ନୂଆଦିଲ୍ଲୀ: ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି)ର ସହଯୋଗୀ ସଦସ୍ୟ (Associate Members) ନିର୍ଦ୍ଦେଶକ ପଦ ପାଇଁ ହୋଇଥିବା ନିର୍ବାଚନରେ ଗୁରୁମୂର୍ତ୍ତି ପଲାନି, ମୁବାସିର ଉସ୍ମାନି ଏବଂ ରୁଡି ଭାନ୍ ଭୁରେନ୍ ବିଜୟୀ ହୋଇଛନ୍ତି। ଅନ୍ୟପକ୍ଷରେ ଆଇସିସିର ବର୍ତ୍ତମାନର ଉପାଧ୍ୟକ୍ଷ (ଡେପୁଟି ଚେୟାରମ୍ୟାନ୍) ଇମ୍ରାନ୍ ଖୱାଜାଙ୍କ ପରାଜୟ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି।
ବୁଧବାର ସ୍କଟଲାଣ୍ଡର ଏଡିନବର୍ଗରେ ଆୟୋଜିତ ଆଇସିସି ବାର୍ଷିକ ସମ୍ମିଳନୀ ଅବସରରେ ଏହି ନିର୍ବାଚନ ଅନୁଷ୍ଠିତ ହୋଇଥିଲା। ଭୋଟ୍ ଗଣନାରେ ଗୁରୁମୂର୍ତ୍ତି ପଲାନି ସର୍ବାଧିକ ୩୫ ଭୋଟ୍ ପାଇଥିବା ବେଳେ ମୁବାସିର ଉସ୍ମାନି ଓ ରୁଡି ଭାନ୍ ଭୁରେନ୍ ୨୬ ଲେଖାଏଁ ଭୋଟ୍ ହାସଲ କରିଥିଲେ। ଇମ୍ରାନ୍ ଖୱାଜା ୨୩ ଓ ମହିନ୍ଦା ଭାଲିପୁରମ ୧୯ ଭୋଟ୍ ପାଇଥିଲେ।
ପଲାନି ଓ ଭାନ୍ ଭୁରେନ୍ ପ୍ରଥମ ଥର ପାଇଁ ୧୭ ସଦସ୍ୟ ବିଶିଷ୍ଟ ଆଇସିସି ବୋର୍ଡରେ ସ୍ଥାନ ପାଇଥିବା ବେଳେ ଦୀର୍ଘଦିନ ଧରି ଆଇସିସି ପ୍ରଶାସନ ସହ ଜଡ଼ିତ ଥିବା ଇମ୍ରାନ୍ ଖୱାଜାଙ୍କ ପରାଜୟ ନିର୍ବାଚନର ସବୁଠାରୁ ବଡ଼ ଚର୍ଚ୍ଚାର ବିଷୟ ପାଲଟିଛି।
ସୂଚନାଯୋଗ୍ୟ, ରବିବାର ଲର୍ଡସରେ ଆୟୋଜିତ ଟ୍ବେଣ୍ଟି-୨୦ ବିଶ୍ୱକପ୍ ଫାଇନାଲ୍ରେ ଆଇସିସି ଅଧ୍ୟକ୍ଷ ଜୟ ଶାହଙ୍କ ସହ ସମସ୍ତ ଶୀର୍ଷ ଅଧିକାରୀ ଉପସ୍ଥିତ ଥିଲେ। ଏହାପରେ ସେମାନେ ବାର୍ଷିକ ସମ୍ମିଳନୀରେ ଯୋଗଦେବା ପାଇଁ ସ୍କଟଲାଣ୍ଡ ଗସ୍ତ କରିଥିଲେ। ଚାରି ଦିନିଆ ଏହି ସମ୍ମିଳନୀ ଜୁଲାଇ ୧୧ରେ ଶେଷ ହେବ।