ଭୁବନେଶ୍ୱର: ପବିତ୍ର ଶ୍ରୀକ୍ଷେତ୍ର ପୁରୀଠାରେ ଆୟୋଜିତ ପ୍ରତିଷ୍ଠିତ ‘ବ୍ରିକ୍ସ ବିପର୍ଯ୍ୟୟ ବିପତ୍ତି ହ୍ରାସ କାର୍ଯ୍ୟକାରୀ ଗୋଷ୍ଠୀ’ (BRICS Disaster Risk Reduction Working Group) ର ବୈଷୟିକ ବୈଠକକୁ ନେଇ ଗର୍ବ ପ୍ରକାଶ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଏକ ପୋଷ୍ଟ କରି ସେ ଓଡ଼ିଶାର ବିପର୍ଯ୍ୟୟ ପରିଚାଳନା କ୍ଷେତ୍ରର ସଫଳତା ବିଷୟରେ ଆଲୋକପାତ କରିଛନ୍ତି।
ନବୀନ ପଟ୍ଟନାୟକ କହିଛନ୍ତି ଯେ, ୧୯୯୯ ମସିହାର ମହାବାତ୍ୟା ପରଠାରୁ ଓଡ଼ିଶା ବିପର୍ଯ୍ୟୟ ମୁକାବିଲା କ୍ଷେତ୍ରରେ ଏକ ବଡ଼ ପରିବର୍ତ୍ତନ ଆଣିପାରିଛି। ରାଜ୍ୟ ସବୁବେଳେ “ପ୍ରତିଟି ଜୀବନ ମୂଲ୍ୟବାନ” ନୀତିକୁ ଆଧାର କରି ସାହସ ଓ ଦୃଢ଼ତାର ସହ ପ୍ରାକୃତିକ ବିପର୍ଯ୍ୟୟର ସାମ୍ନା କରିଆସିଛି।
ପୂର୍ବତନ ମୁଖ୍ୟମନ୍ତ୍ରୀ ରାଜ୍ୟର ବିଶ୍ୱ ପ୍ରସିଦ୍ଧ ‘ଜିରୋ କାଜୁଆଲଟି’ (ଶୂନ୍ୟ ମୃତାହତ) ମଡେଲର ପ୍ରଶଂସା କରିଛନ୍ତି। ସେ କହିଛନ୍ତି ଯେ, ସୁଦୃଢ଼ ଭିତ୍ତିଭୂମି ଏବଂ ସମୁଦାୟର ସକ୍ରିୟ ପ୍ରସ୍ତୁତି ଯୋଗୁଁ ଓଡ଼ିଶା ଆଜି ବିପର୍ଯ୍ୟୟ ପ୍ରବଣ ରାଜ୍ୟରୁ ବିଶ୍ୱ ପାଇଁ ଏକ ମାର୍ଗଦର୍ଶକ ସାଜିଛି।
ପ୍ରଥମ ଥର ପାଇଁ ଓଡ଼ିଶାରେ ବ୍ରିକ୍ସ ସମ୍ମିଳନୀ:
ଏହି ସମ୍ମିଳନୀରେ ଯୋଗଦେଇଥିବା ସମସ୍ତ ବ୍ରିକ୍ସ (BRICS) ପ୍ରତିନିଧିମାନଙ୍କୁ ସେ ସ୍ୱାଗତ ଜଣାଇବା ସହ ଏକ ସୁରକ୍ଷିତ ଏବଂ ସୁଦୃଢ଼ ଭବିଷ୍ୟତ ଗଠନ ପାଇଁ ସମୂହ ବିଶ୍ୱ ପ୍ରୟାସ ଉପରେ ଗୁରୁତ୍ୱ ଦେଇଛନ୍ତି। ସୂଚନାଯୋଗ୍ୟ ଯେ, ଓଡ଼ିଶା ପ୍ରଥମ ଥର ପାଇଁ ଏଭଳି ଏକ ଆନ୍ତର୍ଜାତୀୟ ସ୍ତରର ବ୍ରିକ୍ସ ସମ୍ମିଳନୀ ଆୟୋଜନ କରୁଛି।