Uddhav Thackeray: ଜେନ୍-ଜେଡ୍ଙ୍କୁ ଛତ୍ରପତି ଶିବାଜୀ ମହାରାଜଙ୍କ ସହ ତୁଳନା କଲେ ଉଦ୍ଧବ ଠାକରେ, ଯୁବପିଢ଼ିଙ୍କ ସାମର୍ଥ୍ୟକୁ କଲେ ପ୍ରଶଂସା
ମୁମ୍ବାଇ: ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେ ଜେନ୍-ଜେଡ୍ (Gen Z) ପିଢ଼ିଙ୍କୁ ନେଇ ଦେଇଥିବା ଏକ ବୟାନକୁ କେନ୍ଦ୍ର କରି ଚର୍ଚ୍ଚା ବଢ଼ିଛି। ସେ ଯୁବପିଢ଼ିଙ୍କ ସାହସ ଓ କ୍ଷମତାର ପ୍ରଶଂସା କରି ସେମାନଙ୍କୁ ଛତ୍ରପତି ଶିବାଜୀ ମହାରାଜ ଓ ସନ୍ଥ ଜ୍ଞାନେଶ୍ୱରଙ୍କ ସହ ତୁଳନା କରିଛନ୍ତି।
ଉଦ୍ଧବ ଠାକରେ କହିଛନ୍ତି ଯେ, ବର୍ତ୍ତମାନର ଯୁବପିଢ଼ିଙ୍କୁ କେହି କେହି ଅପମାନଜନକ ଭାବେ “କକ୍ରୋଚ୍” ବୋଲି କହୁଥିବାବେଳେ ଇତିହାସରେ ମଧ୍ୟ ମରାଠା ଯୋଦ୍ଧାମାନଙ୍କୁ ଅବମାନନା କରି “ମୂଷା” ବୋଲି କୁହାଯାଇଥିଲା। ତେବେ ସେହି ଯୋଦ୍ଧାମାନେ ପରବର୍ତ୍ତୀ ସମୟରେ ନିଜର ସାହସ ଓ ପରାକ୍ରମର ପ୍ରମାଣ ଦେଇଥିଲେ ବୋଲି ସେ କହିଛନ୍ତି।
ଶିବାଜୀ ମହାରାଜଙ୍କ ଉଦାହରଣ ଦେଲେ ଉଦ୍ଧବ
ଉଦ୍ଧବ ଠାକରେଙ୍କ କହିବା ଅନୁଯାୟୀ, ଯେଉଁ ଯୁବକ-ଯୁବତୀମାନଙ୍କୁ ଆଜି ଅବମୂଲ୍ୟାୟନ କରାଯାଉଛି, ସେମାନେ ହେଉଛନ୍ତି ଜେନେରେସନ୍ ଜେଡ୍, ଅର୍ଥାତ୍ ପ୍ରାୟ ୧୩-୧୪ ବର୍ଷରୁ ୨୭-୨୮ ବର୍ଷ ବୟସର ଯୁବପିଢ଼ି। ସେ ପ୍ରଶ୍ନ କରିଥିଲେ, ୧୭ ବର୍ଷ ବୟସରେ ତୋର୍ଣ୍ଣା ଦୁର୍ଗ ଜୟ କରିଥିବା ଛତ୍ରପତି ଶିବାଜୀ ମହାରାଜ ମଧ୍ୟ ସେହି ବୟସର ଯୁବକ ନଥିଲେ କି?
ସେ କହିଥିଲେ, କମ୍ ବୟସରେ ମଧ୍ୟ ଶିବାଜୀ ମହାରାଜ ବଡ଼ ଚ୍ୟାଲେଞ୍ଜକୁ ସାମ୍ନା କରିଥିଲେ ଏବଂ ନିଜର ନେତୃତ୍ୱ ଓ ସାହସର ପରିଚୟ ଦେଇଥିଲେ। ସେହିଭଳି ଆଜିର ଯୁବପିଢ଼ିଙ୍କ କ୍ଷମତାକୁ କେବଳ ବୟସ ଆଧାରରେ କମ୍ ଆକଳନ କରିବା ଉଚିତ୍ ନୁହେଁ।
ଯୁବପିଢ଼ିଙ୍କୁ ଅଣଦେଖା ନ କରିବାକୁ ଆହ୍ୱାନ
ଉଦ୍ଧବ ଠାକରେ କହିଛନ୍ତି ଯେ, ବର୍ତ୍ତମାନର ଯୁବପିଢ଼ି ନିଜ ଅଧିକାର ଓ ଦାବିକୁ ଦୃଢ଼ତାର ସହ ଉପସ୍ଥାପନ କରୁଛନ୍ତି। ତେଣୁ ସେମାନଙ୍କୁ ଅବହେଳା କିମ୍ବା ଦୁର୍ବଳ ଭାବିବା ପରିବର୍ତ୍ତେ ସେମାନଙ୍କ ଚିନ୍ତାଧାରା ଓ ସାମର୍ଥ୍ୟକୁ ସମ୍ମାନ ଦେବା ଆବଶ୍ୟକ ବୋଲି ସେ ମତ ପ୍ରକାଶ କରିଛନ୍ତି।