ବେଙ୍ଗାଲୁରୁ: କର୍ଣ୍ଣାଟକରେ ନୂତନ ସରକାର ଗଠନ ହେବାର କିଛିଦିନ ମଧ୍ୟରେ ଶାସକ କଂଗ୍ରେସ ଶିବିରରେ ରାଜନୈତିକ ଚର୍ଚ୍ଚା ତୀବ୍ର ହୋଇଛି। ବରିଷ୍ଠ ନେତା ତଥା କ୍ୟାବିନେଟ୍ ମନ୍ତ୍ରୀ ରାମଲିଙ୍ଗା ରେଡ୍ଡୀ ମନ୍ତ୍ରୀ ପଦରୁ ଇସ୍ତଫା ଦେଇଥିବା ଖବର ସାମ୍ନାକୁ ଆସିଛି। ବିଭାଗ ବଣ୍ଟନକୁ ନେଇ ଅସନ୍ତୋଷ ଏହି ନିଷ୍ପତ୍ତିର ପ୍ରମୁଖ କାରଣ ବୋଲି ଚର୍ଚ୍ଚା ହେଉଛି।
ରିପୋର୍ଟ ଅନୁସାରେ, ରେଡ୍ଡୀଙ୍କୁ ପୂର୍ବରୁ ‘ବେଙ୍ଗାଲୁରୁ ବିକାଶ’ ଭଳି ଗୁରୁତ୍ୱପୂର୍ଣ୍ଣ ବିଭାଗ ଦିଆଯିବ ବୋଲି ଆଶ୍ୱାସନ ମିଳିଥିଲା। କିନ୍ତୁ ଶେଷରେ ତାଙ୍କୁ ‘ମଧ୍ୟମ ଓ ବୃହତ ଜଳସେଚନ’ ବିଭାଗ ମିଳିବା ପରେ ସେ ଅସନ୍ତୋଷ ପ୍ରକାଶ କରି ଇସ୍ତଫା ଦେଇଥିବା କୁହାଯାଉଛି।
ନିଜ ପ୍ରତିକ୍ରିୟାରେ ରାମଲିଙ୍ଗା ରେଡ୍ଡୀ ସ୍ପଷ୍ଟ କରିଛନ୍ତି ଯେ ସେ କେବଳ ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି, ବିଧାୟକ ଭାବେ କାର୍ଯ୍ୟ ଜାରି ରଖିବେ। ସେ ଆହୁରି କହିଛନ୍ତି ଯେ ମୁଖ୍ୟମନ୍ତ୍ରୀ କିମ୍ବା ଦଳର ନେତୃତ୍ୱ ପ୍ରତି ତାଙ୍କର ବ୍ୟକ୍ତିଗତ ଅସନ୍ତୋଷ ନାହିଁ।
ଅନ୍ୟପଟେ କର୍ଣ୍ଣାଟକ ମୁଖ୍ୟମନ୍ତ୍ରୀ ଡିକେ ଶିବକୁମାର ଘଟଣାକୁ ହାଲୁକା ଭାବରେ ନେଇ କହିଛନ୍ତି ଯେ ରାମଲିଙ୍ଗା ରେଡ୍ଡୀ ଜଣେ ଅଭିଜ୍ଞ ନେତା ଏବଂ ସରକାରରେ ତାଙ୍କ ଭୂମିକା ଗୁରୁତ୍ୱପୂର୍ଣ୍ଣ। ଯଦି କୌଣସି ମତାନ୍ତର ରହିଛି ତେବେ ଆଲୋଚନା ମାଧ୍ୟମରେ ସମାଧାନ କରାଯିବ।
ସୂତ୍ର ଅନୁସାରେ, ଯେଉଁ ବେଙ୍ଗାଲୁରୁ ବିକାଶ ବିଭାଗକୁ ନେଇ ବିବାଦ ଦେଖାଦେଇଛି, ସେହି ଦାୟିତ୍ୱ ଅନ୍ୟ ଜଣେ ବରିଷ୍ଠ ନେତାଙ୍କୁ ଦିଆଯାଇଥିବାରୁ ଏହି ଅସନ୍ତୋଷ ଆହୁରି ବଢ଼ିଥିବା ଚର୍ଚ୍ଚା ହେଉଛି।