ପାଟନା:ବିହାର ରାଜଧାନୀ ପାଟନାର ମୁସଲ୍ଲାପୁର ହାଟ ଅଞ୍ଚଳରେ ଥିବା ଚର୍ଚ୍ଚିତ ଶିକ୍ଷାବିତ୍ ‘ଖାନ୍ ସାର୍’ଙ୍କ କୋଚିଂ ସେଣ୍ଟର ଉପରେ ଜନୈକ ଦୁର୍ବୃତ୍ତମାନେ ଆକ୍ରମଣ କରିଛନ୍ତି। ଏହି ହିଂସାକାଣ୍ଡରେ ଜଣେ ସୁରକ୍ଷାକର୍ମୀ (ଗାର୍ଡ) ଗୁରୁତର ଭାବେ ଆହତ ହୋଇଛନ୍ତି। ବ୍ୟବସାୟିକ ଶତ୍ରୁତା କାରଣରୁ ପ୍ରତିଦ୍ୱନ୍ଦ୍ୱୀ କୋଚିଂ ସଂସ୍ଥା ଏହି ଆକ୍ରମଣ ପଛରେ ଥିବା ସନ୍ଦେହ କରାଯାଉଛି।
ଘଟଣା ସ୍ଥଳର ସିସିଟିଭି (CCTV) ଫୁଟେଜ୍ ଏବଂ ପ୍ରାଥମିକ ପଚରାଉଚରା ଆଧାରରେ ପୋଲିସ ‘ଜ୍ଞାନ ବିନ୍ଦୁ କୋଚିଂ ସେଣ୍ଟର’ ସହ ଜଡ଼ିତ ପ୍ରାୟ ୧୫-୨୦ ଜଣଙ୍କ ବିରୋଧରେ ମାମଲା ରୁଜୁ କରିଛି। ଫେରାର ଥିବା ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।
ଏହି ଅପ୍ରୀତିକର ପରିସ୍ଥିତି ପରେ ସୁରକ୍ଷା ଦୃଷ୍ଟିରୁ ଖାନ୍ ସାର୍ ନିଜର କୋଚିଂ ସେଣ୍ଟରକୁ ସାମୟିକ ଭାବେ ବନ୍ଦ କରିଦେଇଛନ୍ତି। ଏହାକୁ ନେଇ ସେଠାରେ ପଢ଼ୁଥିବା ହଜାର ହଜାର ଛାତ୍ରଛାତ୍ରୀଙ୍କ ମଧ୍ୟରେ ଚିନ୍ତା ଓ ଅସନ୍ତୋଷ ପ୍ରକାଶ ପାଇଛି। ସୁରକ୍ଷା ଏବଂ ଅପରାଧୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରି ଶତାଧିକ ଛାତ୍ରଛାତ୍ରୀ ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିଛନ୍ତି। ପରିସ୍ଥିତିକୁ ଦେଖି ଖାନ୍ ସାର୍ ସମସ୍ତ ଛାତ୍ରଛାତ୍ରୀଙ୍କୁ ଶାନ୍ତି ବଜାୟ ରଖିବାକୁ ଏବଂ ଆଇନକୁ ହାତକୁ ନନେବାକୁ ନିବେଦନ କରିଛନ୍ତି।ପୋଲିସ ପ୍ରଶାସନ ପକ୍ଷରୁ କୋଚିଂ ସେଣ୍ଟର ଆଖପାଖ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ଏବଂ ଖୁବ୍ ଶୀଘ୍ର ମୁଖ୍ୟ ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି ଆଶ୍ୱାସନା ଦିଆଯାଇଛି।