ଗୋଲପାରା: ଅସମର ଏକ ସରକାରୀ ସ୍କୁଲରେ ଟିଫିନରେ ‘ବିଫ୍’ (ଗୋମାଂସ) ନେଇ ଆସିବା ଘଟଣାକୁ କେନ୍ଦ୍ର କରି ଏବେ ଆଇନଗତ ଏବଂ ସାମ୍ପ୍ରଦାୟିକ ବିବାଦ ଦେଖାଦେଇଛି। ଜଣେ ମୁସଲିମ ଛାତ୍ରଙ୍କ ମା’ଙ୍କୁ ପୋଲିସ ଗିରଫ କରିଥିବା ବେଳେ ଘଟଣାର ଅଧିକ ତଦନ୍ତ ଜାରି ରହିଛି।
ସୂଚନା ଅନୁଯାୟୀ, ଏହି ସମ୍ପୂର୍ଣ୍ଣ ଘଟଣାଟି ଅସମର ଗୋଲପାରା ଜିଲ୍ଲାର ଏକ ସରକାରୀ ସ୍କୁଲରେ ଘଟିଛି। ଗତ ୫ ଜୁନ୍ ୨୦୨୬ରେ ନବମ ଶ୍ରେଣୀରେ ପଢୁଥିବା ୫ ଜଣ ମୁସଲିମ ଛାତ୍ର ନିଜ ଟିଫିନରେ ବିଫ୍ ନେଇ ସ୍କୁଲକୁ ଆସିଥିଲେ। ମଧ୍ୟାହ୍ନ ଭୋଜନ ସମୟରେ ଏହି ୫ ଜଣ ଛାତ୍ର ନିଜ ଶ୍ରେଣୀରେ ପଢୁଥିବା ଦୁଇ ଜଣ ହିନ୍ଦୁ ଛାତ୍ରଙ୍କୁ ଜବରଦସ୍ତି ସେହି ମାଂସ ଖୁଆଇବାକୁ ଚେଷ୍ଟା କରିଥିବା ଅଭିଯୋଗ ହୋଇଛି।
ଛାତ୍ରମାନେ ଘରକୁ ଫେରିବା ପରେ ନିଜ ପରିବାର ଲୋକଙ୍କୁ ଏହି ବିଷୟରେ ଜଣାଇଥିଲେ। ଏହାକୁ ନେଇ ହିନ୍ଦୁ ଛାତ୍ରଙ୍କ ପରିବାର ପକ୍ଷରୁ ପ୍ରବଳ ବିରୋଧ କରାଯାଇଥିଲା। ସ୍କୁଲରେ ସବୁ ଧର୍ମର ପିଲା ପଢୁଥିବା ବେଳେ ଟିଫିନରେ ବିଫ୍ ଆଣିବାକୁ କେମିତି ଅନୁମତି ମିଳିଲା ବୋଲି ସେମାନେ ପ୍ରଶ୍ନ କରିଥିଲେ।ଏହାପରେ, ପୀଡ଼ିତ ଛାତ୍ରଙ୍କ ପରିବାର ପକ୍ଷରୁ ଥାନାରେ ଏକ ଏଫ୍ଆଇଆର୍ ଦାୟର କରାଯାଇଥିଲା। ମୁସଲିମ ଛାତ୍ରମାନଙ୍କ ପିତାମାତା ଉଦ୍ଦେଶ୍ୟମୂଳକ ଭାବେ ଟିଫିନରେ ବିଫ୍ ପଠାଇ ଧାର୍ମିକ ଭାବନାକୁ ଆଘାତ ଦେବା ସହ ଉତ୍ତେଜନା ସୃଷ୍ଟି କରିବାକୁ ଚେଷ୍ଟା କରିଛନ୍ତି ବୋଲି ସେମାନେ ଅଭିଯୋଗ କରିଥିଲେ।
ଏଫ୍ଆଇଆର୍ ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରି ପୋଲିସ ସମ୍ପୃକ୍ତ ୫ ଜଣ ମୁସଲିମ ଛାତ୍ର ଏବଂ ସେମାନଙ୍କ ପିତାମାତାଙ୍କୁ ଥାନାକୁ ଡକାଇ ପଚରାଉଚରା କରିଥିଲା। ପଚରାଉଚରା ପରେ ପୋଲିସ ଆସାମ କ୍ୟାଟଲ ପ୍ରିଜରଭେସନ ଆକ୍ଟ (Assam Cattle Preservation Act) ଅନୁଯାୟୀ ଜଣେ ମୁସଲିମ ଛାତ୍ରଙ୍କ ମା’ଙ୍କୁ ଗିରଫ କରିଛି। ଗିରଫ ହୋଇଥିବା ମହିଳା ଜଣକ ହେଉଛନ୍ତି ନୂର ସାହିଦା ବେଗମ୍।
ଅସମରେ ଗୋବଂଶ ଏବଂ ଅନ୍ୟ ଗୋପାଳନ ପଶୁମାନଙ୍କ ହତ୍ୟା ତଥା ଗୋମାଂସ ଭକ୍ଷଣ ଉପରେ ଆଇନଗତ କଟକଣା ରହିଛି ଏବଂ ଏହାକୁ ଏକ ଗମ୍ଭୀର ଅପରାଧ ଭାବେ ବିବେଚନା କରାଯାଏ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିବାରୁ ପୋଲିସ ସୁରକ୍ଷା ବ୍ୟବସ୍ଥା ପ୍ରତି ନଜର ରଖିଛି।