Jerusalem: Israel ଓ Lebanon ମଧ୍ୟରେ ଚାଲିଥିବା ଅସ୍ତ୍ରବିରତି ସତ୍ତ୍ୱେ ଦକ୍ଷିଣ ଲେବାନନ୍ରେ ପୁନର୍ବାର ଉତ୍ତେଜନା ବୃଦ୍ଧି ପାଇଛି। ଇସ୍ରାଏଲ ପକ୍ଷରୁ କରାଯାଇଥିବା ଏକ ଏୟାର ଷ୍ଟ୍ରାଇକ୍ରେ ଜଣେ ମହିଳା ସାମ୍ବାଦିକ ସହ ମୋଟ ୫ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି।
ରିପୋର୍ଟ ଅନୁସାରେ, ଦକ୍ଷିଣ ଲେବାନନ୍ର ଆଟ୍-ତିରି ଅଞ୍ଚଳରେ ଏକ ଯାନକୁ ଲକ୍ଷ୍ୟ କରି ପ୍ରଥମ ଆକ୍ରମଣ କରାଯାଇଥିଲା। ଏହି ଘଟଣାରେ ଗାଡ଼ିରେ ଥିବା ଦୁଇଜଣ ଘଟଣାସ୍ଥଳରେ ମୃତ୍ୟୁବରଣ କରିଥିଲେ। ପରେ ଘଟଣାସ୍ଥଳରେ ଖବର ସଂଗ୍ରହ ପାଇଁ ଯାଇଥିବା ସାମ୍ବାଦିକମାନେ ମଧ୍ୟ ଆକ୍ରମଣର ଶିକାର ହୋଇଥିଲେ।
Israel Defense Forces (ଆଇଡିଏଫ୍) ପକ୍ଷରୁ କୁହାଯାଇଛି ଯେ, Hezbollah ଦ୍ୱାରା ଅସ୍ତ୍ରବିରତି ଉଲ୍ଲଂଘନ ହେଉଥିବାରୁ ଏହି କାର୍ଯ୍ୟାନୁଷ୍ଠାନ ନିଆଯାଇଛି। ସେମାନଙ୍କ ଅନୁସାରେ, ଦକ୍ଷିଣ ଲେବାନନ୍ରୁ ସନ୍ଦେହଜନକ ଗତିବିଧି କରୁଥିବା ଦୁଇଟି ଯାନକୁ ଟାର୍ଗେଟ କରାଯାଇଥିଲା ଏବଂ ସମ୍ଭାବ୍ୟ ବିପଦକୁ ରୋକିବା ପାଇଁ ଏହା ଆବଶ୍ୟକ ଥିଲା।
ଅନ୍ୟପଟେ, ଲେବାନନ୍ ପକ୍ଷରୁ ଅଭିଯୋଗ କରାଯାଇଛି ଯେ ଉଦ୍ଧାର କାର୍ଯ୍ୟ ଚାଲିଥିବା ବେଳେ ମଧ୍ୟ ପୁନର୍ବାର ଆକ୍ରମଣ କରାଯାଇଥିଲା, ଯାହା ଅସ୍ତ୍ରବିରତି ନିୟମର ଉଲ୍ଲଂଘନ।
ଲେବାନନ୍ର ଜାତୀୟ ସମାଚାର ସଂସ୍ଥା ଅନୁଯାୟୀ, ଆକ୍ରମଣକୁ କଭର କରିବାକୁ ଯାଇଥିବା ଦୁଇଜଣ ସାମ୍ବାଦିକ ଉପରେ ମଧ୍ୟ ଏୟାର ଷ୍ଟ୍ରାଇକ୍ ହୋଇଥିଲା। ଏହି ଆକ୍ରମଣରେ ଗୃହ ଧ୍ୱଂସ ହୋଇଥିବା ସହ ସେମାନେ ଭସ୍ମାବଶେଷ ତଳେ ଫସିଯାଇଥିଲେ। ମୃତ ସାମ୍ବାଦିକଙ୍କ ମଧ୍ୟରୁ Amal Khalil ଜଣେ ସ୍ଥାନୀୟ ମାଧ୍ୟମ ସଂସ୍ଥା ସହ ସଂପୃକ୍ତ ଥିବା ଜଣାପଡ଼ିଛି।
ଏହି ଘଟଣାକୁ ନେଇ ଲେବାନନ୍ର ସୂଚନାମନ୍ତ୍ରୀ Paul Morcos କଠୋର ପ୍ରତିକ୍ରିୟା ଜଣାଇଛନ୍ତି। ସେ କହିଛନ୍ତି, ସାମ୍ବାଦିକଙ୍କ ଉପରେ ଆକ୍ରମଣ ଗ୍ରହଣଯୋଗ୍ୟ ନୁହେଁ ଏବଂ ଏହା ପାଇଁ ଇସ୍ରାଏଲକୁ ଦାୟୀ କରାଯିବା ଉଚିତ। ସେ ସହିତ ଗଣମାଧ୍ୟମର ସୁରକ୍ଷା ଓ ସ୍ୱାଧୀନତା ନିଶ୍ଚିତ କରିବାକୁ ମଧ୍ୟ ଆହ୍ୱାନ କରିଛନ୍ତି।
ଘଟଣା ପରେ ସ୍ପଷ୍ଟ ହୋଇଛି ଯେ ଅସ୍ତ୍ରବିରତି ଥିଲେ ମଧ୍ୟ ଏହି ଅଞ୍ଚଳରେ ଉତ୍ତେଜନା ଶମିତ ହୋଇନାହିଁ ଏବଂ ପରିସ୍ଥିତି ଆଗାମୀ ଦିନରେ ଆହୁରି ଗମ୍ଭୀର ହେବାର ଆଶଙ୍କା ରହିଛି।