ପଶ୍ଚିମବଙ୍ଗ ନିର୍ବାଚନ ଫଳାଫଳ: TMC ଓ ବିଜେପି ମଧ୍ୟରେ କଡ଼ା ଟକ୍କର; ପ୍ରଥମ ଦୁଇ ଘଣ୍ଟାରେ ବିଜେପି ସାମାନ୍ୟ ଆଗୁଆ
କୋଲକତା: ପଶ୍ଚିମବଙ୍ଗ ବିଧାନସଭା ନିର୍ବାଚନର ଭୋଟ ଗଣତି ଜାରି ରହିଥିବା ବେଳେ ଏବେ ସେଠାରେ ଏକ ରୋମାଞ୍ଚକର ପରିସ୍ଥିତି ସୃଷ୍ଟି ହୋଇଛି। ପ୍ରଥମ ଦୁଇ ଘଣ୍ଟାର ଟ୍ରେଣ୍ଡ୍ ଅନୁଯାୟୀ, ଶାସକ ତୃଣମୂଳ କଂଗ୍ରେସ (TMC) ଏବଂ ବିଜେପି ମଧ୍ୟରେ କଡ଼ା ଟକ୍କର ଦେଖିବାକୁ ମିଳୁଛି।
ସମୁଦାୟ ଆସନ ୨୯୩ ଥିବାବେଳେ, ୯୦ଟି ଆସନରେ ଆଗୁଆ ରହିଛି ବିଜେପି। ୮୨ଟି ଆସନରେ ଆଗୁଆ ଅଛି ତୃଣମୂଳ କଂଗ୍ରେସ । ୨ଟି ଆସନରେ ଆଗୁଆ କଂଗ୍ରେସ। ୨ଟି ଆସନରେ ଆଗୁଆ ସିପିଆଇ-ଏମ୍ (CPI-M)।
ନନ୍ଦିଗ୍ରାମରେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ଏହି ଗୁରୁତ୍ୱପୂର୍ଣ୍ଣ ଆସନରୁ ଆଗୁଆ ରହିଛନ୍ତି। ଭବାନୀପୁର ଆସନରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ଶୁଭେନ୍ଦୁ ଅଧିକାରୀଙ୍କ ମଧ୍ୟରେ କଡ଼ା ଲଢ଼େଇ ହେଉଛି। ତେବେ ସକାଳ ୧୦ଟା ପର୍ଯ୍ୟନ୍ତ ଏଠାରୁ କୌଣସି ସ୍ପଷ୍ଟ ଟ୍ରେଣ୍ଡ୍ ହସ୍ତଗତ ହୋଇନାହିଁ।
ବିଜେପିରୁ ଦିଲୀପ ଘୋଷ (ଖଡ଼ଗପୁର ସଦର), ଅଗ୍ନିମିତ୍ରା ପଲ୍ (ଆସାନସୋଲ ଦକ୍ଷିଣ) ଏବଂ ସ୍ୱପନ ଦାସଗୁପ୍ତ ପ୍ରମୁଖ ଆଗୁଆ ରହିଛନ୍ତି। ମାଲଦା ଜିଲ୍ଲାର ମାଲତୀପୁର ଓ ମୋଥାବାରୀ ଆସନରେ କଂଗ୍ରେସ ଆଗୁଆ ଅଛି। ମାଲତୀପୁରରୁ ପୂର୍ବତନ ସାଂସଦ ମୌସମ ବେନଜିର ନୁର ଆଗୁଆ ଅଛନ୍ତି। ମୁର୍ସିଦାବାଦ ଜିଲ୍ଲାର ଜଲଙ୍ଗୀ ଏବଂ ଡୋମକଲ ଆସନରେ CPI-M ପ୍ରାର୍ଥୀମାନେ ଆଗୁଆ ରହିଛନ୍ତି।
ମମତା ବାନାର୍ଜୀଙ୍କ କ୍ୟାବିନେଟର ଜଣେ ପ୍ରମୁଖ ମନ୍ତ୍ରୀ ଡକ୍ଟର ଶଶି ପାଞ୍ଜା ଶ୍ୟାମପୁକୁର ନିର୍ବାଚନମଣ୍ଡଳୀରୁ ସାମାନ୍ୟ ପଛୁଆ ରହିଛନ୍ତି। ଭୋଟ ଗଣତି ସମୁଦାୟ ୧୦ ରୁ ୨୬ ରାଉଣ୍ଡ ପର୍ଯ୍ୟନ୍ତ ଚାଲିବ, ତେଣୁ ଦିନ ବଢ଼ିବା ସହିତ ଚିତ୍ର ଅଧିକ ସ୍ପଷ୍ଟ ହେବ।ବର୍ତ୍ତମାନର ସ୍ଥିତି ଅନୁଯାୟୀ, ବିଜେପି ଓ ଟିଏମସି ମଧ୍ୟରେ ଲଢ଼େଇ ବେଶ୍ ସଂଘର୍ଷପୂର୍ଣ୍ଣ ରହିଛି।