ନୂଆଦିଲ୍ଲୀ: ପଶ୍ଚିମ ଏସିଆରେ ଜାରି ରହିଥିବା ଉତ୍ତେଜନା ମଧ୍ୟରେ ଇରାନର ବୈଦେଶିକ ମନ୍ତ୍ରୀ ଆବ୍ବାସ ଆରାଘଚି ଶୁକ୍ରବାର ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି। ଦିଲ୍ଲୀରେ ଆୟୋଜିତ ‘ବ୍ରିକ୍ସ’ ବୈଠକ ଅବସରରେ ସେ କହିଛନ୍ତି ଯେ, କେବଳ ସାମରିକ ଆକ୍ରମଣ କିମ୍ବା ଚାପ ସୃଷ୍ଟି କରି କୌଣସି ସମସ୍ୟାର ସମାଧାନ ସମ୍ଭବ ନୁହେଁ। ପଶ୍ଚିମ ଏସିଆରେ ସ୍ଥିରତା ଆଣିବା ପାଇଁ କୂଟନୀତି ହିଁ ଏକମାତ୍ର ପଥ ବୋଲି ସେ ମତ ପ୍ରକାଶ କରିଛନ୍ତି।
ଆରାଘଚି କହିଛନ୍ତି ଯେ, ଇରାନ ଉପରେ ଆମେରିକାର ଚାପ ପ୍ରୟୋଗ ନୀତି ବିଫଳ ହୋଇଛି। ୱାଶିଂଟନରୁ ଆସୁଥିବା ପରସ୍ପର ବିରୋଧୀ ସନ୍ଦେଶ ଅଞ୍ଚଳୀୟ ପରିସ୍ଥିତିକୁ ଆହୁରି ଜଟିଳ କରୁଛି। ସେହିପରି, ଆମେରିକା ମଧ୍ୟ ବୁଝି ସାରିଛି ଯେ ଆକ୍ରମଣାତ୍ମକ ଆଭିମୁଖ୍ୟ ଦ୍ୱାରା କିଛି ଲାଭ ହେବ ନାହିଁ।
ବିଶ୍ୱର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ତୈଳ ପରିବହନ ମାର୍ଗ ‘ହର୍ମୁଜ ପ୍ରଣାଳୀ’କୁ ନେଇ ଉପୁଜିଥିବା ଆଶଙ୍କା ସମ୍ପର୍କରେ ସେ ସ୍ପଷ୍ଟ କରି କହିଛନ୍ତି ଯେ, ଇରାନ ଏହି ପଥକୁ ସମ୍ପୂର୍ଣ୍ଣ ବନ୍ଦ କରିବାକୁ ଚାହୁଁନାହିଁ। ବନ୍ଧୁ ରାଷ୍ଟ୍ରମାନଙ୍କ ପାଇଁ ହର୍ମୁଜ ପ୍ରଣାଳୀ ସଦା ଖୋଲା ରହିବ। ତେବେ ଶତ୍ରୁ ଦେଶମାନଙ୍କ ପାଇଁ କଡ଼ା ନିୟନ୍ତ୍ରଣ ଜାରି ରହିବ ବୋଲି ସେ କହିଛନ୍ତି। ବନ୍ଧୁ ଦେଶର ଜାହାଜଗୁଡ଼ିକୁ ସୁରକ୍ଷିତ ଯାତାୟାତ ପାଇଁ ଇରାନୀ ସେନା ସହ ସମନ୍ୱୟ ରଖିବାକୁ ପଡ଼ିବ ବୋଲି ସେ ସୂଚନା ଦେଇଛନ୍ତି।
ଏହି ଅବସରରେ ଆରାଘଚି ବ୍ରିକ୍ସ ମଞ୍ଚରେ ଭାରତର ଭୂମିକାକୁ ପ୍ରଶଂସା କରିଥିଲେ। ବିଶ୍ୱ ସଂଘର୍ଷ ଓ ଶକ୍ତି ସୁରକ୍ଷା ପ୍ରସଙ୍ଗରେ ବ୍ରିକ୍ସର ସନ୍ତୁଳିତ ଆଭିମୁଖ୍ୟକୁ ସେ ସ୍ୱାଗତ କରିଛନ୍ତି। ଆନ୍ତର୍ଜାତୀୟ ଶକ୍ତି ଯୋଗାଣ ବ୍ୟବସ୍ଥାରେ ସ୍ଥିରତା ଆଣିବା ପାଇଁ ଇରାନ ସଦା ପ୍ରସ୍ତୁତ ବୋଲି ସେ ପୁନରୁକ୍ତି କରିଛନ୍ତି।