ୱାଶିଂଟନ: ପ୍ରତିରକ୍ଷା ଓ ଆଧୁନିକ ପ୍ରଯୁକ୍ତିବିଦ୍ୟା ପାଇଁ ଆବଶ୍ୟକ ହେଉଥିବା ଗୁରୁତ୍ୱପୂର୍ଣ୍ଣ ଖଣିଜ ସମ୍ପଦ (Critical Minerals) କ୍ଷେତ୍ରରେ ଚୀନର ଏକଛତ୍ରବାଦୀ ପ୍ରଭାବକୁ ନେଇ ଆମେରିକା ଗମ୍ଭୀର ଚିନ୍ତା ପ୍ରକଟ କରିଛି। ଆମେରିକାର ବୈଦେଶିକ ସଚିବ ମାର୍କୋ ରୁବିଓ ଚେତାବନୀ ଦେଇଛନ୍ତି ଯେ, ଏହି ସମ୍ପଦ ଗୁଡ଼ିକ ପାଇଁ ବେଜିଂ ଉପରେ ୯୦ ପ୍ରତିଶତ ନିର୍ଭର କରିବା ବିଶ୍ୱର ଅର୍ଥନୀତି ଏବଂ ଜାତୀୟ ସୁରକ୍ଷା ପ୍ରତି ଏକ ବଡ଼ ବିପଦ।
ଏକ ସଂସଦୀୟ କମିଟି ଆଗରେ ରୁବିଓ କହିଛନ୍ତି ଯେ ଲିଥିୟମ୍, କୋବାଲ୍ଟ, ଗ୍ରାଫାଇଟ୍ ଏବଂ ଅତି ବିରଳ ମୃତ୍ତିକା ଉପାଦାନ ଭଳି ଖଣିଜ ପଦାର୍ଥ ଗୁଡ଼ିକ ଇଲେକ୍ଟ୍ରିକ୍ ଯାନ, ସେମିକଣ୍ଡକ୍ଟର ଏବଂ ଉନ୍ନତ ସାମରିକ ପ୍ରତିରକ୍ଷା ବ୍ୟବସ୍ଥା ପାଇଁ ଅତ୍ୟନ୍ତ ଜରୁରୀ। ଏହି ଯୋଗାଣ ଶୃଙ୍ଖଳା (Supply Chain) କୁ ଚୀନ କବ୍ଜାରୁ ମୁକ୍ତ କରିବା ପାଇଁ ଆମେରିକା ଏବେ ବିଶ୍ୱର ପ୍ରାୟ ୩୦ରୁ ଅଧିକ ଦେଶ ସହ ମିଶି ବିକଳ୍ପ ଉତ୍ସ ଏବଂ ପ୍ରକ୍ରିୟାକରଣ କ୍ଷମତା ବୃଦ୍ଧି ଉପରେ କାର୍ଯ୍ୟ କରୁଛି।
ଖଣିଜ ସମ୍ପଦ ବ୍ୟତୀତ ଔଷଧ (Pharmaceuticals) କ୍ଷେତ୍ରରେ ମଧ୍ୟ ଚୀନ୍ ଉପରେ ଅତ୍ୟଧିକ ନିର୍ଭରଶୀଳତା ରହିଛି, ଯାହା ସଙ୍କଟ ସମୟରେ ବିପଦ ସୃଷ୍ଟି କରିପାରେ। ଏହି ସମସ୍ୟାର ସମାଧାନ ପାଇଁ ଟ୍ରମ୍ପ ପ୍ରଶାସନ ନିଜର ବୈଦେଶିକ ନୀତିରେ ବଡ଼ ପରିବର୍ତ୍ତନ କରୁଥିବା ସେ ସୂଚନା ଦେଇଛନ୍ତି।