ବେଗୁସରାଇରେ ମହିଳାଙ୍କ ସହ ଗଣଦୁଷ୍କର୍ମ କରି ଗୁପ୍ତାଙ୍ଗରେ ଭର୍ତ୍ତି କଲେ ଗୁଳି, କାଠ ଓ ପଥର; ଘଟଣାକୁ ନେଇ ତଦନ୍ତ ଜୋରଦାର
ବେଗୁସରାଇ: ବିହାରର ବେଗୁସରାଇ ଜିଲ୍ଲାରେ ଜଣେ ମହିଳାଙ୍କ ଉପରେ ଅତ୍ୟନ୍ତ ନିର୍ମମ ଆକ୍ରମଣ ଓ ଗଣଦୁଷ୍କର୍ମ ଅଭିଯୋଗ ସାମ୍ନାକୁ ଆସିଛି। ଘଟଣା ପରେ ପୀଡ଼ିତାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ପୁଲିସ ମାମଲାର ତଦନ୍ତ ଆରମ୍ଭ କରିଛି।
ସୂଚନା ଅନୁସାରେ, ଜୁନ୍ ୧୧ ରାତିରେ ଚାକିଆ ଥାନା ଅଞ୍ଚଳରେ ଏହି ଘଟଣା ଘଟିଥିବା ଅଭିଯୋଗ ହୋଇଛି। ପୀଡ଼ିତାଙ୍କ କହିବା ଅନୁସାରେ, ରାତିରେ କିଛି ଲୋକ ଘରକୁ ଜବରଦସ୍ତି ପ୍ରବେଶ କରି ତାଙ୍କ ସ୍ୱାମୀଙ୍କୁ ଅଲଗା କରି ରଖିଥିଲେ। ପରେ ତାଙ୍କୁ ଘର ବାହାରକୁ ନେଇ ଯୌନ ନିର୍ଯାତନା ଦେଇଥିବା ଅଭିଯୋଗ କରାଯାଇଛି।
ପୀଡ଼ିତା ପରେ ଶାରୀରିକ ଅସୁସ୍ଥତା ଅନୁଭବ କରି ଚିକିତ୍ସା ପାଇଁ ଭର୍ତ୍ତି ହୋଇଥିଲେ। ଚିକିତ୍ସା ପ୍ରକ୍ରିୟା ପରେ ଘଟଣାକୁ ନେଇ ତଦନ୍ତ ଆହୁରି ଗୁରୁତ୍ୱ ପାଇଛି। ତେବେ ମେଡିକାଲ ସମ୍ବନ୍ଧୀୟ ବିବରଣୀ ଓ ଅଭିଯୋଗର ସମସ୍ତ ପ୍ରସଙ୍ଗର ଯାଞ୍ଚ ଚାଲିଥିବା ପୁଲିସ ପକ୍ଷରୁ କୁହାଯାଇଛି।
ପୀଡ଼ିତା ଆହୁରି ଅଭିଯୋଗ କରିଛନ୍ତି ଯେ, ଏହା ପୂର୍ବରୁ ମଧ୍ୟ କିଛି ବ୍ୟକ୍ତି ତାଙ୍କ ଘରକୁ ଆସି ଧମକ ଓ ଆକ୍ରମଣ କରିଥିଲେ ଏବଂ ସେନେଇ ଅଭିଯୋଗ ହୋଇଥିଲା। ଏହି ଘଟଣା ସହ ପୂର୍ବ ଘଟଣାର କୌଣସି ସମ୍ପର୍କ ରହିଛି କି ନାହିଁ, ପୁଲିସ ତାହା ମଧ୍ୟ ଖତିଆନ କରୁଛି।
ସ୍ଥାନୀୟ ଡିଏସ୍ପି ଆନନ୍ଦ କୁମାର ପାଣ୍ଡେ କହିଛନ୍ତି ଯେ, ମାମଲାକୁ ଗୁରୁତ୍ୱର ସହ ନିଆଯାଇଛି ଏବଂ ସମସ୍ତ ଦିଗରୁ ତଦନ୍ତ ଚାଲିଛି। ଅଭିଯୁକ୍ତଙ୍କୁ ଚିହ୍ନଟ କରି ଆଇନ ଅନୁଯାୟୀ ପଦକ୍ଷେପ ନିଆଯିବ। ସେହିପରି ଯଦି ପୂର୍ବ ଅଭିଯୋଗରେ କୌଣସି ଅବହେଳା ପ୍ରମାଣିତ ହୁଏ, ତେବେ ସମ୍ପୃକ୍ତ ପୁଲିସ କର୍ମଚାରୀଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ହେବ।