୍ତମାନ ତାହାର ଦିଗ ଓ ନୀତି ତାଙ୍କୁ ନିରାଶ କରିଛି। ସେ ପ୍ରାୟ ଗତ ଏକ ବର୍ଷ ଧରି ଦଳୀୟ କାର୍ଯ୍ୟକଳାପରୁ ଦୂରେ ଥିବା କଥା ମଧ୍ୟ କହିଛନ୍ତି।
ଏପରିକି, କିଛି ଦିନ ପୂର୍ବରୁ ପଞ୍ଜାବ ସରକାରଙ୍କ ପକ୍ଷରୁ ତାଙ୍କୁ ଦିଆଯାଇଥିବା ‘Z+’ ବର୍ଗର ସୁରକ୍ଷା ବ୍ୟବସ୍ଥା ହଠାତ୍ ପ୍ରତ୍ୟାହାର କରାଯାଇଥିଲା। ପରେ କେନ୍ଦ୍ର ପକ୍ଷରୁ ତାଙ୍କୁ ନୂତନ ସୁରକ୍ଷା ବ୍ୟବସ୍ଥା ଦିଆଯାଇଛି। ଏହାକୁ ନେଇ ଦଳୀୟ ଅସନ୍ତୋଷ ବଢ଼ୁଥିବା ଚର୍ଚ୍ଚା ହେଉଛି।
ଏହା ସହିତ, ଚଳିତ ମାସରେ ତାଙ୍କୁ ରାଜ୍ୟସଭାରେ ଦଳର ଉପନେତା ପଦରୁ ବି ହଟାଯାଇଥିଲା। ଦଳର କିଛି ବରିଷ୍ଠ ନେତା ତାଙ୍କ ଉପରେ ଅଭିଯୋଗ କରିଥିଲେ ଯେ, ଦଳ ଜଟିଳ ପରିସ୍ଥିତିରେ ଥିବା ବେଳେ ସେ ଆକ୍ରମଣାତ୍ମକ ଭୂମିକା ନେବାରେ ବିଫଳ ହୋଇଥିଲେ।
ଏହି ସମସ୍ତ ଘଟଣା ପରେ ରାଘବ ଚଢ଼ା ଏବଂ ‘ଆପ୍’ ନେତୃତ୍ୱ ମଧ୍ୟରେ ମତଭେଦ ସାର୍ବଜନୀନ ହୋଇପଡ଼ିଛି। ଏକ ପଟେ ଦଳ ତାଙ୍କ ନିରବତାକୁ ନେଇ ପ୍ରଶ୍ନ ଉଠାଉଥିବା ବେଳେ, ଅନ୍ୟପଟେ କେନ୍ଦ୍ରୀୟ ସୁରକ୍ଷା ପ୍ରଦାନ ରାଜନୈତିକ ମଞ୍ଚରେ ନୂତନ ଚର୍ଚ୍ଚାକୁ ଜନ୍ମ ଦେଇଛି।