ଭୁବନେଶ୍ୱର: ଓଡ଼ିଶା ଜନସେବା ଆୟୋଗ (OPSC) ପକ୍ଷରୁ ଆୟୋଜିତ ଓଡ଼ିଶା ସିଭିଲ୍ ସର୍ଭିସ୍ (OCS) ପ୍ରିଲିମିନାରି ପରୀକ୍ଷାର ଫଳାଫଳ ଶୁକ୍ରବାର ପ୍ରକାଶ ପାଇଛି। ଏନେଇ ଆୟୋଗ ପକ୍ଷରୁ ଆନୁଷ୍ଠାନିକ ବିଜ୍ଞପ୍ତି ଜାରି କରାଯାଇଛି।
ଚଳିତ ବର୍ଷ ଜୁନ୍ ୭ ତାରିଖରେ ଅନୁଷ୍ଠିତ ଏହି ପ୍ରାଥମିକ ପରୀକ୍ଷାରେ ମୋଟ ୫,୬୯୦ ଜଣ ପ୍ରାର୍ଥୀ କୃତକାର୍ଯ୍ୟ ହୋଇଛନ୍ତି। ସେମାନଙ୍କ ମଧ୍ୟରେ ୧,୯୦୫ ଜଣ ମହିଳା ପ୍ରାର୍ଥୀ ରହିଛନ୍ତି। ଏହି ସମସ୍ତ ସଫଳ ପ୍ରାର୍ଥୀ ପରବର୍ତ୍ତୀ ଲିଖିତ (ମେନ୍ସ) ପରୀକ୍ଷାରେ ଅଂଶଗ୍ରହଣ କରିବେ।
ଓପିଏସ୍ସି ସୂଚନା ଅନୁସାରେ, ଓସିଏସ୍ ମେନ୍ସ ପରୀକ୍ଷା ଚଳିତ ବର୍ଷ ଅକ୍ଟୋବର ମାସରେ ଆୟୋଜନ କରାଯିବାକୁ ଯୋଜନା ରହିଛି। ପରୀକ୍ଷାର ସଠିକ୍ ତାରିଖ, କାର୍ଯ୍ୟସୂଚୀ ଓ ଅନ୍ୟାନ୍ୟ ନିର୍ଦ୍ଦେଶାବଳୀ ସମ୍ପର୍କରେ ପୃଥକ ବିଜ୍ଞପ୍ତି ପରବର୍ତ୍ତୀ ସମୟରେ ପ୍ରକାଶ କରାଯିବ।
ପ୍ରିଲିମିନାରି ପରୀକ୍ଷାରେ ସଫଳ ହୋଇଥିବା ସମସ୍ତ ୫,୬୯୦ ଜଣ ପ୍ରାର୍ଥୀଙ୍କ ରୋଲ୍ ନମ୍ବର ତାଲିକା ଓପିଏସ୍ସିର ଅଧିକୃତ ୱେବସାଇଟ୍ରେ ଉପଲବ୍ଧ ରହିଛି। ପ୍ରାର୍ଥୀମାନେ ସେଠାରେ ଯାଇ ନିଜ ଫଳାଫଳ ଯାଞ୍ଚ କରିପାରିବେ।