ଅକ୍ଲାଣ୍ଡ: ନ୍ୟୁଜିଲାଣ୍ଡରେ ଆୟୋଜିତ ଏଫ୍ଆଇଏଚ୍ ନେସନ୍ସ କପ୍ ମହିଳା ହକି ପ୍ରତିଯୋଗିତାରେ ଭାରତୀୟ ଦଳ ଚମତ୍କାର ପ୍ରଦର୍ଶନ କରି ଚାମ୍ପିଅନ୍ ହୋଇଛି। ଫାଇନାଲ୍ରେ ଘରୋଇ ଦଳ ନ୍ୟୁଜିଲାଣ୍ଡକୁ ୨-୦ ଗୋଲ୍ରେ ପରାସ୍ତ କରି ଭାରତ ତୃତୀୟ ଥର ପାଇଁ ଏହି ସମ୍ମାନଜନକ ଟ୍ରଫି ନିଜ ନାମରେ କରିଛି।
ପ୍ରତିଯୋଗିତାରେ ଭାରତ ଆରମ୍ଭରୁ ଅପରାଜେୟ ରହିଥିଲା। ପୁଲ୍-ଏରେ ଆମେରିକା, ଜାପାନ ଓ ଉରୁଗୁଏକୁ ପରାସ୍ତ କରି ଦଳ ସେମିଫାଇନାଲ୍କୁ ପ୍ରବେଶ କରିଥିଲା। ପରେ ସେମିଫାଇନାଲ୍ରେ ଚିଲିକୁ ୬-୦ ଗୋଲ୍ରେ ହରାଇ ଫାଇନାଲ୍ ଟିକେଟ୍ ହାସଲ କରିଥିଲା।
ଫାଇନାଲ୍ ମ୍ୟାଚ୍ରେ ଭାରତ ଆରମ୍ଭରୁ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା। ଚତୁର୍ଥ ମିନିଟ୍ରେ ମିଳିଥିବା ପେନାଲ୍ଟି କର୍ଣ୍ଣରକୁ ନବନୀତ କୌର ଗୋଲ୍ରେ ପରିଣତ କରି ଦଳକୁ ୧-୦ରେ ଆଗୁଆ କରିଥିଲେ।
ପ୍ରଥମ କ୍ୱାର୍ଟର ଶେଷ ହେବା ପୂର୍ବରୁ ଓଡ଼ିଶାର ଗର୍ବ ସୁନେଲିତା ଟୋପ୍ପୋ ଆଉ ଏକ ପେନାଲ୍ଟି କର୍ଣ୍ଣରକୁ ଗୋଲ୍ରେ ପରିଣତ କରି ଭାରତର ଅଗ୍ରଣୀକୁ ୨-୦ କରିଦେଇଥିଲେ। ଏହି ଗୋଲ୍ ମ୍ୟାଚ୍ର ମୋଡ଼ ବଦଳାଇ ଦେଇଥିଲା।
ଦ୍ୱିତୀୟାର୍ଦ୍ଧରେ ଭାରତୀୟ ଡିଫେନ୍ସ ନ୍ୟୁଜିଲାଣ୍ଡକୁ କୌଣସି ସୁଯୋଗ ଦେଇନଥିଲା। ଶେଷ କ୍ୱାର୍ଟରରେ ଘରୋଇ ଦଳକୁ ମିଳିଥିବା ପେନାଲ୍ଟି କର୍ଣ୍ଣରକୁ ଗୋଲକିପର ସବିତା ସଫଳ ଭାବେ ରୋକି ଦଳର ବିଜୟ ନିଶ୍ଚିତ କରିଥିଲେ।
ଏହି ବିଜୟ ସହ ଭାରତ ଏଫ୍ଆଇଏଚ୍ ପ୍ରୋ-ଲିଗ୍ ପାଇଁ ମଧ୍ୟ ଯୋଗ୍ୟତା ଅର୍ଜନ କରିଛି। ଦଳର ସଫଳତା ପରେ ହକି ଇଣ୍ଡିଆ ପକ୍ଷରୁ ପ୍ରତ୍ୟେକ ଖେଳାଳିଙ୍କୁ ୩ ଲକ୍ଷ ଟଙ୍କା ଏବଂ ସପୋର୍ଟ ଷ୍ଟାଫ୍ଙ୍କୁ ୧.୫ ଲକ୍ଷ ଟଙ୍କା ଲେଖାଏଁ ପୁରସ୍କାର ଘୋଷଣା କରାଯାଇଛି।
ଚମତ୍କାର ପ୍ରଦର୍ଶନ ପାଇଁ ଲାଲରେମସିଆମି ଫାଇନାଲ୍ର ‘ମ୍ୟାଚ୍ର ଶ୍ରେଷ୍ଠ ଖେଳାଳି’ ପୁରସ୍କାର ପାଇଥିବାବେଳେ ଦୀପିକା ୬ ଗୋଲ୍ ସହ ଯୁଗ୍ମ ଭାବେ ପ୍ରତିଯୋଗିତାର ଶ୍ରେଷ୍ଠ ଗୋଲ୍ଦାତା ଭାବେ ସମ୍ମାନିତ ହୋଇଛନ୍ତି।