ନୂଆଦିଲ୍ଲୀ: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ୨୦୨୬ର ୩୫ତମ ମ୍ୟାଚ୍ରେ ଦମଦାର ପ୍ରଦର୍ଶନ କରି ପଞ୍ଜାବ କିଙ୍ଗ୍ସ ୬ ୱିକେଟ୍ରେ ଦିଲ୍ଲୀ କ୍ୟାପିଟାଲ୍ସକୁ ପରାସ୍ତ କରିଛି। ଅରୁଣ ଜେଟଲୀ ଷ୍ଟାଡିୟମରେ ଖେଳାଯାଇଥିବା ଏହି ହାଇସ୍କୋରିଂ ମ୍ୟାଚ୍ରେ ଦୁଇ ଦଳ ମଧ୍ୟରେ ରନ୍ର ବର୍ଷା ଦେଖିବାକୁ ମିଳିଥିଲା।
୨୬୫ ରନ୍ର ବିଶାଳ ଲକ୍ଷ୍ୟ ପଛୁଆ କରିବାକୁ ନାମିଥିବା ପଞ୍ଜାବ ଦଳ ୧୮.୫ ଓଭରରେ ୪ଟି ୱିକେଟ୍ ହରାଇ ସହଜରେ ଲକ୍ଷ୍ୟ ପୂରଣ କରିଥିଲା। ଦଳର ଓପେନର ପ୍ରିୟାଂଶ ଆର୍ଯ୍ୟ ଏବଂ ପ୍ରଭସିମରନ ସିଂହ ଆକ୍ରମଣାତ୍ମକ ଆରମ୍ଭ ଦେଇ ପ୍ରଥମ ୱିକେଟ୍ ପାଇଁ ୧୨୬ ରନ୍ର ଭାଗିଦାରୀ ଗଠନ କରିଥିଲେ। ପ୍ରିୟାଂଶ ୧୭ଟି ବଲ୍ରେ ୪୩ ରନ୍ କରିଥିବା ବେଳେ ପ୍ରଭସିମରନ ୨୬ଟି ବଲ୍ରେ ୭୬ ରନ୍ର ଦମଦାର ପାରି ଖେଳିଥିଲେ।
ପରବର୍ତ୍ତୀ ଖେଳାଳିମାନେ ମଧ୍ୟ ଭଲ ଅବଦାନ ରଖିଥିଲେ। କୁପର କନୋଲି ୧୭ ରନ୍ ଏବଂ ନେହାଲ ୱାଧୀରା ୨୫ ରନ୍ କରି ଦଳକୁ ଜିତ ଦିଗରେ ନେଇଥିଲେ। ଏହି ଜିତ ସହ ପଞ୍ଜାବ ପଏଣ୍ଟ ଟେବୁଲରେ ନିଜ ଶୀର୍ଷ ସ୍ଥାନକୁ ଅବିକଳ ରଖିଛି।
ଏହା ପୂର୍ବରୁ ଟସ୍ ଜିତି ଦିଲ୍ଲୀ କ୍ୟାପିଟାଲ୍ସ ପ୍ରଥମେ ବ୍ୟାଟିଂ କରି ୨୦ ଓଭରରେ ୨ଟି ୱିକେଟ୍ ହରାଇ ୨୬୪ ରନ୍ର ବିଶାଳ ସ୍କୋର କରିଥିଲା। ଦଳର ପକ୍ଷରୁ କେଏଲ୍ ରାହୁଲ ଅପରାଜିତ ଥାଇ ୬୭ଟି ବଲ୍ରେ ୧୫୨ ରନ୍ର ଅଦ୍ଭୁତ ପାରି ଖେଳିଥିଲେ। ସେ ୧୬ଟି ଚୋକା ଓ ୯ଟି ଛକା ମାରିଥିଲେ। ତାଙ୍କୁ ଭଲ ସହଯୋଗ ଦେଇଥିଲେ ନିତିଶ ରାଣା, ଯିଏ ୪୪ଟି ବଲ୍ରେ ଚମତ୍କାର ଅର୍ଧଶତକ କରିଥିଲେ।
କିନ୍ତୁ ଏତେ ବଡ଼ ସ୍କୋର ସତ୍ତ୍ୱେ ଦିଲ୍ଲୀର ବୋଲିଂ ବିଭାଗ ପଞ୍ଜାବର ଆକ୍ରମଣାତ୍ମକ ବ୍ୟାଟିଂ ସାମ୍ନା କରିପାରିଲା ନାହିଁ। ଫଳରେ ମ୍ୟାଚ୍ଟି ପଞ୍ଜାବ କିଙ୍ଗ୍ସଙ୍କ ପକ୍ଷରେ ସହଜ ଜିତରେ ପରିଣତ ହୋଇଥିଲା।